2023 جىلعى 1 شىلدەدەن باستاپ الەۋمەتتىك كودەكس اياسىندا ءبىرىڭعاي جيناقتاۋشى زەينەتاقى قورىندا (بۇدان ءارى – بجزق) زەينەتاقى جيناقتارى بار ەڭبەك سىڭىرگەن جىلدارى بويىنشا زەينەتكەرلەرگە تۇرعىن ءۇي جاعدايلارىن جاقسارتۋعا نەمەسە ەمدەلۋگە اقى تولەۋگە وزدەرىنىڭ زەينەتاقى جيناقتارىنىڭ بارلىق سوماسىن پايدالانۋعا قۇقىق بەرىلەدى.
ق ر ەڭبەك جانە حالىقتى الەۋمەتتىك قورعاۋ مينيسترلىگى باسپا ءسوز قىزمەتىنىڭ حابارلاۋىنشا، وسى جىلدىڭ 1 شىلدەسىنەن باستاپ ەڭبەك سىڭىرگەن جىلدارى بويىنشا زەينەتكەرلەر www.enpf-otbasy.kz ينتەرنەت-پلاتفورماسى ارقىلى بجزق-دا جيناقتالعان قاراجاتتارىن تۇرعىن ءۇي جاعدايلارىن جاقسارتۋعا پايدالانۋ ءۇشىن ءبىرجولعى زەينەتاقى تولەمدەرىن الۋعا «وتباسى بانكى» تۇرعىن ءۇي قۇرىلىس جيناق بانكى» اق نەمەسە ەكىنشى دەڭگەيدەگى بانكتەرگە جۇگىنە الادى، دەپ حابارلايدى Almaty-akshamy.kz.
ەمدەلۋ ماقساتىندا ءبىرجولعى زەينەتاقى تولەمدەرىن پايدالانۋ ءۇشىن جوعارىدا كورسەتىلگەن ينتەرنەت-پلاتفورما ارقىلى «وتباسى بانكى» تۇرعىن ءۇي قۇرىلىس جيناق بانكى» اق-عا عانا جۇگىنۋ قاجەت.
بۇعان دەيىن 2021 جىلدىڭ 1 قاڭتارىنان باستاپ بجزق ازاماتتارعا زەينەتاقى جيناقتارىنىڭ ءبىر بولىگىن تۇرعىن ءۇي جاعدايىن جاقسارتۋ نەمەسە ەمدەلۋگە اقى تولەۋ سياقتى الەۋمەتتىك ماقساتتارعا پايدالانۋ قۇقىعى بەرىلگەنىن ەستەرىڭىزگە سالا كەتەيىك.
كەلەسى ساناتتار وسى قۇقىقتى پايدالانا الادى:
1) بجزق-دا زەينەتاقى جيناقتارى بار جۇمىس ىستەيتىن ازاماتتار. ولار «تومەنگى جەتكىلىكتىلىك شەگىنەن» اساتىن سومانىڭ ءبىر بولىگىن پايدالانا الادى؛
2) زەينەتاقىسى جوعالعان تابىس سوماسىنىڭ (بۇرىن العان جالاقىسىنىڭ) كەمىندە 40%-ىن قۇرايتىن زەينەتكەرلەر. ولار بجزق-دا قالعان زەينەتاقى جيناقتارى سوماسىنىڭ 50% دەيىن پايدالانا الادى؛
3) وزىنە زەينەتاقى اننۋيتەتىن رەسىمدەگەن جانە ءالى دە جيناقتارى بار ازاماتتار – بجزق-دا قالعان زەينەتاقى جيناقتارىنىڭ سوماسى شەگىندە پايدالانا الادى.
بۇل نورما جۇمىس ىستەيتىن ازاماتتاردى دا، زەينەتكەرلەردى دە قامتيدى.