الماتى اكىمى دارحان ساتىبالدى قالاداعى ەڭ ءىرى سپورت نىساندارىنىڭ ءبىرى جاڭا «الاتاۋ» تەننيس ورتالىعىنىڭ اشىلۋ راسىمىنە قاتىستى، - دەپ حابارلايدى اqshamnews.kz ءتىلشىسى.
بۇل ورتالىق بۇقارالىق جانە كاسىبي تەننيستىڭ دامۋىنا سەرپىن بەرەتىن ماڭىزدى سپورت الاڭى بولماق. جوبا قالا اكىمدىگىنىڭ جانە قازاقستان تەننيس فەدەراسياسىنىڭ قولداۋىمەن جۇزەگە اسىرىلدى. بۇل جۇمىس 2018 جىلى باستالعان بولاتىن، ال ونىڭ اياقتالۋى قالانىڭ سپورت ينفراقۇرىلىمى ءۇشىن ماڭىزدى وقيعاعا اينالدى.
ءىس-شاراعا قازاقستان تەننيس فەدەراسياسىنىڭ پرەزيدەنتى بولات وتەمۇراتوۆ، سونداي-اق ATP 250 Almaty Open حالىقارالىق تۋرنيرىنە قاتىسىپ جاتقان دانييل مەدۆەديەۆ، كارەن حاچانوۆ، الەكساندر شيەۆچەنكو، بەيبىت جۇقايەۆ جانە فلاۆيو كوبوللي سىندى كاسىبي تەننيسشىلەر قاتىستى. سپورتشىلار بالالارعا ارنالعان شەبەرلىك ءدارىسىن وتكىزىپ، جاڭا ورتالىق اۋماعىنا اعاشتار وتىرعىزدى.
دارحان ساتىبالدى الماتى ءۇشىن بۇل ورتالىقتىڭ اشىلۋى وتە ماڭىزدى ەكەنىن اتادى:
"جاڭا تەننيس ورتالىعى قالامىزدىڭ قارقىندى دامىپ كەلە جاتقان اۋدانىندا بوي كوتەرىپ، ماڭىزدى سپورت ينفراقۇرىلىمىنىڭ ءبىر بولىگىنە اينالدى. بۇل نىسان جاس سپورتشىلاردى دايارلاۋعا، سونداي-اق ۇلتتىق جانە حالىقارالىق دەڭگەيدەگى جارىستار وتكىزۋگە مۇمكىندىك بەرەدى. مۇنداي جوبالار الماتىنىڭ الەمدىك سپورت كارتاسىنداعى بەدەلىن ارتتىرىپ، قالانىڭ ءارى قاراي دامۋىنا سەرپىن بەرەدى"، — دەدى قالا اكىمى.
زاماناۋي ورتالىق حالىق تىعىز ورنالاسقان الاتاۋ اۋدانىندا ورنالاسقان، حالىقارالىق ستاندارتتارعا ساي كەلەدى. مۇندا كاسىبي سپورتشىلار مەن اۋەسقويلار ءۇشىن قولايلى جاعداي جاسالعان: بىلىكتى جاتتىقتىرۋشىلار قىزمەت ەتەدى، ءتۇرلى دەڭگەيدەگى تۋرنيرلەر وتكىزۋگە مۇمكىندىك بار.
جالپى اۋماعى 5 مىڭ شارشى مەتردەن اساتىن ورتالىقتا 14 تەننيس كورتى بار: ونىڭ تورتەۋى جابىق، تورتەۋى «حارد» جابىنىمەن اشىق، ال قالعان التاۋى توپىراق جابىنى بار الاڭدار. سونىمەن قاتار، جاتتىعۋ زالى، مەديسينالىق كابينەت، كونفەرەنس-زال جانە اكىمشىلىك بلوك قاراستىرىلعان.
سىرتقى كورتتاردا 150 ورىندىق، ال جابىق الاڭداردا 100 ورىندىق كورەرمەن تريبۋنالارى ورناتىلعان. سپورت نىساندا كۇنىنە 500 ادامعا دەيىن جاتتىعا الادى. مۇندا ينكليۋزيۆتى تەننيستى دامىتۋعا جانە كوپبالالى ءارى الەۋمەتتىك تۇرعىدان از قامتىلعان وتباسىلاردان شىققان بالالارعا ارنالعان تەگىن جانە جەڭىلدەتىلگەن جاتتىعۋلار ۇيىمداستىرۋعا ەرەكشە كوڭىل بولىنگەن.