الماتى اكىمى دارحان ساتىبالدى جۇمىس ساپارى بارىسىندا "بارلىق" بازارى ورنالاسقان اۋماقتاعى نەگىزگى ينفراقۇرىلىمدىق جوبالاردىڭ جۇزەگە اسۋ بارىسىن كوردى. بۇل جوبالار قالانىڭ كولىك جانە ينجەنەرلىك جۇيەسىن دامىتۋعا باعىتتالعان.
اكىم مەتروپوليتەننىڭ ءبىرىنشى جەلىسىنىڭ ءۇشىنشى كەزەگىنە قاتىستى جوباعا توقتالدى. ول "قالقامان" ستانسياسىنان "بارلىق" بازارىنا دەيىنگى ارالىقتى قامتيدى. جوسپارعا سايكەس، ۇزىندىعى 5،3 شاقىرىمدىق توننەلدەر قازىلىپ، ءۇش ستانسيا سالىنباق. سونىمەن قاتار "بارلىق" بازارى اۋماعىندا ءبىرىڭعاي كولىك-ايىرباس تورابى (حاب) جاسالادى.
بولاشاق حاب قۇرامىنا مەترو ستانسياسى، قالاارالىق اۆتوبەكەت، جەڭىل رەلستى كولىك ستانسياسى جانە اۆتوتۇراق كىرەدى. جوبا الماتىنىڭ شەت ايماقتارىن ورتالىقپەن بايلانىستىرىپ، تۇرعىنداردىڭ بارىنشا ىڭعايلى قوعامدىق كولىكپەن قاتىناۋىنا مۇمكىندىك بەرەدى.
ساپار بارىسىندا دارحان ساتىبالدى جەر استى سۋ الۋ قوندىرعىسى – "اقجايىق (بارلىق)" جوباسىمەن دە تانىستى. جاڭا نىسان ناۋرىزباي جانە الاتاۋ اۋداندارىنداعى 80 مىڭنان استام تۇرعىنعا تاۋلىگىنە 43 مىڭ تەكشە مەترگە دەيىن سۋ بەرەدى. بۇل جوبا قالانىڭ باتىس بولىگىن سۋ جۇيەسىمەن قامتيدى.
ساپار سوڭىندا قالا اكىمى مەترو قۇرىلىسىنا ارنالعان جەر تەلىمدەرىن كەلىسۋ مەن ساتىپ الۋدى جەدەلدەتۋ، جوبالىق-سمەتالىق قۇجاتتامانىڭ مەملەكەتتىك ساراپتامادان بەلگىلەنگەن مەرزىمدە ءوتۋىن قامتاماسىز ەتۋدى تاپسىردى. سونىمەن بىرگە، بولاشاق كولىك تورابىنىڭ قاۋىپسىزدىگى مەن جايلىلىعىنا باسا نازار اۋدارۋدى ءارى "اقجايىق (بارلىق)" سۋ الۋ جوباسىن قاتاڭ باقىلاۋدا ۇستاۋدى مىندەتتەدى.