چەمپيوندار ليگاسى: "قايراتتىڭ" قارسىلاستارى جايلى جۇرت بىلمەيتىن دەرەكتەر

الماتىلىق "قايرات" فۋتبول كلۋبى چەمپيوندار ليگاسىنىڭ جالپى كەزەڭىنە جولداما الىپ، الەمدىك ارەناداعى ۇزدىك كلۋبتارمەن تەكەتىرەسپەك. قازاقستاندىقتاردى ءدۇر سىلكىندىرگەن تاريحي وقيعا جۇرتتىن جانارىپ جاۋلاپ، ەل نازارىن وزىنە بۇردى. جاقىندا الماتىلىق فۋتبول كلۋبىنىڭ قارسىلاستارى انىقتالىپ، ماچ كۇندەرى جاريالانعان ەدى. "قايراتتىڭ" قارسىلاستارى جايلى نە بەلگىلى؟ اqshamnews.kz ءتىلشىسى انىقتادى. 

"قايرات" فك كىممەن وينايدى؟

28 تامىزدا موناكودا ۋەفا چەمپيوندار ليگاسىنىڭ توپتىق كەزەڭىنە جەرەبە تارتۋ ءراسىمى ءوتتى. ناتيجەسىندە الماتىلىق "قايراتتىڭ" قارسىلاستارى انىقتالدى. ءبىزدىڭ كلۋب ءوز الاڭىندا "رەال مادريد"، "بريۋگگە"، "وليمپياكوس" جانە "پافوستى" قارسى السا، سىرت الاڭدا "ينتەر"، "ارسەنال"، "سپورتينگ" جانە "كوپەنگاگەنگە" قوناققا بارادى. 

30 تامىزدا ماچتاردىڭ تولىق كەستەسى جاريالاندى:

• 19 قىركۇيەك، 00:00 — "سپورتينگ" – "قايرات"

• 30 قىركۇيەك، 21:45 — "قايرات" – "رەال"

• 21 قازان، 21:45 — "قايرات" – "پافوس"

• 6 قاراشا، 01:00 — "ينتەر" – "قايرات"

• 26 قاراشا، 22:45 — "كوپەنگاگەن" – "قايرات"

• 9 جەلتوقسان، 20:30 — "قايرات" – "وليمپياكوس"

• 20 قاڭتار، 20:30 — "قايرات" – "بريۋگگە"

• 29 قاڭتار، 01:00 — "ارسەنال" – "قايرات"

جانكۇيەرلەر كەستە جاريالانعاننان كەيىن "قايرات" پەن "رەال مادريد" اراسىنداعى ويىندى تاعاتسىزدانا كۇتىپ وتىر. ايگىلى يسپاندىق كلۋب الماتىعا كەلەدى. 

قارسىلاس كلۋبتاردىڭ ستاديوندارى قانداي؟

Real Madrid — Estadio Santiago Bernabéu (مادريد، يسپانيا)

• ءتۇرى: فۋتبول ستاديونى، جابىلمالى توبەسى بار.

• سىيىمدىلىعى: شامامەن 83 186 ورىن (2024 جىلعى رەكونسترۋكسيادان كەيىن).

• قۇنى: شامامەن €1،3–1،8 ملرد جۇمسالعان.

بۇل كلۋب 1902 جىلى قۇرىلعان. چەمپيوندار ليگاسىنىڭ 15 دۇركىن جەڭىمپازى. الەمدىك فۋتبول اڭىزدارى – دي ستەفانو، زيدان، كريشتيانۋ رونالدۋ وسى كلۋبتا ويناعان. قازىرگى جۇلدىزدارى قاتارىندا ۆينيسيۋس جۋنيور مەن دجۋد بەللينگەم بار.

Club Brugge — Jan Breydel Stadium (بريۋگگە، بەلگيا)

• ءتۇرى: كوپماقساتتى ستاديون

• سىيىمدىلىعى: 29 042 ورىن

Club Brugge – 1891 جىلى قۇرىلعان. بەلگيانىڭ 19 دۇركىن چەمپيونى. چەمپيوندار ليگاسىن جەڭبەسە دە، بىرنەشە مارتە فينالعا جەتكەن.

Olympiacos — Georgios Karaiskakis Stadium (پيرەي، گرەسيا)

• ءتۇرى: فۋتبول ستاديونى.

• سىيىمدىلىعى: شامامەن 33 334–33 449 ورىن

• قۇنى: 2004 جىلعى قايتا قۇرۋ جۇمىستارىنا €60 ملن جۇمسالعان

1925 جىلى قۇرىلعان Olympiacos 47 مارتە چەمپيون اتانعان گرەكياداعى ەڭ تيتۋلدى كلۋب. چەمپيوندار ليگاسىن ۇتپاعان، ءبىراق توپتىق كەزەڭنىڭ تۇراقتى قاتىسۋشىسى.

Pafos FC — Stelios Kyriakides Stadium (پافوس، كيپر)

• ءتۇرى: كوپماقساتتى، ىشىندە جۇگىرۋ جولدارى بار

• سىيىمدىلىعى: شامامەن 8 500–9 394 ورىن.

Pafos FC – 2014 جىلى قۇرىلعان جاس كلۋب. ازىرگە حالىقارالىق جەتىستىگى جوق، ءبىراق كيپر فۋتبولىندا دامىپ كەلە جاتقان كوماندالاردىڭ ءبىرى.

Inter Milan — San Siro (ميلان، يتاليا)

• ءتۇرى: يتالياداعى ەڭ ۇلكەن فۋتبول ارەنالارىنىڭ ءبىرى.

• سىيىمدىلىعى: 75 817 ورىن

• قۇنى: جاڭا ستاديون جوباسى €1،25 ملرد بولۋى مۇمكىن؛ ال ستاديوننىڭ جەرى €197 ملن باعالانعان

Inter Milan - 1908 جىلى قۇرىلىپ، چەمپيوندار ليگاسىن ءۇش رەت جەڭىپ العان. كەيىنگى رەت 2010 جىلى جەڭدى. جاڭا بۋىن جۇلدىزدارى مەن تاريحي ويىنشىلارى: دجۋزەپپە مەاسسا، حاۆەر دزانەتتي.

Arsenal — Emirates Stadium (لوندون، انگليا)

• ءتۇرى: فۋتبول ستاديونى.

• سىيىمدىلىعى: 60 704 ورىن.

• قۇنى: كەڭەيتۋ جوباسى £500 ملن-نان جوعارى بولۋى مۇمكىن

ايگىلى اعىلشىن كلۋبى 1886 جىلى قۇرىلدى. انگليانىڭ 13 دۇركىن چەمپيونى اتانعان Arsenal ءالى كۇنگە دەيىن چەمپيوندار ليگاسىنىڭ باستى تروفەيىن ءالى يەلەنبەدى. تەرري انري، دەننيس بەرگكامپ سەكىلدى اڭىزدار وسى كلۋبتان شىققان.

Sporting CP — Estádio José Alvalade (ليسسابون، پورتۋگاليا)

• ءتۇرى: فۋتبول ستاديونى.

• سىيىمدىلىعى: باستاپقىدا 50 095 ورىن، سوڭعى رەكونسترۋكسيادان كەيىن 52 095 ورىن.

• قۇنى: 2003 جىلى شامامەن £150 ملن جۇمسالعان

ال Sporting CP  ەل چەمپيونى اتاعىن 19 مارتە يەلەنگەن كلۋب. الەمدىك جۇلدىز كريشتيانۋ رونالدۋ فۋتبولداعى العاشقى قادامىن وسى كلۋبتان باستاعان.

FC Copenhagen — Parken Stadium (كوپەنگاگەن، دانيا)

• ءتۇرى: فۋتبول ستاديونى، جابىلمالى توبەسى بار.

• سىيىمدىلىعى: فۋتبولعا 38 065–38 190 ورىن، كونسەرتتەرگە دەيىن 55 000 ورىنعا دەيىن كەڭەيەدى.

• قۇنى: رەكونسترۋكسيا 640 ملن DKK، ال 1998 جىلى كلۋبقا 138 ملن DKK-عا ساتىلعان

FC Copenhagen – 1992 جىلى قۇرىلعان. دانيانىڭ ەڭ تابىستى كلۋبى، ەل چەمپيونى اتاعىن 15 رەت يەلەنگەن. چەمپيوندار ليگاسىندا بىرنەشە مارتە پلەي-وفف كەزەڭىنە شىققان.

"قايرات" - "رەال" ماچىنان نە كۇتەمىز؟

30 قىركۇيەكتە الماتىنىڭ ورتالىق ستاديونىندا "قايرات" چەمپيوندار ليگاسىنىڭ توپتىق كەزەڭىندە ەۋروپانىڭ ەڭ اتاقتى كلۋبى – مادريدتىك "رەالدى" قابىلدايدى. قازاقستاننىڭ تۋريزم جانە سپورت ءمينيسترى ەربول مىرزابوسىنوۆتىڭ ايتۋىنشا، قالا مۇنداي اۋقىمدى شاراعا دايىن: ينفراقۇرىلىم تالاپتارعا ساي، ال ماچقا 4–5 مىڭ ءتۋريستىڭ كەلۋى كۇتىلىپ وتىر. ءمينيستردىڭ سوزىنشە، مۇنداي وقيعالار ەلىمىزدىڭ ءيميدجىن كوتەرىپ، فۋتبولدىڭ ءارى قاراي دامۋىنا سەرپىن بەرەدى.

دەگەنمەن، بيلەتتەر توڭىرەگىندە قىزۋ تالقىلاۋ ءجۇرىپ جاتىر. ءالى ساتىلىمعا شىقپاعانىنا قاراماستان، جانكۇيەرلەر ورىن جەتپەي قالادى دەپ الاڭداپ وتىر. بەلسەندى فاناتتار الىپساتارلاردىڭ الدىن الۋ ءۇشىن پەتيسيا جاريالاپ، ءبىر جسن-گە ەكى بيلەتتەن عانا ساتۋ، قايتا ساتىپ الۋدى شەكتەۋ سياقتى تالاپتار قويعان. ءقازىردىڭ وزىندە قۇجاتقا 400-دەن استام ادام قول قويعان.

يسپاندىق جۋرناليست داۆيد ءرۋيستىڭ مالىمەتىنشە، "رەال مادريد" الماتىعا نەگىزگى قۇرامىمەن كەلەدى. سوندىقتان جانكۇيەرلەر اسىعا كۇتكەن بۇل كەزدەسۋ ناعىز تاريحي وقيعاعا اينالاتىنى انىق.