بۇعان دەيىن باستاپقى تۇرعىن ءۇي نارىعىندا قولما-قول اقشانى پايدالانۋعا شەكتەۋ ەنگىزۋ جوسپارلانىپ وتىرعانى حابارلانعان – قۇرىلىس سالۋشىلار بارلىق مامىلەنى بانك ارقىلى جۇزەگە اسىرۋى كەرەك، دەپ حابارلايدى aqshamnews.kz
بۇل قازاقستاندا جوسپارلانعان جالعىز شەكتەۋ ەمەس ەكەنى بەلگىلى بولدى. "كرىشا" پورتالىنىڭ حابارلاۋىنشا، سەنات تۇرعىن ءۇي قۇرىلىسىنا ۇلەستىك قاتىسۋ ماسەلەلەرى تۋرالى زاڭ جوباسىن ماقۇلدادى. قۇجاتقا سايكەس قۇرىلىس كومپانيالارىنا كەلەسىدەي تىيىم سالىنادى:
اكىمدىكتىڭ رۇقساتىنسىز نەمەسە قازاقستاندىق تۇرعىن ءۇي كومپانياسىنىڭ (قجك) كەپىلدىگىنسىز اقشا تارتۋ – بۇرىن بۇل ماسەلەنى شەشەتىن جولدارى بولدى، ەندى ولارعا ايىپپۇل سالىنادى، ءتىپتى قۇرىلىس توقتاتىلادى؛
تۇرعىن ءۇيدى قولما-قول اقشاعا ساتۋ – قۇرىلىس سالۋشىدان پاتەر ساتىپ الۋ بويىنشا بارلىق تولەمدى تەك بانك ارقىلى قولما-قول اقشاسىز جاساۋ؛
ۇلەستىك قاتىسۋ شارتىن قوسپاعاندا، ساتىپ الۋشىلارمەن كەز كەلگەن مامىلە جاساسۋ. شارت قازرەەستردە تىركەلۋى كەرەك؛
رۇقساتسىز جارنامالاۋ – قۇرىلىس سالۋشى ۇلەسكەرلەردەن قاراجات تارتۋعا رۇقسات العاننان كەيىن عانا تۇرعىن ءۇي كەشەندەرىن جارنامالاۋعا بولادى.
قازىرگى ۋاقىتتا بۇزۋشىلىقتار ءۇشىن ەڭ جوعارعى ايىپپۇل مولشەرى 300 ايلىق ەسەپتىك كورسەتكىشكە (اەك) تەڭ، ياعني 2025 جىلى 1 179 600 تەڭگە، ءبىراق كەيىن ونى 2 000 اەك، ياعني 7 864 000 تەڭگەگە دەيىن ارتتىرۋ جوسپارلانىپ وتىر.
سانكسيالاردان بولەك، زاڭ جوباسىندا قۇرىلىس كومپانيالارىنا كەيبىر جەڭىلدىكتەر دە قاراستىرىلعان. اتاپ ايتقاندا، قۇرىلىس سالۋشى ۇلەسكەرلەردىڭ اقشاسىن تارتا الۋى ءۇشىن ونىڭ قۇرىلىستا 5 جىل ەمەس، نەبارى 3 جىل تاجىريبەسى بولسا جانە وسى ۋاقىت ىشىندە كومپانيا اۋدانى 5 مىڭ ەمەس، 3 مىڭ شارشى مەتر بولاتىن تۇرعىن ءۇي سالسا جەتكىلىكتى.
ال ازاماتتارعا كەلەر بولساق، تۇزەتۋلەر كۇشىنە ەنگەننەن كەيىن بارلىق ۇلەستىك قاتىسۋ شارتى جازباشا جانە ەلەكتروندى تۇردە جاسالادى جانە ءبىرىڭعاي اقپاراتتىق جۇيەدە تىركەلۋگە ءتيىس. قازاقستاندىقتار بارلىق اقپاراتتى ۇلەستىك قاتىسۋشىلاردى قولداۋ ورتالىعىنان الا الادى.
تۇزەتۋلەر زاڭعا پرەزيدەنت قول قويىپ، رەسمي جاريالانعاننان كەيىن كۇشىنە ەنەدى.