الماتىداعى وقۋشىلاردىڭ 96%-عا جۋىعى جازعى دەمالىستا ساۋىقتىرۋ شارالارىمەن جانە ءتۇرلى ۇيىرمەلەرمەن قامتىلعان، - دەپ حابارلايدى aqshamnews.kz.
2025 جىلدىڭ جازعى ماۋسىمىندا الماتى قالاسىندا 281 مىڭ وقۋشى جازعى دەمالىستا ساۋىقتىرۋ شارالارىمەن جانە ءتۇرلى ۇيىرمەلەرمەن قامتىلدى. بۇل كورسەتكىش 1-10 سىنىپ ارالىعىندا وقيتىن الماتىلىق 293 682 بالانىڭ 95،7 پايىزىن قۇرايدى. ال، 2024 جىلى جازعى دەمالىستا ۇيىمداستىرىلعان شارالارعا 266 343 وقۋشى قاتىسقان ەدى.
بيىل مەكتەپ جانىنداعى لاگەرلەردىڭ جۇمىسى ەرەكشە مازمۇندى ءارى قىزىقتى وتۋدە. مۇندا بالالار جەنت جاساۋدى، قۇرت جايىپ، كەپتىرۋدى، كەستە تىگىپ، توقىما توقۋدى، قولمەن سومكە تىگۋدى ۇيرەنىپ جاتىر. سونىمەن قاتار، ولار قازاقتىڭ ءداستۇرلى ويىندارى – حانتالاپاي، اسىق اتۋ، سونداي-اق قازاق كۇرەسىنىڭ نەگىزدەرىمەن تانىسۋدا. بۇدان بولەك، بالالار باعدارلامالاۋ مەن روبوتوتەحنيكاعا ماشىقتانىپ، دومبىرا، جەتىگەن، بايان جانە باسقا دا ۇلتتىق مۋزىكالىق اسپاپتاردا ويناۋدى ۇيرەنۋدە. سپورتقا دا ەرەكشە كوڭىل بولىنگەن: بالالار فۋتبول، باسكەتبول، ۆولەيبول ويناپ، اشىق اۋادا ءتۇرلى ەستافەتالارعا قاتىسىپ جاتىر. ب ا ق وكىلدەرى باسپا ءسوز تۋرى اياسىندا بىرنەشە مەكتەپ جانىنداعى لاگەرگە بارىپ، بالالارمەن جانە ءبىلىم بەرۋ سالاسىنىڭ وكىلدەرىمەن سۇحباتتاستى.
الماتى قالاسى ءبىلىم باسقارماسى باسشىسىنىڭ ورىنباسارى مۇحتار تاجىبايەۆتىڭ ايتۋىنشا، قالادا IT-داعدىلاردى دامىتۋعا، وتباسىلىق قۇندىلىقتاردى نىعايتۋعا جانە پاتريوتتىق تاربيەنى كۇشەيتۋگە باعىتتالعان تاقىرىپتىق لاگەرلەر جۇمىس ىستەپ جاتىر. بۇل رەتتە مەملەكەت باسشىسىنىڭ تاپسىرماسىمەن جۇزەگە اسىپ جاتقان "ادال ازامات" ءبىرتۇتاس تاربيە باعدارلاماسىنا ەرەكشە ءمان بەرىلىپ جاتىر.
"قالادا 200-دەن استام جالپى ءبىلىم بەرەتىن مەكتەپ بار. بيىل وقۋ جىلى اياقتالعاننان كەيىن بىردەن مەكتەپ جانىنداعى لاگەرلەر جۇمىسىن باستادى. ەڭ باستىسى – بالالار لاگەرگە جەرگىلىكتى بيۋدجەت ەسەبىنەن تەگىن بارىپ ءجۇر. سونداي-اق، 26 مامىردان باستاپ 9 ماۋسىمعا دەيىن باستاۋىش سىنىپ وقۋشىلارى مەن الەۋمەتتىك وسال توپتاعى بالالار لاگەرلەردە تەگىن تاماقپەن قامتىلدى. ەندى بۇگىننەن باستاپ ماۋسىم ايىنىڭ سوڭىنا دەيىن لاگەرلەر تاڭەرتەڭنەن تۇسكە دەيىن جۇمىس ىستەيتىن بولادى، ءبىراق بۇل كەزەڭدە تاماقتانۋ قاراستىرىلمايدى. بالالار ادەتتەگىدەي مەكتەپ جانىنداعى لاگەرلەرگە تەگىن بارا بەرەدى. ال شىلدە ايىندا مەكتەپتەر جاڭا وقۋ جىلىنا دايىندىق جۇرگىزىپ، جوندەۋ جۇمىستارىنا كىرىسەدى. كەيىن تامىز ايىندا لاگەرلەر قايتا اشىلىپ، تاعى تاڭەرتەڭنەن تۇسكە دەيىن بالالاردى تەگىن قابىلدايتىن بولادى. سونىمەن قاتار، جاقىن ارادا قالا سىرتىنداعى لاگەرلەر دە جۇمىسىن باستايدى. ءقازىر بالالاردى دەمالىسقا قابىلداۋعا دايىن ۇيىمدار اراسىندا كونكۋرس ءوتىپ جاتىر. بۇدان بولەك، قوسىمشا ءبىلىم بەرۋ ۇيىرمەلەرى دە ءوز جۇمىسىن جالعاستىرۋدا. قالادا 19 مەملەكەتتىك جانە 122 جەكەمەنشىك قوسىمشا ءبىلىم بەرۋ مەكەمەسى بار. وندا 40 مىڭنان استام بالا مەملەكەت ەسەبىنەن قوسىمشا ءبىلىم الىپ جاتىر"، – دەدى مۇحتار تاجىبايەۆ.
ماسەلەن، №140 مەكتەپ جانىنداعى سپورتتىق باعىتتاعى لاگەردە 5–6 سىنىپ وقۋشىلارى ءارتۇرلى سپورت تۇرلەرى بويىنشا تەرەڭدەتىلگەن دايىندىقتان وتۋدە. مۇندا ۆولەيبول، فۋتبول، توعىزقۇمالاق جانە باسقا دا ۇلتتىق ويىندار بويىنشا جاتتىعۋلار وتكىزىلۋدە. لاگەر باعدارلاماسى تەوريالىق ءبىلىم بەرۋدى دە قامتيدى – بۇل بالالاردىڭ سپورتتىق ءتارتىبىن نىعايتىپ، كوماندالىق رۋحىن قالىپتاستىرادى.
№97 مەكتەپ جانىنان اشىلعان "ارمان" لاگەرىندە بالالار سپورتتىق جانە شىعارماشىلىق شارالارعا، ەكسكۋرسيالار، زياتكەرلىك ويىندار مەن شەبەرلىك ساباقتارعا قاتىسىپ جاتىر.
الماتى قۇرىلىس-تەحنيكالىق كوللەدجى بازاسىندا "جازدا ماماندىق تاڭدايىق" اتتى باعدارلاما جۇزەگە اسىرىلىپا جاتىر. مۇندا جوعارى سىنىپ وقۋشىلارى اعاش وڭدەۋ ءىسىن، گرافيكالىق ديزايندى مەڭگەرىپ، قۇرال-سايماندارمەن جۇمىس ىستەۋدى، سونداي-اق SketchUp ارقىلى 3D-مودەلدەۋدىڭ نەگىزدەرىن ۇيرەنۋدە. بۇل باعدارلاما بالالارعا العاشقى كاسىبي داعدىلاردى مەڭگەرۋگە مۇمكىندىك بەرەدى.
پاتريوتتىق جانە مادەني تاربيەگە دە ەرەكشە نازار اۋدارىلىپ جاتىر. №208 مەكتەپ جانىنان اشىلعان "ەتنو City" ەتنولاگەرى – جاس ۇرپاقتىڭ بويىندا پاتريوتتىق سەزىم مەن ۇلتتىق مادەنيەتكە دەگەن قۇرمەتتى قالىپتاستىراتىن ەرەكشە الاڭ. مۇندا بالالار قازاقتىڭ سالت-داستۇرىمەن تەرەڭ تانىسىپ جاتىر. لاگەردە بىرنەشە كيىز ءۇي تىگىلىپ، ولاردىڭ ءارقايسىسى جاي ساندىك ەلەمەنت ەمەس، ءبىلىم بەرۋ كەڭىستىگىنە اينالعان. باعدارلاما اياسىندا ۇلتتىق قولونەر بويىنشا شەبەرلىك ساباقتارى وتكىزىلىپ، بالالار قازاقتىڭ اشەكەي بۇيىمدارى مەن تۇرمىستىق زاتتارىن جاساۋدى ۇيرەنۋدە. سپورتتىق جانە ۇلتتىق ويىندار ارقىلى ولار دەنە شىنىقتىرۋمەن قاتار، قازاق حالقىنىڭ كونە داستۇرلەرى مەن جارىس مادەنيەتى جايىندا مول ماعلۇمات الىپ جاتىر.
ناۋرىزباي اۋدانىنداعى وقۋشىلاردىڭ يننوۆاسيالىق شىعارماشىلىعى ورتالىعىندا اشىلعان IT-لاگەردە 7 جاستان 15 جاسقا دەيىنگى بالالار باعدارلامالاۋ نەگىزدەرىن مەڭگەرىپ، ەلەكترونيكامەن تانىسىپ، ءتۇرلى عىلىمي تاجىريبەلەرگە قاتىسۋدا. مۇندا بالالار مۋزاكالىق دارىستەرگە قاتىسىپ، اسپاپتاردا ويناۋدى جانە كيىم تىگۋدى ۇيرەنىپ جاتىر.
جالپى، الماتى مەكتەپتەرىندەگى جازعى لاگەر باعدارلامالارى بالالارعا تەك دەمالۋعا عانا ەمەس، ۋاقىتتى ءتيىمدى وتكىزۋگە، جاڭا ءبىلىم مەن داعدىلاردى مەڭگەرۋگە، شىعارماشىلىق قابىلەتتەرىن دامىتۋعا كەڭ مۇمكىندىك بەرەدى.