قالاداعى جاعداي ۋشىعىپ تۇر، تاۋلىگىنە 1500-دەن استام جاعداي تىركەلۋدە.
قوعامدىق دەنساۋلىق باسقارماسىنىڭ باسشىسى ناريمان تابىنبايەۆ وڭىرلىك كوممۋنيكاسيالار قىزمەتىندە وتكەن بريفينگتە الماتىدا كوروناۆيرۋستىق ينفەكسياسىن جۇقتىرعان ناۋقاستاردى اۋرۋحاناعا جاتقىزۋ جانە ۆاكسينالاۋ جاعدايى تۋرالى ايتتى، دەپ حابارلايدى Almaty-akhamy.kz
سپيكەردىڭ ايتۋىنشا، قالاداعى جاعداي ۋشىعىپ تۇر، تاۋلىگىنە 1500-دەن استام جاعداي تىركەلۋدە، سايكەسىنشە اۋرۋحاناعا جاتقىزۋ سانى دا ارتۋدا.
«دەلتا» شتامىنىڭ ەرەكشەلىگى – ونىڭ تەز جۇعاتىندىعىندا جانە ناۋقاستىڭ جاعدايىنىڭ تەز ناشارلاپ، كوبىنەسە ناۋقاستىڭ اۋرۋحاناعا تۇسۋىندە. تاعى ءبىر ەرەكشەلىك – بۇل جاستارعا تەز جۇعادى. بۇگىندە قالالىق ستاسيونارلارداعى 40 جاسقا دەيىنگى جاستار 23%-دى قۇرايدى. سونىمەن قاتار، 200-دەن استام بالا اۋرۋحاناعا جاتقىزىلدى»، - دەپ اتاپ ءوتتى ناريمان تابىنبايەۆ.
ول ءۇي كارانتينىندە 10 888 ناۋقاستىڭ جاتقانىن، ولاردىڭ 1600ء-ى 14 جاسقا دەيىنگى بالالار ەكەنىن ايتتى. ستاسيونارلاردا 5 156 ادام ەم الۋدا. قازىرگى كەزدە ستاسيونارلاردىڭ جۇكتەمەسى شامامەن 67%-دى قۇرايدى. اسا اۋىر جايداعى ناۋقاستار سانى - 190 ادام، اۋىر جاعدايدا - 1 368 ادام، رەانيماسيادا جاتقاندار – 385 ادام .
«وزدەرىڭىز بىلەسىزدەر، الماتى ستاسيونارلارى 3 ەشەلونعا بولىنگەن. بىرىنشىسىندە 3 950 توسەك-ورىن، ەكىنشىسىندە 1995، ۇشىنشىسىندە – 1100 توسەك-ورىن بار. ەگەر قاڭتار مەن اقپاندا ورتا ەسەپپەن 30-40 ناۋقاس اۋرۋحاناعا جاتقىزىلسا، ءقازىر 700 ادام قابىلدانۋدا، بۇل 23 ەسەگە كوپ. مۇنىڭ بارلىعى سالىستىرمالى تۇردە جاعدايدىڭ ۋشىعىپ تۇرعانىن كورسەتەدى، ناۋقاستار اۋرۋحاناعا جاپپاي جاتقىزىلۋدا. ەگەر بۇرىن جۋرناليستەر "نەگە اۋرۋحانالار جارتىلاي بوس تۇر؟" دەپ سۇراق قويسا، ءقازىر ولار ۇنەمى "نەگە ورىندار جەتىسپەيدى؟" دەپ سۇرايدى»، - دەدى الماتى قدب باسشىسى.
ناريمان تابىنبايەۆتىڭ ايتۋىنشا، مۇنىڭ ءبارى قالانىڭ ەمدەۋ مەكەمەلەرىنىڭ ينفراقۇرىلىمىنا، مەديسينا قىزمەتكەرلەرىنە ۇلكەن جۇكتەمە تۇسىرەدى. كۆي-مەن اۋىراتىن ناۋقاستاردى ەمدەۋگە كوپ قاراجات بولىنەدى – دارى-دارمەكتەرگە، ستاسيونارلىق كۇتىمگە، پتر-تەستىلەرگە جانە ءارتۇرلى تەكسەرۋلەرگە. كەيدە مۇنىڭ ءبارى جەدەل جاردەمنىڭ كەشىگۋىنە اكەلۋى مۇمكىن. كۇن سايىن جەدەل جاردەمدى كۆي-مەن اۋىراتىن ناۋقاستاردىڭ شامامەن 35%-ى شاقىرادى. اۋرۋحانالاردىڭ «قاربالاس كەزى» - ساعات 12-دەن 14-كە دەيىن جانە ساعات 20-دان 22-گە دەيىنگى ارالىقتا 130 پاسيەنت جەتكىزىلەدى.
«كوروناۆيرۋسپەن كۇرەستىڭ باستى ءتاسىلى ۆاكسينالاۋ بولىپ قالا بەرەدى. قالادا 755 مىڭ ازاماتقا ءبىرىنشى كومپونەنت سالىندى، بۇل جوسپارلانعان كولەمنىڭ 60%-ىن قۇرايدى. ۆاكسينانىڭ ەكىنشى كومپونەنتىن 560 مىڭ الماتىلىق قابىلدادى. قالادا ۆاكسينالاردىڭ جەتكىلىكتى سانى بار ەكەنىن اتاپ وتكىم كەلەدى: سپۋتنيك-V 12 848 دوزا، قازاقستاندىق ۆاكسينانىڭ 1600 دوزاسى. كۇن سايىن 7-8 مىڭ قالا تۇرعىنىنا ءبىرىنشى كومپونەنتپەن، ال ەكىنشى كومپونەنتپەن 12-13 مىڭ ادامعا دەيىن ۆاكسينالانادى»، - دەدى ناريمان تابىنبايەۆ.
الماتىنىڭ قدب باسشىسى الماتىلىقتاردى قالاداعى جاپپاي ۆاكسينالاۋ ناۋقانىن قولداۋعا شاقىردى. ول ۆاكسينالانعان ادامداردىڭ كۆي جۇقتىرۋ ىقتيمالدىعى بىرنەشە ەسە از بولاتىنىن جانە ولار اۋرۋدى جەڭىلدەتەتىنىن اتاپ ءوتتى.