الماتىدا FaceID جۇيەسى ارقىلى «دامۋ بالا» باعدارلاماسى بويىنشا سەكسيالار مەن ۇيىرمەلەرگە قاتىسۋدى باقىلاۋ كۇشەيتىلەدى
قالا اكىمى ەربولات دوسايەۆ جەتكىزۋشىلەردىڭ جاۋاپكەرشىلىگىن ارتتىرۋ جونىندە كەڭەس وتكىزدى. بيىل شىعارماشىلىق جانە سپورتتىق مەملەكەتتىك تاپسىرىستى ىسكە اسىرۋعا شامامەن 16،5 ملرد تەڭگە ءبولىندى. ۇيىرمەلەر مەن سەكسيالارعا 72 633 بالا قاتىسىپ، قىزمەتتى 1038 جەتكىزۋشى كورسەتەدى.
- قىزمەت كورسەتۋ ساپاسىن تەكسەرۋ ماقساتىندا ارنايى مونيتورينگ توبى قۇرىلىپ، قۇرامىنا قوعامدىق كەڭەس مۇشەلەرى، ءماسليحات دەپۋتاتتارى، اۋدان اكىمدىكتەرىنىڭ وكىلدەرى جانە بەلسەندى ازاماتتار كىردى. مونيتورينگ بارىسىندا قالا اۋداندارىندا جۇمىس ىستەيتىن 52 جەتكىزۋشى تەكسەرىلدى.
سونىڭ ناتيجەسىندە مەكەنجايلاردىڭ ناقتى بولماۋى، بالالار سانىنىڭ سايكەس كەلمەۋى، قوسىمشا تولەمدەر الۋ، انتيسانيتاريا جانە ءورت قاۋىپسىزدىگى ەرەجەلەرىن ساقتاماۋ سياقتى بۇزۋشىلىقتار انىقتالدى.
مىندەتىنە سالعىرت قاراعان جەتكىزۋشىلەردىڭ ءىسى قۇقىق قورعاۋ ورگاندارىنا جانە پروكۋراتۋراعا جىبەرىلدى.
مونيتورينگ ناتيجەسىندە قايتالاناتىن بۇزۋشىلىقتاردى بولدىرماۋ ءۇشىن ءبىرقاتار شەشىم قابىلداندى. قاتىسۋدى باقىلاۋدى كۇشەيتۋ ءۇشىن FaceID جۇيەسى ەنگىزىلەدى. بۇل جۇيە بالانىڭ ءاربىر ساباققا قاتىسۋىن تىركەپ، تەك ناقتى كورسەتىلگەن قىزمەتكە عانا تولەم جۇرگىزۋگە مۇمكىندىك بەرەدى. DamuBala قوسىمشاسىندا كۇن، ۋاقىت جانە گەولوكاسيا تىركەلەدى. جۇيەنى ەنگىزۋ جانە ونىڭ جۇمىس ىستەۋ شىعىنى جىلدىڭ سوڭىنا دەيىن قالالىق بيۋدجەت ەسەبىنەن وتەلەدى. جەتكىزۋشىلەر اۋدان اكىمدىكتەرىمەن قوسىمشا كەلىسىمدەرگە قول قويادى.
سونىمەن قاتار، باعدارلامانى ودان ءارى جەتىلدىرۋ جانە كورسەتىلەتىن قىزمەتتىڭ ساپاسىن ارتتىرۋ ءۇشىن جاتتىقتىرۋشىلار مەن نۇسقاۋشىلاردىڭ بىلىكتىلىگىنە، عيماراتتاردىڭ ولشەمدەرى مەن جابدىقتالۋىنا، قاۋىپسىزدىك تەحنيكاسىنا قويىلاتىن تالاپتار ازىرلەنىپ، جەتكىزۋشىلەرمەن جاسالاتىن كەلىسىمدەرگە ەنگىزىلەدى. سونداي-اق، قالانىڭ 8 اۋدانىندا ءبىلىم بەرۋ قاجەتتىلىگىنە تالداۋ جۇرگىزىلىپ، سول نەگىزدە قىزمەت تۇرلەرىنە سۇرانىس قالىپتاستىرىلادى.
بۇرىن كورسەتىلگەن قىزمەتتەرگە تولەم جاساۋ ماسەلەسى كوتەرىلگەن بولاتىن. قالا اكىمىنىڭ تاپسىرماسىنا سايكەس، ورىندالعان جۇمىستار اكتىسى تەكسەرىلگەننەن كەيىن بارلىق جاۋاپتى جەتكىزۋشىگە جاقىن ارادا ءتيىستى تولەم جۇرگىزىلەدى.