الماتى قالاسىنىڭ اكىمى دارحان ساتىبالدى جۇمىس ساپارى بارىسىندا يندۋستريالىق ايماق اۋماعىنداعى ءبىرقاتار كاسىپورىننىڭ جۇمىسىمەن تانىسىپ، ونىڭ دامۋ بولاشاعىنا قاتىستى كەڭەس وتكىزدى.
جۇمىس ىستەپ تۇرعان وندىرىستەردىڭ تيىمدىلىگىنە، جەردى ءتيىمدى پايدالانۋعا، ينفراقۇرىلىمدى دامىتۋعا جانە جاڭا ينۆەستورلاردى تارتۋعا باستى نازار اۋدارىلدى.
بۇگىندە الماتىنىڭ يندۋستريالىق ايماعىندا 557،6 ملرد تەڭگەگە 118 جوبا جۇزەگە اسىرىلۋدا، 15 مىڭنان استام جۇمىس ورنى قۇرىلدى. 2016 جىلدان بەرى قۇنى 142،1 ملرد تەڭگە بولاتىن 41 نىسان پايدالانۋعا بەرىلدى. 2025 جىلى ينۆەستيسيا كولەمى 224،9 ملرد تەڭگە بولاتىن تاعى 14 ءوندىرىستى ىسكە قوسۋ جوسپارلانعان.
كەڭەستە اكىم كاسىپورىنداردى ىسكە قوسۋ عانا ەمەس، ولاردىڭ ناقتى ەكونوميكالىق تيىمدىلىگىن قامتاماسىز ەتۋ قاجەت ەكەنىن اتاپ ءوتتى:
«جۇمىس ورىندارى، سالىق تۇسىمدەرى، ونىمگە دەگەن سۇرانىس سىندى بىزگە ناقتى ناتيجە ماڭىزدى. الماتى بوس تۇرعان ءوندىرىس ورىندارىنا ەمەس، كەرىسىنشە ءوسۋ نۇكتەسىنە اينالۋعا ءتيىس»، - دەدى دارحان ساتىبالدى.
كەڭەس قورىتىندىسى بويىنشا اكىم قالالىق كاسىپكەرلىك باسقارماسى مەن ايا باسشىلىعىنا ينۆەستيسيا كولەمىن ۇلعايتۋ، جوبالاردىڭ تيىمدىلىگىن باقىلاۋدى كۇشەيتۋ، سونداي-اق شاعىن ونەركاسىپ پاركتەرىنىڭ جۇمىسىن جانداندىرۋ جونىندە شارالار قابىلداۋدى تاپسىردى.
يندۋستريالىق ايماقتىڭ ەكىنشى كەزەگىن تالقىلاۋ ماڭىزدى تاقىرىپقا اينالدى. كاسىپكەرلىك جانە ينۆەستيسيالار باسقارماسىنىڭ باسشىسى الىشەر ساتىبالدييەۆ تەمىرجول ينفراقۇرىلىمىنىڭ جاي-كۇيى مەن دامۋ كەلەشەگى تۋرالى باياندادى. بۇگىندە اتالعان ايماققا ينۆەستيسيا سالۋعا مۇددەلى 9 كومپانيانىڭ ءوتىنىمى كونكۋرستىق نەگىزدە قاراستىرىلىپ جاتىر.
«يندۋستريالىق ايماقتىڭ ەكىنشى كەزەڭىن ىسكە قوسۋ بويىنشا مەرزىمى، بيۋدجەتى جانە وعان جاۋاپتى جاندار كورسەتىلگەن ناقتى جول كارتاسى قاجەت. بۇل ءىستى كەيىنگە قالدىرۋعا حاقىمىز جوق»، - دەدى الماتى اكىمى.
ەلەكتر قۋاتى ءتاريفىن تومەندەتۋ، تەمىرجول ينفراقۇرىلىمىنىڭ ءوزىن-وزى وتەۋ جولدارى سىندى ناقتى ۇسىنىستار دا نازاردان تىس قالمادى. اكىم يندۋستريالىق كلاستەر كاسىپورىندارىنا ارنالعان تومەندەتىلگەن تاريفتەر تۋرالى باستامالاردىڭ بۇعان دەيىن دە كوتەرىلگەنىن ەسكە سالدى.
ەلەكتر ەنەرگياسى ءتاريفىن تومەندەتۋ، تەمىرجول ينفراقۇرىلىمىنىڭ ءوزىن-وزى اقتاۋ جولدارى سىندى ناقتى ۇسىنىستار دا نازاردان تىس قالمادى. اكىم يندۋستريالىق كلاستەر كاسىپورىندارىنا ارنالعان تومەندەتىلگەن تاريفتەر تۋرالى باستامالاردىڭ بۇعان دەيىن دە كوتەرىلگەنىن ەسكە سالدى.
جەر ماسەلەسى دە كەڭەستە كەڭىنەن تالقىلاندى. دارحان ساتىبالدى اۋدان اكىمدىكتەرى مەن ءتيىستى باسقارمالارعا جاڭا ءوندىرىس ورىندارىن ورنالاستىرۋ ءۇشىن قوسىمشا جەر تەلىمدەرىن ىزدەستىرۋ جۇمىسىن جەدەلدەتۋدى تاپسىردى.
«الماتىدا بارلىق قاجەتتى رەسۋرس بار: دامىعان ينفراقۇرىلىم، بىلىكتى ماماندار، قارجى كوزدەرىنە قولجەتىمدىلىك جانە تولەم قابىلەتى جوعارى نارىق. ءبىز بۇل الەۋەتتى تولىق پايدالانۋىمىز كەرەك»، - دەدى دارحان ساتىبالدى.
اكىم يندۋستريالىق ايماقتىڭ كوگالداندىرۋ جۇمىستارىنا ايرىقشا نازار اۋداردى. جاپىراقتى اعاشتاردى وتىرعىزۋعا باسىمدىق بەرە وتىرىپ، جاسىل جەلەك قالىپتاستىرۋ جانە ولاردىڭ كۇتىمىن جۇيەلەۋ تاپسىرىلدى.
«ەگەر ءبىز جاسىل ايماقتار جاسايتىن بولساق، وندا ولاردى كۇتىپ ۇستاۋ دا تالاپقا ساي بولۋى كەرەك. بۇل ايا-نىڭ ءاربىر قاتىسۋشىسى ءۇشىن قالىپتى جاعدايعا اينالۋعا ءتيىس»، - دەپ ءسوزىن تۇيىندەدى الماتى اكىمى.
بۇعان قوسا، قالا باسشىسى جاڭا يننوۆاسيالىق كومپانيالاردى تارتۋدى جانە الماتىنىڭ يندۋستريالىق ايماعى بازاسىندا حالىقارالىق دەڭگەيدەگى تەحنوپارك تۇجىرىمداماسىن ازىرلەۋدى ستراتەگيالىق باعىتتاردىڭ ءبىرى دەپ اتادى.
سونداي-اق، يندۋستريالىق ايماق اۋماعىندا جاڭا جوبالاردى ىرىكتەۋدە قوسىمشا قۇنى جوعارى، زاماناۋي تەحنولوگيا قولداناتىن جانە ەكسپورتتىق الەۋەتى بار وندىرىستەرگە باسىمدىق بەرىلەتىنىن ايتتى.