بىلتىر قازاقستاندىقتار سيفرلىق قۇجاتتاردى 32 ملن رەت پايدالانعان.
بۇل تۋرالى سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين ءماجىلىستىڭ جالپى وتىرىسىندا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بىلتىر ەل تۇرعىندارى سيفرلىق قۇجاتتاردى 32 ملن رەت پايدالانسا، 2020 جىلى نەبارى 3،6 ملن رەت قولدانىلعان. زاڭ جوباسىندا ەلەكتروندىق قۇجاتتاردى قاعاز تۇرىندەگى بالاماسىمەن تەڭ دارەجەلى ەتىپ زاڭداستىرۋ، ەلەكتروندىق قۇجاتتاردى تولىققاندى قولدانۋعا كەدەرگى كەلتىرەتىن زاڭدارداعى قايشىلىقتار مەن ءارتۇرلى وقىلىمداردى الىپ تاستاۋ جانە سيفرلىق قۇجاتتاردىڭ قولدانىلۋ اياسىن كەڭەيتۋ كوزدەلگەن»، - دەدى باعدات مۋسين.
ونىڭ مالىمەتىنشە، زاڭ جوباسىندا تۋۋ، نەكە قيۋ جانە نەكەنى بۇزۋ تۋرالى كۋالىكتەر سياقتى ازاماتتىق حال اكتىلەرىن مەملەكەتتىك تىركەۋ جونىندەگى قۇجاتتاردى ەلەكتروندىق فورماتقا اۋىستىرۋ قاراستىرىلعان.
«بۇل ازاماتتار ءۇشىن ىڭعايلى بولماق، ويتكەنى مەكەمەلەرگە بارۋ مىندەتىنەن بوساتىلادى، ازامات كەز كەلگەن ۋاقىتتا قۇجاتتى باسىپ شىعارا الادى نەمەسە QR-كودى بار ەلەكتروندىق نۇسقاسىن ۇسىنادى. ونىڭ ۇستىنە، قۇجاتتى جوعالتىپ السا، تەلنۇسقا جاساتۋ قاجەت ەمەس. ازامات ءوزى قالاسا نەمەسە شەتەلگە كەتكەن جاعدايدا قۇجاتتى قاعازعا باسىپ شىعارا الاتىن بولادى»، - دەدى مينيستر.
ايتا كەتەيىك، بۇگىنگى ءماجىلىستىڭ جالپى وتىرىسىندا ايدوس سارىم ءماجىلىستىڭ حالىقارالىق ىستەر، قورعانىس جانە قاۋىپسىزدىك كوميتەتىنە اۋىستى.