ەربولات دوسايەۆ سىبايلاس جەمقورلىققا قارسى ءىس-قيمىل ماسەلەلەرى جونىندەگى الماتى قالالىق كوميسسيانىڭ وتىرىسىن وتكىزدى، دەپ حابارلايدى almaty-akshamy.kz
الماتى اكىمى ەربولات دوسايەۆتىڭ توراعالىعىمەن وتكەن كەڭەستە قالانىڭ سىبايلاس جەمقورلىققا قارسى قىزمەتىنىڭ باسشىسى ارمان راحيموۆ دەنساۋلىق ساقتاۋ جانە قۇرىلىس سالاسىنداعى سىبايلاس جەمقورلىق قۇقىق بۇزۋشىلىقتىڭ الدىن الۋ ماسەلەلەرى قارالدى.
كەڭەستى اشقان الماتى اكىمى ەربولات دوسايەۆ مەملەكەت باسشىسىنىڭ تاپسىرماسىنا سايكەس سىبايلاس جەمقورلىقتىڭ الدىن الۋ جانە وعان قارسى ءىس-قيمىل شارالارىنا ەرەكشە كوڭىل بولىنەتىنىن اتادى. سىبايلاس جەمقورلىق تاۋەكەلدەرىن انىقتاۋ جونىندەگى بىرلەسكەن جۇمىستىڭ قورىتىندىسى بويىنشا قۇقىق بۇزۋشىلىقتار جاساۋعا ىقپال ەتەتىن سەبەپتەر مەن جاعدايلاردى جويۋ جونىندەگى جوسپار ازىرلەنىپ، ىسكە اسىرىلۋدا.
ارمان راحيموۆتىڭ مالىمەتىنشە، قابىلدانىپ جاتقان شارالار مەگاپوليستە سىبايلاس جەمقورلىق قىلمىسىن تومەندەتۋگە مۇمكىندىك بەردى. ماسەلەن، ەگەر 2019-2021 جىلدار ارالىعىندا قالانىڭ دەنساۋلىق ساقتاۋ سالاسىنداعى سىبايلاس جەمقورلىققا قارسى قىزمەتى 36 قىلمىستىق ءىستى تىركەسە، سوڭعى ەكى جىلدا بارلىعى 3 قىلمىستىق ءىس تىركەلگەن.
قالانىڭ سىبايلاس جەمقورلىققا قارسى قىزمەتىنىڭ باسشىسى 2023 جىلى قالانىڭ قوعامدىق دەنساۋلىق ساقتاۋ باسقارماسىنىڭ قىزمەتىن سىرتقى تالداۋ ناتيجەسىندە 18 سىبايلاس جەمقورلىق تاۋەكەلى انىقتالعانىن، 20 ۇسىنىس ەنگىزىلگەنىن حابارلادى. بۇعان قوسا، جەكە مەديسينالىق ۇيىمدارعا مەديسينالىق قىزمەتكە ليسەنزيا الۋ كەزىندەگى ىقتيمال بۇزۋشىلىقتار تۋرالى شاعىمدارعا بايلانىستى ولاردىڭ قىزمەتىنىڭ زاڭدىلىعىنا مونيتورينگ جۇرگىزۋ ۇسىنىلدى.
الماتى قالاسى قوعامدىق دەنساۋلىق ساقتاۋ باسقارماسىنىڭ باسشىسى يران شامەتەكوۆ بايانداعانداي، مەديسينالىق قىزمەت كورسەتۋ ساپاسىن ارتتىرۋ ءۇشىن ءمامس جۇيەسىندە جۇمىس ىستەيتىن 147 مەديسينالىق ۇيىم، ونىڭ ىشىندە 123 جەكە ۇيىم پرواكتيۆتى مونيتورينگپەن قامتىلعان.
قالا اكىمى قوعامدىق دەنساۋلىق ساقتاۋ باسقارماسىنا مەديسينالىق جانە فارماسيەۆتيكالىق باقىلاۋ كوميتەتىنىڭ الماتى بويىنشا دەپارتامەنتىمەن بىرلەسىپ، دەنساۋلىق ساقتاۋ مينيسترلىگىنە جەكە مەديسينالىق ۇيىمدار بويىنشا ۇسىنىستار ەنگىزۋدى تاپسىردى. ەربولات دوسايەۆ اتاپ وتكەندەي، بۇل جۇمىستىڭ باستى ماقساتى مەديسينالىق قىزمەتتىڭ ساپاسىن ارتتىرۋ جانە قالا تۇرعىندارىنىڭ وتىنىشىنە ۋاقىتىلى دەن قويۋ.
«قۇرىلىس سالاسىنداعى سىبايلاس جەمقورلىق تاۋەكەلدەرىن جويۋ جونىندەگى شارالار تۋرالى» كەڭەستىڭ ەكىنشى ماسەلەسى بويىنشا الماتى اكىمدىگى اپپاراتىنىڭ باسشىسى بەيبىت شاحانوۆتىڭ دەرەگىنشە، ساۋلەت ورگاندارى جۇمىسىنىڭ اشىقتىعىن قامتاماسىز ەتۋ جانە قازىرگى زامانعى IT شەشىمدەردى پايدالانۋ مەن لاۋازىمدى تۇلعالاردىڭ جۇمىسىن رەگلامەنتتەۋ ارقىلى وسى سالاداعى باقىلاۋدى كۇشەيتۋ جونىندە شارالار قابىلدانۋدا. سونداي-اق، اۋىل شارۋاشىلىعى مينيسترلىگىنە جەر قاتىناستارىن جەتىلدىرۋ جانە تەرىس ماقساتتا پايدالانۋ مۇمكىندىكتەرىن جويۋ بويىنشا ءبىرقاتار ۇسىنىس ەنگىزىلدى.
كەڭەستى قورىتىندىلاي كەلە، قالا اكىمى ەربولات دوسايەۆ اكىمدىكتىڭ جاۋاپتى بولىمشەلەرىنە وسى سالاداعى سىرتقى تالداۋ ناتيجەسى بويىنشا انىقتالعان سىبايلاس جەمقورلىق قۇقىق بۇزۋشىلىقتار جاساۋعا ىقپال ەتەتىن سەبەپتەر مەن جاعدايلاردى جويۋ بويىنشا ۇسىنىمداردىڭ ساپالى ورىندالۋىن قامتاماسىز ەتۋدى تاپسىردى.
«سىبايلاس جەمقورلىق تاۋەكەلدەرىن انىقتاۋ جانە جويۋ، سىبايلاس جەمقورلىققا قارسى مادەنيەتتى نىعايتۋ جانە سىبايلاس جەمقورلىقتىڭ الدىن الۋ ءاربىر باسشىنىڭ كۇندەلىكتى جۇمىسى بولۋعا ءتيىس. رەسمي جۇمىس ادىستەرىنەن باس تارتىپ، حالىقتىڭ نارازىلىعىن تۋدىراتىن جۇيەلى پروبلەمالىق ماسەلەلەردى شەشۋ جونىندە شارالار قابىلداۋ قاجەت»، - دەدى ەربولات دوسايەۆ.
قازىرگى ۋاقىتتا قالالىق سىبايلاس جەمقورلىققا قارسى ۆەدومستۆو مەن الماتى اكىمدىگى بارلىق سالادا سىبايلاس جەمقورلىققا قارسى ءىس-قيمىل بويىنشا بىرلەسكەن ءىس-قيمىلداردى ازىرلەپ، ىسكە اسىرىپ جاتىر.