الماتىدا «ونەر سيقىرى» اتتى شىعارماشىل بالالاردىڭ كورمەسى وتەدى

كورمە جوعارى وقۋ ورىندارىنىڭ قولداۋىمەن ۇيىمداستىرىلادى

2022 جىلدىڭ 7 قازانىندا ساعات 15:00-دە قازاقستان رەسپۋبليكاسى مەملەكەتتىك ورتالىق مۋزەيىندە «بالالار جىلى» اياسىندا حالىقارالىق جاس وسپىرىمدەر اراسىندا «ونەر سيقىرى» اتتى حالىقارالىق بالالار شىعارماشىلىعى كورمەسىنىڭ اشىلۋى وتەدى، دەپ حابارلايدى Almaty-akshamy.kz.

 كورمەنىڭ ماقساتى – جاس ۇرپاقتىڭ رۋحاني-ادامگەرشىلىك تاربيەسىنە، ساباقتاستىعىنا ىقپال ەتەتىن دارىندى بالالار، جاسوسپىرىمدەر، ونەر، قولونەر ستۋدەنتتەرى، قولونەرشىلەردىڭ داستۇرلەرى اراسىندا حالىقارالىق دەڭگەيدە تانىمال ەتۋ.  

كورمەدە ەلىمىزدىڭ ءارتۇرلى وڭىرلەرىنەن (الماتى جانە ماڭعىستاۋ وبلىسى، الماتى، اقتاۋ، اتىراۋ، شىمكەنت، پەتروپاۆل، پاۆلودار، تاراز قالالارى) ىرىكتەلگەن 6 جاستان 21 جاسقا دەيىنگى دارىندى بالالاردىڭ شىعارماشىلىق جۇمىستارى ۇسىنىلادى.  ونەر تۋىندىلارىنىڭ ىشىندە تالانتتى بالالاردىڭ (اعاش، مەتالل، پلاستماسسا، ماتا، ءجۇن، شي جانە ت.ب.) جۇمىستارىندا بەينەلەنگەن ءارتۇرلى تۇرلەر مەن تەحنيكالاردى، ماتەريالداردى، تاقىرىپتار مەن يدەيالاردى كورسەتەتىن كەسكىندەمە، گرافيكا، ساندىك – قولدانبالى ونەر بۇيىمدارى بار. 

ەكسپوزيسيا بالالاردىڭ ەستەتيكالىق سەزىمىن، كوركەمدىك تالعامىن وياتاتىن شىعارماشىلىق قيالدىڭ دامۋ پروسەسىن ايقىن كورسەتەدى. شىعارماشىلىق جۇمىستار ارقىلى ءار ءتۇرلى ەلدەردىڭ بالالارى باسقا حالىقتاردىڭ ءومىرى مەن داستۇرلەرىن، ولاردىڭ ۇلتتىق جانە مادەني ەرەكشەلىكتەرىن ءتۇسىنۋدى ۇيرەنەدى.  

كورمە جوعارى وقۋ ورىندارىنىڭ قولداۋىمەن ۇيىمداستىرىلادى. كورمە اياسىندا ساندىك-قولدانبالى ونەر بويىنشا ەكى شەبەرلىك-ساباق وتەدى. قازاقتىڭ ۇلتتىق كيىمىنىڭ ءسان ۇلگىسى كورسەتىلەدى.