كوميسسارياتتاعىلار ونىڭ مەديسينالىق انىقتاماسىن ەسەپكە الماعان
قوستاناي وبلىستىق مامانداندىرىلىعان اۋدانارالىق اكىمشىلىك سوتى 2022 جىلعى 24 مامىردا قوستاناي وبلىسىنىڭ قورعانىس ىستەرى دەپارتامەنتىنە قاتىستى اسكەري قىزمەتكە جىبەرۋ تۋرالى بۇيرىقپەن كەلىسپەگەن ن. ەسىمدى ازاماتتىڭ ارىزى بويىنشا اكىمشىلىك ءىستى قارادى، دەپ حابارلايدى Almaty-akshamy.kz Azattyq Rýhy-نا سىلتەمە جاساپ.
وبلىستىق سوتتىڭ مالىمەتىنشە، اسكەري ەسەپتە تۇرعان مەرزىمدى اسكەري قىزمەتشى 2021 جىلدىڭ جەلتوقسان ايىندا مەديسينالىق كوميسسيادان ءوتۋ كەزىندە "اش ىشەك ءتۇيىنىنىڭ ەروزيالىق دەفورماسياسى. اسقىنعان ويىق جارا" دياگنوزى بار ەكەنىن حابارلاپ، سايكەس مەديسينالىق انىقتامانى ۇسىنعان.
"كوميسسيا قۇجاتتى ەسەپكە الماي، "اسكەري قىزمەتكە جارامدى" دەگەن ءبىراۋىزدى شەشىم شىعارىپ، جاس جىگىت ۇلتتىق ۇلانعا جىبەرىلدى. سوت تالقىلاۋى بارىسىندا جاۋاپ بەرۋشى تاراپ قوستانايلىق ازاماتتىڭ اسكەري مىندەتتى وتەۋ ورنى بويىنشا مەديسينالىق تەكسەرۋدىڭ ناتيجەسىن كورسەتتى. قۇجاتتا ن. ەسىمدى ارىزدانۋشىنىڭ اسكەري قىزمەتتى وتەۋىنە كەدەرگى كەلتىرمەيتىن "كاتارالدى ءانترالدى گاستريت" اۋرۋى بار ەكەنى كورسەتىلگەن. سوت اسكەري-دارىگەرلىك ساراپتاما تاعايىندادى. ساراپتاما ارىزدانۋشىنىڭ بۇعان دەيىن مالىمدەگەن دياگنوزىن راستادى، ونىڭ قازىرگى ۋاقىتتا اۋرۋى جازىلماعانى بەلگىلى بولدى. سوندىقتان جاس سارباز ودان ءارى اسكەري قىزمەتتى وتەي المايدى"، - دەلىنگەن حابارلامادا.
داۋلى قاۋلى سوتپەن زاڭسىز دەپ تانىلىپ، ونىڭ كۇشى جويىلدى.
سونىمەن قاتار، ارىزدانۋشىنىڭ دەنساۋلىق جاعدايىن ەسكەرگەن سوت ءوز شەشىمىن شۇعىل ورىنداۋعا شاقىردى.
مۇنداي وقيعانىڭ الداعى ۋاقىتتا قايتالانۋىنا جول بەرمەۋ ماقساتىندا ءتيىستى شارالار قولدانۋ ءۇشىن سوت جاۋاپكەرگە تىركەلگەن زاڭ بۇزۋشىلىقتار بويىنشا جەكە ۇيعارىم شىعاردى.