بۇگىنگى تاڭدا الەمدى ابىگەرگە سالىپ جاتقان «دەلتا» شتامى جاستار ءۇشىن دە تىم ءقاۋىپتى دەپ وتىر ماماندار. سوندىقتان جوو باسشىلارى ارىپتەستەرىن جانە ستۋدەنتتەردى جاپپاي ۆاكسينا الۋعا شاقىرۋدا.
بۇگىندە ساتبايەۆ ۋنيۆەرسيتەتىنىڭ وففلاين رەجيمىندە جۇمىس ىستەيتىن بارلىق وقىتۋشىسى ۆاكسينا العان. «ۇلتتىق زەرتتەۋ تەحنيكالىق ۋنيۆەرسيتەتى» مارتەبەسى بەرىلگەن جالعىز قازاقستاندىق جوعارى وقۋ ورنىندا وقىتۋدىڭ ەكى فورماتى بار: ونلاين جانە وففلاين.
«بۇل اتاق تەحنيكالىق عىلىم سالاسىندا وزىق عىلىمي زەرتتەۋلەر جۇرگىزۋگە ءارى عالىمداردىڭ جاڭا بۋىنىن قالىپتاستىرۋ ءۇشىن جاعداي جاساۋعا باعىتتالعان. ءبىزدىڭ ۋنيۆەرسيتەت مەملەكەتتىك دامۋ باعدارلاماسىن ىسكە اسىرۋ ماقساتىندا زەرتتەۋلەردىڭ پراكتيكالىق كومپونەنتىن كۇشەيتۋگە ءتيىس»، – دەيدى Satbayev University رەكتورى مەيرام بەگەنتايەۆ.
ول ۋنيۆەرسيتەتتىڭ دامۋى تۋرالى ايتا كەلە، كۆي ىندەتىنىڭ ءبىلىم بەرۋ جۇيەسىنە كولەڭكەسىن تۇسىرگەنىن دە ايتتى. «ءمۇعالىم ءبىلىمنىڭ نەگىزگى كوزى بولۋدان قالا جازدادى. ءبىز سويلەۋدەن بۇرىن سمارتفوندى يگەرەتىن جاڭا بۋىننىڭ پايدا بولعانىنا كۋامىز. ستۋدەنتتەر الەۋمەتتىك جەلىدەن ىزدەگەن كەز كەلگەن وقۋ ماتەريالىن تابا الادى. ال ادامي كاپيتالدى دامىتۋ ءۇشىن وقۋ پروسەسىندە ستۋدەنت پەن وقىتۋشى بايلانىسى ماڭىزدى بولماق. سوندىقتان ءبىلىم ساپاسىن ارتتىرۋ ءۇشىن ستۋدەنتتەر پارتاعا ورالۋى كەرەك. ال ول ءۇشىن ۆاكسينا الۋ قاجەت»، – دەيدى رەكتور.