اسكەري جانە ارتيللەريالىق بارلاۋ بولىمشەلەرى بىرىكتىرىلدى
«ىزدەۋ-2022» ارنايى وقۋ-جاتتىعۋى بارىسىندا ۇجىمدىق قاۋىپسىزدىك تۋرالى شارت ۇيىمىنا مۇشە ەلدەردىڭ بارلاۋ ورگاندارى مەن بولىمشەلەرى ارنايى تاپسىرمالاردى ورىندادى. ولاردىڭ باسىم بولىگى تۇنگى ۋاقىتتا ىسكە اسۋ ۇستىندە، دەپ حابارلايدى Almaty-akshamy.kz.
ۇجىمدىق جەدەل ارەكەت ەتۋ كۇشتەرىنىڭ اسكەر توپتارى قارسىلاسقا ۇزدىكسىز بارلاۋ جۇرگىزىپ جاتىر. ءبىرىڭعاي جۇيەگە اۋە، راديولوكاسيالىق، راديوتەحنيكالىق، ارنايى، اسكەري جانە ارتيللەريالىق بارلاۋ بولىمشەلەرى بىرىكتىرىلدى.
ارنايى ماقساتتاعى بارلاۋ توپتارى، نىساناعا الۋ جانە باعىتتاۋ توپتارى پاراشيۋتپەن دەسانتتاۋدى پىسىقتاۋدا. ولار ۇشقىشسىز باسقارىلاتىن قۇرىلعىلاردى قولدانۋ ارقىلى وپتيكالىق-ەلەكتروندىق بارلاۋ جۇرگىزىلىپ جاتىر. ماماندار رەيد جاساۋشى جاساقتاردى اينالىپ وتكەن قارسىلاستىڭ ورنالاسقان جەرىن انىقتاپ، ارتيللەريا جانە مايداندىق اۆياسيانىڭ سوققىلارىمەن جويۋ ءۇشىن ولاردىڭ كوورديناتتارىن بەرەدى.
بارلاۋ قۇرالدارىنىڭ وق اتىپ، زاقىمداۋ كەزىندەگى اتىسى جانە سوققى ناتيجەلەرى دە باعالانادى، ونىڭ بارىسىندا ارتيللەريالىق، زىمىراندىق جانە اۆياسيالىق بولىمشەلەردى ءجىتى بارلاۋ جانە قايتا نىساناعا الۋ دا ىسكە اسىرىلۋ ۇستىندە.
ارنايى جاساقتار قارسىلاستىڭ شەگىنىپ بارا جاتقان توبىنا قىسقا قاشىقتىقتا وق جاۋدىرىپ جاتىر. اۋە تاسىلىمەن بارلاۋشىلاردى كوشىرۋ كەزىندە مەرگەندەر مەن ارميالىق اۆياسيا ولاردى بۇركەمەلەۋدى ورىندايدى.
وبەكتىلەرگە رەاكتيۆتى ارتيللەريا مەن شارتتى قارسىلاستىڭ قۇراماسى شابۋىل جاساعان كەزدە شابۋىلداۋ بولىمشەلەرى دە قاراپ تۇرماي، ءىس-قيمىلعا كوشۋدە. بارلاۋ جاساعىنىڭ ساۋىت-سايمانى ساي توبى جاۋعا قارسى ىس-ارەكەت جاساپ، ولاردى قولدا بار اتىس قۇرالدارىمەن جويۋ ۇستىندە.
«ىزدەۋ-2022» ارنايى وقۋ-جاتتىعۋىنداعى بارلاۋ بولىمشەلەرىنىڭ نەگىزگى مىندەتى ءبىرىڭعاي اقپاراتتىق دەرەكتەردى جيناۋ، تالداۋ جانە ولاردىڭ مەجەلى جەرگە جەتۋىن ۇزدىكسىز قامتاماسىز ەتىپ وتىرۋ بولىپ تابىلادى.