ستەند اتۋدان قازاقستان قۇراماسى الماتىدا وتكەن رەيتينگتىك الەم كۋبوگىندا جالپى مەدالدىق ەسەپتە ءبىرىنشى ورىندا اياقتادى.
بۇل تۋرالى ق ر مادەنيەت جانە سپورت ءمينيسترى اسحات ورالوۆتىڭ Telegram كانالىندا جازدى، دەپ حابارلايدى Almaty-akshamy.kz.
«جارىستىڭ سوڭعى كۇنىندە مەرگەندەرىمىز ماريا دميتريەنكو مەن ۆيكتور حاسيانوۆ «تراپ / ميكس» ارالاس جاتتىعۋىندا التىن مەدال جەڭىپ الدى.
وسىلايشا، قازاقستان جالپى ەسەپتە ەكى التىن جانە ءبىر كۇمىس جۇلدەمەن ءبىرىنشى ورىندى يەلەندى. ەستەرىڭىزگە سالا كەتەيىن، بۇعان دەيىن «سكيت» جاتتىعۋىندا التىن مەدالدى اسەم ورىنباي جەڭىپ العان بولاتىن. سونداي-اق ول ەدۋارد ەششەنكومەن بىرگە ءبىزدىڭ قۇراماعا «سكيت / ميكس» جاتتىعۋىندا كۇمىس جۇلدە اكەلدى.
بۇل ۇلكەن جەتىستىك، وتانداستارىمىزدى جانە، سپورتشىلارىمىزدى جارقىن جەڭىسپەن قۇتتىقتايمىن. الماتىدا 40-تان استام ەلدەن 350 مەرگەن جارىستى، ءبىزدىڭ جىگىتتەر مەن قىزدار ۇزدىك اتاندى. قازاقستان قۇراماسى بيىك شىڭداردى باعىندىرۋدى جالعاستىرۋدا، مەن ولارعا بۇل ناتيجەمەن توقتاپ قالماي، جانكۇيەرلەردى جاڭا جەڭىستەرمەن قۋانتۋلارىن تىلەيمىن.
سونداي-اق قازاقستان سپورتتىق اتىس فەدەراسياسىنىڭ پرەزيدەنتى بەرىك اسىلوۆتى جەڭىسپەن قۇتتىقتاپ، الەم كۋبوگىن ۇيىمداستىرعانى ءۇشىن العىس ايتقىم كەلەدى»، - دەپ جازدى مينيستر.