استانا ءماسليحاتىنىڭ دەپۋتاتى ساۋلە ساميدين ەلوردادا وتكەن دجەننيفەر لوپەستىڭ كونسەرتى مەن ونىڭ ساحنالىق كيىمدەرىنە قاتىستى ءوز جازباسىنان كەيىن تۋىنداعان پىكىرتالاسقا پىكىر ءبىلدىردى، - دەپ حابارلايدى اqshamnews.kz.
الەۋمەتتىك جەلىلەردەگى رەاكسيا ءارتۇرلى بولدى: كوپشىلىك دەپۋتاتتىڭ ۇستانىمىن سىناپ، ودان گورى ماڭىزدى ماسەلەلەرگە كوڭىل بولۋگە شاقىردى. ساۋلە ساميدين قازاقستاندىقتاردىڭ بەلسەندىلىگىنە العىس ايتىپ، كونسترۋكتيۆ ديالوگقا اشىق ەكەنىن العا تارتتى.
"مۇنداي رەاكسياعا شىن جۇرەكتەن العىس ايتامىن. بۇل – اشىق ءارى كەز كەلگەن نارسەگە بەيجاي قارامايتىن قوعامدا ءومىر ءسۇرىپ جاتقانىمىزدىڭ بەلگىسى. ءتۇرلى پىكىر ايتىلدى – قولداعاندار دا، سىناعاندار دا بولدى. ونىڭ بارلىعى دا ماڭىزدى. ءبىراق مەنىڭ جازبام تەك ساحنالىق وبرازدارعا ەمەس، ەلىمىزدە وسىنداي شارالاردىڭ وتكىزۋ ماڭىزدىلىعىنا دا قاتىستى ەكەنىن ايتقىم كەلەدى"، – دەدى ول Tengri Life-عا بەرگەن سۇحباتىندا.
دەپۋتاتتىڭ ايتۋىنشا، بۇل ەشكىمدى سىناۋعا باعىتتالعان جازبا ەمەس، ول جەكە تۇلعا جانە انا رەتىندە كوزقاراسىن بىلدىرگەن.
"بۇل مەنىڭ شىنايى، ادام ءارى انا رەتىندە رەاكسيام ەدى. قىزىم نەبارى 16 جاستا. كونسەرتتەن كەيىن: “اناشىم، دجەي لونىڭ دۋبايداعى كيىمدەرى مۇلدە باسقا، جابىقتاۋ بولدى عوي” دەدى. انا رەتىندە مەن بۇعان بەيجاي قاراي المادىم"، – دەپ ءتۇسىندىردى ول.
ساميدين مادەنيەتكە لايىقتاۋ ماسەلەسىن كوتەرگەنىن ايتتى.
"مەن دجەننيفەر لوپەستى مىقتى ايەل، الەمگە تانىمال ءارتىس رەتىندە قۇرمەتتەيمىن. ول – شابىت سىيلايتىن تۇلعا. ءبىراق مەنىڭ پىكىرىم سىن ەمەس، ەلىمىزدىڭ كونتەكسىندەگى مادەني جاراسىمدىلىق جايلى وي ەدى. ءبىز مادەنيەت، تۋريزم، كرەاتيۆ ەكونوميكا تۋرالى ايتىپ وتىرمىز، مۇندايدا شىعارماشىلىق ەركىندىك پەن جەرگىلىكتى نورمالار اراسىنداعى تەپە-تەڭدىك ماڭىزدى"، – دەدى دەپۋتات.
ونىڭ پىكىرىنشە، حالىقارالىق ساحنادا ونەر كورسەتەتىن ارتىستەر جەرگىلىكتى مادەني ەرەكشەلىكتەردى ەسكەرۋ كەرەك.
"بۇل سەنزۋرا ەمەس. بۇل – قۇرمەت. كونتەكستى ءتۇسىنۋ. اسىرەسە، كورەرمەننىڭ ىشىندە جاستار مەن وتباسى كوپ بولاتىن بۇقارالىق ءىس-شارالاردا بۇل وتە ماڭىزدى"، – دەپ قوستى ول.
ساميدين تەك ءىس-شارانىڭ فورماتىن ەمەس، ونىڭ قوعامعا اسەرىن دە تالقىلاۋ قاجەت دەپ ەسەپتەيدى.
"مۇنداي كونسەرتتەر بىزگە كەرەك. ءبىراق ەگەر ءبىز مادەني ورتالىققا اينالعىمىز كەلسە، ەتيكا جانە قالىپتاسىپ جاتقان ورتا تۋرالى دا ايتۋىمىز كەرەك"، – دەدى دەپۋتات.
ءسوز اياعىندا ساۋلە ساميدين ازاماتتاردىڭ جول جاعدايى، بالاباقشا تاپشىلىعى مەن ايەلدەردى قولداۋ ماسەلەلەرى جونىندەگى ەسكەرتۋلەرى نازاردان تىس قالماعانىن ايتتى.
"مەن ايەلدەر قاۋىپسىزدىگى، بالالار مەكەمەلەرىنىڭ قولجەتىمدىلىگى، مەديسينا مەن قالالىق ينفراقۇرىلىمنىڭ جاي-كۇيى تۋرالى ماسەلەلەردى ۇنەمى كوتەرىپ كەلەمىن. سونىمەن قاتار، ءىرى ءىس-شارالار تەك مادەني قۇندىلىق اكەلىپ قويماي، ينفراقۇرىلىمدى دامىتىپ، بيزنەستى جانداندىرىپ، جۇمىس ورىندارىن اشۋىنا ىقپال ەتۋگە ءتيىس دەپ ەسەپتەيمىن. مەن ءاردايىم ديالوگقا اشىقپىن جانە ازاماتتار تاراپىنان كەلەتىن سىني ۇسىنىستاردى قۇپتايمىن"، – دەدى ول.
ەسكە سالا كەتەيىك، بۇعان دەيىن استانا ءماسليحاتىنىڭ دەپۋتاتى ساۋلە ساميدين اقش ءانشىسى دجەننيفەر لوپەستىڭ ساحنالىق كيىمدەرىنە قاتىستى پىكىر ءبىلدىرىپ، قازاقستاندىقتاردىڭ نازارىن اۋدارعان بولاتىن. جەلىدە جاريالانعان جازبادان كەيىن قوعامدا پىكىرتالاس تۋىندادى. كوپشىلىك دەپۋتاتتى حالىقتىڭ كۇندەلىكتى ماسەلەلەرىمەن اينالىسپاي، ءانشىنىڭ كيىمىنە نازار اۋدارعانى ءۇشىن سىناعان ەدى.