كولىك جۇرگىزە المايتىنى راس پا؟
ۆاكسيناسياعا قارسى كۇرەسۋشىلەر ەندى «جاقىن ارادا ەكپە ءتولقۇجاتى جوق ادامدار ءوز كولىكتەرىن وتالدىرا المايدى، جەكە كومپيۋتەر مەن باسقا تەحنيكالىق قۇرالداردى قولدانا المايدى» دەگەن قاۋەسەت تاراتۋدا. مۇنى ولار ەكپەنىڭ QR كودىنىڭ بارىمەن بايلانىستىرىپ وتىرسا كەرەك.
ءبىراق ساراپشىلار ونىڭ اقىلعا قونبايتىنىن ايتۋدا. حابارلامادا تۇسىندىرىلگەندەي، QR كود شتريح-كودتىڭ جەتىلدىرىلگەن نۇسقاسى. ادەتتە QR كودتى كەز كەلگەن اقپاراتتى وقۋ ءۇشىن قولدانادى. ونىڭ كومەگىمەن، ءتىپتى تاۋار نەمەسە قىزمەت تۋرالى دەرەكتەردى الۋعا، قۇجاتتىڭ، ءىس-شاراعا نەمەسە قوعامدىق كولىككە بيلەتتىڭ ءتۇپنۇسقالىعىن تەكسەرۋگە بولادى. ۆاكسيناسيا ءتولقۇجاتتارىندا دا QR كودتىڭ بارى راس. قازاقستاندىق ۆاكسينا پاسپورتتارىندا دا ول قۇجاتتىڭ ءتۇپنۇسقالىعىن تەكسەرۋ ءۇشىن قىزمەت ەتەدى. ەۋرووداق ەلدەرىنىڭ ەكپە ءتولقۇجاتىندا ادامنىڭ قاشان، قايدا جانە قانداي ۆاكسينامەن ەگىلگەنى تۋرالى ماڭىزدى اقپارات بەرىلگەن. بۇل تۋرالى ەۋروپالىق كوميسسيانىڭ رەسمي سايتىندا ايتىلدى. سونداي-اق، QR كودتارى وقۋ قۇرىلعىلارىنا زيان كەلتىرە المايدى دەپ وتىر ماماندار.
كوۆيد-تەن ەمدەيتىن شاي بار ما؟
WhatsApp مەسسەندجەرىندە شاي COVID-19-دان تەز ايىقتىرادى دەگەن حابارلاما تاراتىلۋدا. حابارلامانىڭ بەلگىسىز اۆتورى CNN تەلەارناسىنا سىلتەمە جاسايدى. ءبىراق CNN رەسمي سايتىندا دا، Twitter-دە دە شايدىڭ مۇنداي قۇدىرەتى تۋرالى جاڭالىقتار جوق.
بۇرىن جاسىل جانە قارا شايدىڭ ۆيرۋسقا قارسى قاسيەتتەرى تۋرالى زەرتتەۋلەر جۇرگىزىلگەن. الايدا، ولار سۋسىننىڭ اۋرۋمەن كۇرەستە پايداسى مەن تيىمدىلىگى تۋرالى ءبىرجاقتى قورىتىندىعا كەلۋ ءۇشىن جەتكىلىكسىز. اسىرەسە، كورونوۆيرۋس ينفەكسياسىمەن كۇرەستە شايدان كومەك بولادى دەۋ ويعا قونىمسىز. كوپشىلىك اراسىندا تاراعان جەل اڭگىمەنى كاسىپكەرلەر دە پايدالانىپ ۇلگەرىپتى. ولار «شايدى ساتىپ، اقشا تابامىز» دەپ، ءتىپتى COVID-19-دى ەمدەيتىن وزىندىك سۋسىندار جەلىسىن دە ىسكە قوسىپ ۇلگەرگەن. اقش-تىڭ ازىق-تۇلىك ونىمدەرى مەن دارى-دارمەكتەردىڭ ساپاسىن سانيتارلىق باقىلاۋ باسقارماسى وسىنداي تاۋارلاردى تاراتاتىن كومپانيالارعا حات جولدادى. وندا: «سىزدەن اۋرۋدى جەڭىلدەتۋ، الدىن-الۋ، ەمدەۋ نەمەسە دياگنوز قويۋ ءۇشىن كەز كەلگەن راستالماعان جانە شەشىلمەگەن ونىمدەردى ساتۋدى توقتاتۋعا جەدەل شارالار قابىلداۋدى سۇرايمىز» دەلىنگەن حاتتا.
اۋرۋدىڭ الدىن الۋعا باعىتتىلعان جالعىز دۇرىس شەشىم - ەكپە الۋ ەكەنىن ۇمىتپايىق!