دارىگەرلەر ەكپە الىپ، قالىپتى ومىرگە ورالۋ كەرەكتىگىن ايتىپ جاتىر.
كوپتەگەن دامعان ەلدەردە ەكپە الۋ قارتىنى ارتىپ كەلەدى. رەسەي فەدەراسيانىڭ 14 ايماعىندا ءبىرىنشى ۆاكسينانى العان ازاماتتاردىڭ سانى 70% جەتكەن، دەپ حابارلايدى Almaty-akshamy.kz.
رەسەي
روسپوترەبنادزوردىڭ ايتۋىنشا، فەدەراسيانىڭ 14 ايماعىندا ءبىرىنشى ۆاكسينانى العان ازاماتتاردىڭ سانى 70% جەتتى. كەيبىر وڭىرلەردە ءىرى تۇرعىن ءۇي كەشەندەرىنىڭ اۋلاسىندا ۆاكسينا كولىكتەرىندە كوشپەلى ەگۋ پۋنكتتەرى ۇيىمداستىرىلعان. تۇرعىنداردىڭ ءبىراز بولىگىن ۆاكسينالاۋمەن قامتۋ ءۇشىن كەشكىلىك ۋاقىتتا جۇمىستان قايتاتىن ادامداردى ەكپەدەن تىس قالدىرماۋ ماقساتىندا دارىگەرلەر سول ۋاقىتتا اۋلادا ەكپە ەگۋ بويىنشا قىزمەت كورسەتۋدى باستايدى. ادامدار مۇنداي ءادىستىڭ وزدەرى ءۇشىن وتە ىڭعايلى ەكەندىگىن ايتىپ، بەلسەندىلىك تانىتۋدا.
اقش
Moderna پرەپاراتىن وندىرەتىن اقش فارماسيەۆتيكالىق كومپانياسى وزدەرى ازىرلەگەن ۆاكسينانىڭ تيىمدىلىگى ەكىنشى دوزانى ەنگىزگەننەن كەيىن التى اي ىشىندە 93% دەڭگەيىندە ساقتالاتىنىن حابارلادى. بۇل اتالمىش كومپانيا جۇرگىزگەن العاشقى كلينيكالىق زەرتتەۋلەردىڭ ناتيجەسىنەن ايتارلىقتاي تومەن ەمەس. باستاپقىدا ەپيدەميولوگيالىق تيىمدىلىك 94% دەڭگەيىندە بولدى.
Pfizer جانە BioNTech رەسمي تۇردە پرەپاراتتاردىڭ تيىمدىلىگى ەكىنشى ۆاكسيناسيادان كەيىنگى التى ايدا 84%-عا دەيىن تومەندەيتىنىن رەسمي مالىمدەدى.
جۇڭگو
جۇڭگو كوروناۆيرۋسقا قارسى ۆاكسينالار ءوندىرىسىن ۇلعايتۋدا جانە الەم ەلدەرىنە يممۋنداۋعا ارنالعان پرەپاراتتىڭ 2 ميلليارد دوزاسىن جەتكىزەدى. اتالعان كولەمدەگى ەكپەلەردى جۇڭگو وسى جىلدىڭ ىشىندە ۇسىنۋعا نيەتتى. بۇل تۋرالى قحر ءتوراعاسى سي سزينپين COVID-19 ۆاكسينالارى سالاسىنداعى ىنتىماقتاستىق جونىندەگى حالىقارالىق فورۋمدا ايتتى. قحر باسشىسى دۇنيەجۇزىلىك دەنساۋلىق ساقتاۋ ۇيىمىنىڭ بىرلەسكەن ساتىپ الۋ جانە COVAX جوباسى اياسىندا ۆاكسينانى تاراتۋ بويىنشا جاھاندىق جوباسىنا 100 ميلليون دوللار جىبەرۋ جوسپارلارى تۋرالى دا حابارلادى.