قازاقستاننىڭ ءتورت وبلىسى ەپيدەميالىق ءقاۋىپتىڭ «قىزىل» بەلدەۋىندە تۇر. ەلدەگى ەپيداحۋال ءالى دە تۇراقتانا قويعان جوق. ق ر دسم تاراتقان اقپارات بويىنشا، كوروناۆيرۋسقا قارسى ەكپەنىڭ تولىق دوزاسىن سالدىرعانداردىڭ جالپى سانى 7 559 996 ادام، ياعني ءالى 50 پايىزدىق يممۋنداۋ كورسەتكىشىنە جەتە قويعان جوق.
Covid-19 تارالۋىنا جول بەرمەۋ جونىندەگى ۆاك-تىڭ مالىمەتتەرى بويىنشا، كوۆيدتىك جاعدايداعى دۇنيە ءجۇزىنىڭ احۋالى قانداي ەكەنىنە شولۋ جاساپ وتەيىك.
برازيليا ازاماتتارى كوروناۆيرۋسقا قارسى ەكپە الۋدا بەلسەندىلىك تانىتۋدا. جالپى العاندا، يممۋنداۋعا جاتاتىن 182 ميلليون ادامنىڭ 154 757 300ء-ى كەم دەگەندە ەكپەنىڭ ءبىر دوزاسىن قابىلدادى، بۇل 12 جاستان اسقان حالىقتىڭ 85% - ىن قۇرايدى. COVID-19 ۆاكسيناسياسىنىڭ تولىق كۋرسىنان 117 283 826 برازيليالىق ءوتتى. ۇشىنشىسى-بۋستەرلىك دوزا 8 683 554 تۇرعىنعا جەتكىزىلدى. برازيليا مەديسينالىق اگەنتتىگىنىڭ مالىمەتىنشە، سوڭعى 24 ساعات ىشىندە ۆاكسينانىڭ 1 344 005 دوزاسى قولدانىلعان.
ۋكراينادا كوروناۆيرۋس بويىنشا سانيتاريالىق-ەپيدەميولوگيالىق جاعداي كۇننەن-كۇنگە ناشارلاۋدا. استانانى قوسا العاندا «قىزىل» ايماقتاعى وڭىرلەر- 15 وبلىس. ءبىر كۇندە كييەۆتە ينفەكسيا جۇقتىرۋدىڭ سانى ءۇش جارىم ەسەگە ءوستى. دەنساۋلىق ساقتاۋ مينيسترلىگىنىڭ مالىمەتىنشە، وتكەن اپتادا اۋرۋحاناعا جاتقىزىلعانداردىڭ 93% - ى ۆاكسيناسيالانباعان. ءقازىر ۋكراينادا ەرەسەك تۇرعىنداردىڭ تەك 18% - ى عانا ۆيرۋسقا قارسى ەگىلگەن. ۆاكسيناسياسىز نەمەسە تەرىس پتر تەستىسىز، ولار ءقازىر ەش جەردە، ءتىپتى قوعامدىق كولىكتە دە جۇرە المايدى. كارانتيندى بۇزعانى ءۇشىن 34 مىڭ گريۆەنگە دەيىن ايىپپۇل سالىنادى. بيلىكتىڭ حابارلاۋىنشا، كييەۆتەگى لوكداۋن جەلتوقسانعا دەيىن سوزىلۋى مۇمكىن.
ءبىر اي بۇرىن ەپيداحۋالى تۇراقتى بولعان دانيادا دا covid-19 جاعدايلارىنىڭ ءوسۋى بايقالۋدا. سوڭعى ەكى اپتادا اۋرۋحاناعا جاتقىزىلعان ناۋقاستار سانى ەكى ەسەگە ءوستى. وتكەن اپتادا 11 369 جاڭا covid-19 وقيعاسى تىركەلدى، ءبىر اپتا بۇرىن 4 751 دەرەك ەسەپكە الىنعان بولاتىن. ۇكىمەت دەنساۋلىق ساقتاۋ ءمينيسترى ماگنۋس حاينيكپەن بىرگە ارنايى كوميسسيا قۇردى، بۇل جۇمىسشى توپ كۇردەلەنگەن جاعدايدى رەتتەۋ باعىتىندا شارالار قابىلدايتىن بولادى. مىسالى، كوروناۆيرۋستىڭ تارالۋىن باسەڭدەتۋ ءۇشىن ەلدە جاڭا شەكتەۋلەر نەمەسە باسقا شارالار ەنگىزۋدى ۇسىنۋى مۇمكىن.
باحرەين كورولدىگىنىڭ بيلىگى شۇعىل تۇردە 5-11 جاس ارالىعىنداعى 19 بالانى covid-19 ينفەكسياسىنا قارسى ۆاكسينالاۋعا رۇقسات بەردى. پروفيلاكتيكالىق پرەپارات رەتىندە Pfizer ۆاكسيناسىن قولدانۋعا رۇقسات ەتىلەدى. باحرەيننىڭ ۇلتتىق دەنساۋلىق ساقتاۋ باسقارماسىنىڭ تۇسىندىرمەسىنە سايكەس، شەشىم 3 100 بالانىڭ قاتىسۋىمەن وتكەن تاجىريبەدەن كەيىن قابىلداندى. زەرتتەۋ ناتيجەلەرى بويىنشا ۆاكسينا 90،7% جاعدايدا ءتيىمدى ەكەندىگى بەلگىلى بولدى. قازىرگى ۋاقىتتا ەلدە كوروناۆيرۋستان يممۋنداۋ پروسەسىنە 1 ميلليوننان استام ادام تارتىلعان. I دوزانى حالىقتىڭ 1 177 889 نەمەسە 66،17% الدى، 1 142 016 ازامات ەگۋدىڭ تولىق كۋرسىنان ءوتتى.