اقتاۋدا قوعامدىق اجەتحانادا لاس ەدەندە ۇيىقتاپ جاتقان بالالاردىڭ سۋرەتى جاريالانعاننان كەيىن، اكىمدىك وكىلدەرى وتباسىنا بارىپ تەكسەرىس جۇرگىزدى. بالالاردىڭ اناسى جاعدايدى جاقسارتپاسا، ولاردى مەملەكەت قاراۋىنا الۋ ماسەلەسى قارالۋى مۇمكىن، - دەپ حابارلايدى اqshamnews.kz.
اقتاۋ اكىمدىگىنىڭ باسپا ءسوز قىزمەتى 4 تامىزدا ماماندار وقيعا ورنىنا بارىپ، سۋرەتتەگى وتباسىنىڭ كەيىنگى بىرنەشە جىل بويى مەملەكەتتىك الەۋمەتتىك باعدارلامالار اياسىندا كومەك الىپ كەلە جاتقانىن انىقتاعان.
"بالالاردىڭ اناسى - جالعىزباستى. بۇعان دەيىن ول جەتىم رەتىندە كەزەكپەن تۇرعىن ءۇي العان. وتباسى اتاۋلى الەۋمەتتىك كومەك تە الىپ وتىر. بالالاردىڭ اجەسى ءدال وسى قوعامدىق اجەتحانادا كاسسير بولىپ رەسمي جۇمىس ىستەيدى. اناسى بىرنەشە كۇن بۇرىن بالالاردى اجەسىنە قالدىرىپ كەتكەنى بەلگىلى بولدى"، – دەدى اكىمدىك وكىلدەرى.
ماماندار بالالاردىڭ اناسى تىركەۋدە تۇرعان ۇيگە دە بارعان. وندا انتيسانيتاريا، ەسىكتەر سىنعان. تەكسەرۋ كەزىندە بالالار اپكەسىنىڭ ۇيىندە بولعان. ايتا كەتەيىك، اپكەسى دە جەتىم رەتىندە مەملەكەتتىك باعدارلاما ارقىلى باسپانا العان.
"قامقورشىلىق جانە قورعانشىلىق ورگاندارى وتباسىعا تەكسەرۋ جۇرگىزىپ، ءتۇسىندىرۋ جۇمىستارىن وتكىزدى. بالالاردىڭ اناسى رەسمي تۇردە بالالاردىڭ كۇتىمى مەن تارتىبىنە جاۋاپكەرشىلىك الۋعا دايىن ەكەنىن مالىمدەدى. ءقازىر بالالار اناسىنىڭ ۋاقىتشا باقىلاۋىندا، بۇل شەشىم اپتا اياعىنا دەيىن جارامدى"، – دەلىنگەن جەرگىلىكتى اتقارۋشى ورگاننىڭ حابارلاماسىندا.
ازىرگە بالالار اپكەسىنىڭ ۇيىندە. ال اناسىنا جاعدايدى ءبىر اپتا ىشىندە رەتتەۋ مىندەتتەلدى. ەگەر سول ۋاقىت ىشىندە ماسەلە شەشىلمەسە، بالالاردى الۋ ماسەلەسى قارالاتىن بولادى.
"مەملەكەت وتباسىعا بارلىق قاجەت كومەكتى كورسەتىپ وتىر: باسپانا بەرىلگەن، الەۋمەتتىك تولەمدەر تاعايىندالعان، نەگىزگى قىزمەتتەرگە قولجەتىمدىلىك قامتاماسىز ەتىلگەن. الايدا ۇسىنىلعان رەسۋرستارعا قاراماستان، بۇل وتباسى مۇشەلەرىنىڭ كەيبىرى ءالى دە قوعامعا جات ءومىر سالتىن ۇستانىپ كەلەدى، بۇل بالالاردىڭ ءال-اۋقاتىنا تەرىس اسەر ەتىپ وتىر"، – دەپ قورىتىندىلادى اكىمدىك.
ەسكە سالايىق، بۇعان دەيىن 15-شاعىناۋدانداعى جاعالاۋدا ورنالاسقان قوعامدىق اجەتحاناعا بارعان تۇرعىندار سۇمدىق كورىنىسكە كۋا بولعان: ەدەندە بالالار ۇيىقتاپ جاتقان، ال كاسسير ايەل ماس كۇيدە وتىرعان. بۇل جاعداي قوعامدا رەزونانس تۋعىزعاننان كەيىن تەكسەرىس باستالىپ، كاسسير جۇمىسىنان قۋىلدى.