قازاقستاندا بالانىڭ ۇلتىن ايقىنداۋدىڭ جاڭا ءتارتىبى ەنگىزىلەدى، دەپ حابارلايدى aqshamnews.kz
كونستيتۋسيالىق سوت بالانىڭ ۇلتىن ايقىنداۋدىڭ جاڭا ءتارتىبىن ەنگىزگەلى جاتقانىمەن، اركىم ءوز ۇلتىن تاڭدايتىنداي مۇمكىندىك بەرىلمەيتىنىن اتاپ وتەدى.
كونستيتۋسيالىق سوت ءتوراعاسى ەلۆيرا ءازىموۆانىڭ ايتۋىنشا، پارلامەنت دەپۋتاتتارى باستاماشى بولعان بىرنەشە زاڭ جوباسىنا كونستيتۋسيالىق سوتتىڭ قۇقىقتىق ۇستانىمدارى مەن قورىتىندىلارىنا بايلانىستى زاڭنامالىق ۇسىنىستار توپتاماسى ەنگىزىلگەن.
زاڭنامالىق كۇن تارتىبىندە مىناداي ماسەلەلەردى قاراۋدى ۇسىنامىز: قىلمىستىق-پروسەستىك كودەكسكە، «نەكە (ەرلى-زايىپتىلىق) جانە وتباسى تۋرالى» كودەكسكە جانە ونىمەن بايلانىستى وزگە دە زاڭ اكتىلەرىنە قۇقىقتىق ۇستانىمداردى ەسكەرە وتىرىپ وزگەرىستەر ەنگىزۋ ۇسىنىسى بار. وزگەرىستەر القابيلەردى سوت پروسەسىن كەزىندە اۋىستىرۋ تارتىبىنە، بالانىڭ ۇلتىن انىقتاۋ جانە اتاپ كورسەتۋگە، بالانى اسىراپ الۋ ينستيتۋتىن جەتىلدىرۋگە، اليمەنت تولەۋ مىندەتتەمەلەرىن ورىنداۋعا قاتىستى، – دەدى ءازىموۆا پارلامەنت پالاتالارىنىڭ بىرلەسكەن وتىرىسىندا.
بالانىڭ ۇلتىن انىقتاۋ ماسەلەسىندە كەز كەلگەن ۇلتتى ەركىن تاڭداۋ قۇقىعى بەرىلمەيدى. الايدا ۇلتى تەك اتا-اناسىنىڭ ۇلتىنا قاراپ قانا ەمەس، باسقا جاعدايلار بويىنشا دا كورسەتىلۋى مۇمكىن بولادى. ماسەلەن، بالا جەتىم بولسا نەمەسە اتا-اناسىنىڭ قۇجاتتارى جوعالعان جاعدايلار ەسكەرىلەدى. قولدانىستاعى زاڭدا مۇنداي جايتتار ەسكەرىلمەگەن.
بۇعان دەيىن قازاقستاندا بالانىڭ ۇلتىن اتا-اناسىنا قاراماي ايقىنداۋعا رۇقسات ەتىلگەلى جاتقانى حابارلانعان ەدى. كونستيتۋسيالىق سوت كامەلەتكە تولماعان بالانىڭ اتا-اناسى تۋرالى ەشقانداي مالىمەت بولماسا، ونىڭ ۇلتىن ايقىنداۋعا رۇقسات بەرەتىنىن سوتتىڭ باسپا ءسوز قىزمەتى حابارلاعان.
جۋىردا كونستيتۋسيالىق سوتقا قامقورلىعىنداعى بالانىڭ ۇلتىن رەسمي تۇردە كورسەتكىسى كەلگەن ازامات جۇگىنگەن. بالانىڭ اتا-اناسى تۋرالى ەشقانداي مالىمەت بولماعاندىقتان، احات بالانىڭ قۇجاتتارىنا ۇلتىن جازۋدان باس تارتقان. سوتتار دا نەكە جانە وتباسى تۋرالى كودەكستىڭ 65-بابىنا سىلتەمە جاساي وتىرىپ، ەگەر اتا-اناسىنىڭ ۇلتى ايقىندالماسا، بالانىڭ ۇلتىن انىقتاۋ مۇمكىن ەمەس دەگەن شەشىم شىعارعان. كونستيتۋسيالىق سوت نورما مۇنداي جاعدايلاردى قاراستىرمايتىنىن جانە ءوزىن-وزى سايكەستەندىرۋ قۇقىعىن بۇزاتىنىن مويىنداعان ەدى.