الماتى اكىمى دارحان ساتىبالدى TAV Airports كومپانياسىنىڭ باسقارما ءتوراعاسى سەركان كاپتانمەن جۇمىس كەزدەسۋىن وتكىزدى. كەزدەسۋ بارىسىندا الماتى حالىقارالىق اۋەجايىن جاڭعىرتۋعا قاتىستى نەگىزگى تۇيتكىلدەر تالقىلاندى.
بۇگىندە الماتى حالىقارالىق اۋەجايى جىلىنا 11 ميلليوننان استام جولاۋشىعا قىزمەت كورسەتىپ، قازاقستانداعى اۋە تاسىمالىنىڭ 70 پايىزىنان استامىن قامتاماسىز ەتىپ وتىر. تاراپتار ىشكى تەرمينالدى قايتا جاڭارتۋ، ۇشۋ-قونۋ جولاعىن جاڭعىرتۋ، ينجەنەرلىك جانە جەرۇستى ينفراقۇرىلىمدى جاڭارتۋ جوسپارىن قاراستىردى.
دارحان ساتىبالدى اۋەجايداعى اۆياسيالىق قىزمەتتەردىڭ ساپاسىن ارتتىرۋ، كولىك قولجەتىمدىلىگىن قامتاماسىز ەتۋ جانە حالىقارالىق ستاندارتتى ەنگىزۋ ماقساتىندا ينۆەستورلارمەن تىعىز جۇمىس جۇرگىزۋدىڭ ماڭىزدىلىعىنا توقتالدى.
ءوز كەزەگىندە سەركان كاپتان ينۆەستيسيالىق باستامالارعا قولداۋ كورسەتكەنى ءۇشىن العىس ءبىلدىرىپ، اۋەجايدىڭ 2050 جىلعا دەيىنگى دامۋ باس جوسپارىن ىسكە اسىرۋعا دايىن ەكەنىن راستادى.
كەزدەسۋ قورىتىندىسى بويىنشا الماتى اكىمى ينۆەستور ۇسىنعان ىشكى تەرمينالدىڭ ديزاين-جوباسىن جان-جاقتى قاراستىرۋدى، ونى قايتا جاڭعىرتۋ جۇمىستارىنا قولداۋ كورسەتۋدى، اۋەجايعا باراتىن جولداردىڭ ساپاسىن ارتتىرۋدى جانە بولاشاق مەتروپوليتەن جەلىسىن اۋەجاي كولىك جۇيەسىنە بىرىكتىرۋ جايىن پىسىقتاۋدى تاپسىردى.