جەز تاقتايشالاردىڭ ءارقايسىسىنىڭ قۇنى 80 000 تەڭگە.
الماتى پوليسەيلەرى تولەبايەۆ كوشەسىندەگى ۆيكتور سويعا ارنالعان مەموريالدىق كەشەنگە زاقىم كەلتىرگەن ۆاندالدى انىقتادى، دەپ حابارلايدى Almaty-akshamy.kz
الماتىنىڭ ورتالىق اۋدانىنىڭ تۇرعىندارى تولەبايەۆ كوشەسىنىڭ بويىنداعى اللەياداعى ۆانداليزمگە شاعىمداندى. بيىل سول اۋداننىڭ تۇرعىندارى ۆيكتور سوي ەسكەرتكىشىنىڭ ارتىنداعى اللەيانى قايتا قالپىنا كەلتىرىپ، ءانشىنىڭ شىعارمالارىنان الىنعان ۇزىندىلەر جازىلعان ەكەرتكىش تاقتاشالار قويعان. تۇرعىنداردىڭ ايتۋىنشا، جەزدەن جاسالعان تاقتايشالار ارنايى تاپسىرىسپەن جاسالىپ، ءارقايسىسىنىڭ قۇنى 80 000 تەڭگەدەن تۇرادى.
28 قازاندا بەلگىسىز قارت ادام مەتالل زاتپەن تاقتايشالاردى ادەيى سىزعان. التى تاقتايشا زاقىمدانعان.
«ساۋلەتتىك انسامبل قالانىڭ تۋريستىك ينفراقۇرىلىمى ءۇشىن ۇلكەن ماڭىزعا يە، سەبەبى ول نەگىزگى كورىكتى جەرلەر تىزىمىنە ەنگەن. وكىنىشكە وراي، بۇزاقىلىق سالدارىنان بۇلىنگەن بەلگىلەردى قالپىنا كەلتىرۋ مۇمكىن ەمەس»، - دەپ جازىلعان جەرگىلىكتى بەلسەندىنىڭ پاراقشاسىندا.
بەينەجازبا جاريالانىپ، تۇرعىندار ارىز جازعاننان كەيىن الماتى پوليسياسى جاعدايعا بايلانىستى جاۋاپ بەردى. تاقتايشالاردى بۇلدىرگەن ەر ادام انىقتالىپ، ۇستالدى.
«مەدەۋ اۋداندىق پوليسيا ءبولىمىنىڭ قىزمەتكەرلەرى 1952 جىلى تۋعان ەر ادامدى ۇستادى، ول جاساعان ارەكەتىن مويىنداپ، وكىنىپ، بۇلىنگەن تاقتايشانى قالپىنا كەلتىرۋگە مىندەتتەلدى. ونىڭ ارەكەتى ق ر قك 434 (ۇساق بۇزاقىلىق) جانە 505-باپتارى بويىنشا ساراپتالعان. ءىستىڭ ماتەريالدارى سوتقا جولدانادى»، - دەدى پوليسەيلەر.