Coursera-نىڭ 2025 جىلعا ارنالعان جاھاندىق داعدىلار جونىندەگى ەسەبى (Global Skills Report 2025) جاريالاندى
بۇل 109 ەلدەن 170 ميلليوننان استام پايدالانۋشىنىڭ دەرەكتەرىنە نەگىزدەلگەن سيفرلىق جانە كاسىبي داعدىلار بويىنشا جىل سايىنعى عالامدىق شولۋ، دەپ حابارلايدى aqshamnews.kz.
وقۋ-اعارتۋ مينيسترلىگىنىڭ مالىمەتىنشە، قازاقستان جاھاندىق داعدىلار رەيتينگىندە 37-ورىنعا جانە جاساندى ينتەللەكتىنىڭ جەتىلۋ يندەكسى (AI Maturity Index) بويىنشا 51-ورىنعا يە بولىپ، كادرلار دايارلاۋ سالاسىندا باسەكەگە قابىلەتتى ەلدەر قاتارىنداعى ورنىنىڭ تۇراقتىلىعىن راستادى.
ەلدە ەڭ سۇرانىسقا يە باعىتتارعا قىزىعۋشىلىقتىڭ ايتارلىقتاي ارتقانى بايقالادى: گەنەراتيۆتى جي كۋرستارىنا تىركەلۋ 383 پايىزعا، كيبەرقاۋىپسىزدىك كۋرستارىنا قىزىعۋشىلىق 80 پايىزعا، سىني ويلاۋ كۋرستارىنا قىزىعۋشىلىق 43 پايىزعا، كاسىبي سەرتيفيكاتتاردى الۋ 50 پايىزعا ارتقان. قازاقستان سيفرلىق ينكليۋزيا دەڭگەيىنىڭ جوعارىلىعىمەن ەرەكشەلەنەدى: ءبىلىم الۋشىلاردىڭ 56 پايىزىن ايەلدەر قۇرايدى، ال 62 پايىزى وقۋدى ءموبيلدى قۇرىلعىلار ارقىلى الىپ جاتىر. بۇل وقىتۋدىڭ تۇرعىلىقتى جەرىنە قاراماستان قولجەتىمدى ەكەنىن كورسەتەدى.
مۇنداي ناتيجەلەرگە ق ر عىلىم جانە جوعارى ءبىلىم مينيسترلىگى ۇيلەستىرەتىن Coursera Qazaqstan ۇلتتىق باستاماسىن ىسكە اسىرۋ ارقىلى قول جەتكىزىلدى. ايتالىق، Coursera جوباسىنا 2023 جىلى ەلىمىزدىڭ 25 جوعارى وقۋ ورنى، 2024 جىلى 93 جوعارى وقۋ ورنى قاتىسسا، 2025 جىلى 95 جوعارى وقۋ ورنى قاتىستى. ستۋدەنتتەرگە الەمنىڭ جەتەكشى ۋنيۆەرسيتەتتەرى مەن كومپانيالارىنىڭ 14 000-نان استام كۋرسى قولجەتىمدى بولدى. مينيسترلىكتەن بەرىلگەن ليسەنزيالار اياسىندا ءۇش جىلدا پلاتفورما ارقىلى 167 372 ستۋدەنت وقۋدان ءوتتى، 288 347 سەرتيفيكات بەرىلدى. 2025 جىلى AI Sana جوباسى اياسىندا جاساندى ينتەللەكت بويىنشا جەكە ترەك ىسكە قوسىلىپ، ونىڭ شەڭبەرىندە 47 399 سەرتيفيكات تابىستالدى. بۇل دەرەكتەر ونلاين وقىتۋدىڭ جانە ميكروقۇزىرەتتەردىڭ جاڭا ەكونوميكا كادرلارىن دايارلاۋداعى، سونداي-اق قازاقستاننىڭ جوعارى ءبىلىم بەرۋ جۇيەسىن ورنىقتى دامىتۋداعى ستراتەگيالىق ماڭىزىن دالەلدەيدى.
ايتا كەتەيىك، ەسەپتە ءبىلىم الۋشىلاردىڭ مىنەز-قۇلىق دەرەكتەرى مەن ماكروەكونوميكالىق كورسەتكىشتەردى بىرىكتىرەتىن جاڭا 3.0 ادىستەمەسى قولدانىلعان. بۇل كورسەتكىشتەرگە ادامي كاپيتال يندەكسى، ەڭبەك نارىعىنا قاتىسۋ دەڭگەيى، جان باسىنا شاققانداعى ءجىو جانە جاھاندىق يننوۆاسيالىق يندەكسى جاتادى. سونىمەن قاتار Coursera دەرەكتەرى مەن حالىقارالىق ۆاليۋتا قورى، ەىدۇ سياقتى حالىقارالىق دەرەككوزدەر نەگىزىندە ەلدەردىڭ جاساندى ينتەللەكتىنى ەنگىزۋگە دايىندىعىن باعالايتىن AI Maturity Index العاش رەت ۇسىنىلدى.