الماتى اكىمى دارحان ساتىبالدى جەتىسۋ اۋدانىندا ۇزىندىعى شامامەن 2 شاقىرىم بولاتىن سۋ قۇبىرى جەلىسىنىڭ قايتا جاڭعىرتۋ بارىسىن ءوزى تەكسەردى. جۇمىستاردى تاپسىرىس بەرۋشى – «الماتى سۋ» مكك، مەردىگەر – «سك Megaron» ج ش س اتقارۋدا.
وقيعا ورنىندا قالا اكىمى مەردىگەرگە جۇمىستىڭ كەستەدەن كەشىگىپ جاتقانىن ايتىپ، قاتاڭ ەسكەرتۋ جاسادى.
«جۇمىستار كىدىرىسسىز اياقتالۋعا ءتيىس. قازاندا جىلىتۋ ماۋسىمى باستالادى، الدا جاڭبىرلى كۇندەر تۇر، ءبىر مينۋتتى دا جوعالتۋعا بولمايدى. تاۋلىك بويى جۇمىس ىستەڭىزدەر، ەشقانداي كىدىرىس بولماۋى قاجەت»، – دەپ اتاپ ءوتتى اكىم.
دارحان ساتىبالدى مەردىگەرلەردى جەكە جاۋاپكەرشىلىككە شاقىرىپ، جوبانىڭ ورىندالۋى ءوزىنىڭ تىكەلەي باقىلاۋىندا ەكەنىن جەتكىزدى.
قايتا جاڭعىرتۋ جۇمىستارى گەرسەن كوشەسى بويىندا – رىسقۇلوۆ داڭعىلىنان ۆيليامس كوشەسىنە دەيىنگى ارالىقتى قامتيدى. جالپى ۇزىندىعى 1،9 شاقىرىم جەلىنىڭ 847 مەترى – ماگيسترالدىق، ال 1 شاقىرىمنان استامى – ابونەنتتىك جەلى.
قۇرىلىس-مونتاج جۇمىستارى 2025 جىلدىڭ تامىزىندا باستالدى. باستاپقىدا مەردىگەرگە قاراشاعا دەيىن مەرزىم بەرىلگەن بولاتىن. الايدا اكىم تاپسىرماسىمەن جۇمىستار جەدەلدەتىلىپ، جەتىسۋ اۋدانىنىڭ تۇرعىندارى جىلىتۋ ماۋسىمىنىڭ باسىندا سۋعا قول جەتكىزۋگە ءتيىس.
ءقازىر 560 مەتردە توپىراق قازىلىپ، 456 مەتر قۇبىر توسەلدى، 420 مەتردە كەرى تولتىرۋ جۇمىستارى جۇرگىزىلدى. سونداي-اق ديامەترى 630 مم بولاتىن 12 تارماق قۇبىر ورناتىلىپ، 8 تەمىربەتون قۇرىلعىسى قويىلدى. بارلىق كەزەڭ اياقتالعاننان كەيىن مەردىگەر شامامەن 1 900 شارشى مەتر جول جابىندىسىن قالپىنا كەلتىرۋگە مىندەتتى.
قايتا جاڭعىرتۋ جۇمىستارى جەتىسۋ اۋدانى تۇرعىندارىن ۇزدىكسىز ءارى ساپالى اۋىز سۋمەن سەنىمدى تۇردە قامتۋعا مۇمكىندىك بەرەدى.