الەۋمەتتىك جەلىلەردە قازاقستان اۋماعىنا اكەلىنگەن اۆتوكولىكتى كەدەندىك تازارتۋدان وتكىزۋ ءۇشىن كەدەندىك باج ستاۆكاسى ۇلعايدى دەگەن اقپارات تاراپ جاتىر. مەملەكەتتىك كىرىستەر كوميتەتى بۇل اقپاراتتى رەسمي تۇردە جوققا شىعارادى.
كەدەن باجىنىڭ ستاۆكاسىن ەۋرازيا ەكونوميكالىق كوميسسياسى بەلگىلەيدى (ەەك كەڭەسىنىڭ 2021 جىلعى 14 قىركۇيەكتەگى № 80 شەشىمى) جانە بۇل ستاۆكا قازاقستان رەسپۋبليكاسى ءۇشىن مىندەتتى بولىپ تابىلادى. «جەڭىل اۆتوكولىكتەرگە ارنالعان باج ستاۆكاسى 2022 جىلى وزگەرىسسىز قالدى، دەپ حابارلايدى Almaty-akshamy.kz
كەرىسىنشە، ەۋرازيالىق ەكونوميكالىق وداق كەڭەسىنىڭ 2022 جىلعى 17 ناۋرىزداعى № 39 شەشىمىمەن ءتيىستى قۇجاتتار ۇسىنىلعان جاعدايدا ەلەكتروموبيلدەردى باج مولشەرلەمەسىنىڭ 15%-ىنان بوساتۋ تۇرىندەگى جەڭىلدىك بەرىلدى.
ۇسىنىلاتىن قۇجات ءتۇرىن يندۋستريا جانە ينفراقۇرىلىمدىق دامۋ مينيسترلىگى بەلگىلەيدى. 2022 جىلعى 5 ساۋىردەگى № 46 شەشىمىمەن دايىن ءونىمدى وندىرۋگە ارنالعان شيكىزات جانە ماتەريالدار سياقتى «سەزىمتال» تاۋارلاردىڭ جەكەلەگەن ساناتتارىنا كەدەندىك اكەلۋ باجىنىڭ 0% مولشەرلەمەسى ەنگىزىلدى»، - دەلىنگەن كوميتەت حابارلاماسىندا.
سونىمەن قاتار، تاۋارلاردىڭ كەدەندىك قۇنى ەاەو كەدەن كودەكسىنىڭ 5-تاراۋىنا (تاۋارلاردىڭ كەدەندىك قۇنىن ايقىنداۋدىڭ التى ءادىسى) جانە ەۋرازيا ەكونوميكالىق كوميسسيا القاسىنىڭ 2018 جىلعى 27 ناۋرىزداعى № 42 شەشىمىنە سايكەس ايقىندالادى.
اۆتوكولىك ساتىپ الۋ كەزىندە ازاماتتار اۋماقتىق مەملەكەتتىك كىرىستەر دەپارتامەنتتەرىنە بارىپ، كەدەندىك تازارتۋدان وتكىزگەنى ءجون. زاڭسىز ىس-ارەكەتتەر فاكتىلەرى جانە شاعىمدانۋ ءۇشىن باسقا دا نەگىزدەر بولعان جاعدايدا، 14-14 قىسقا نومىرىنە نەمەسە 8-7172-71-81-71 نومىرىنە حابارلاۋعا بولادى. سونىمەن قاتار، ۋتيليزاسيالىق الىم مەن كەدەندىك باج بىر-بىرىنە ۇقسامايتىن ەكى بولەك الىم جانە ءبىر-بىرىن الماستىرا المايتىنىن ەسكەرۋ قاجەت.
قازاقستان رەسپۋبليكاسىنداعى تاريفتىك ساياسات شارالارى - ساۋدا جانە ينتەگراسيا مينيسترلىگىنىڭ قۇزىرەتىنە، ال ۋتيليزاسيالىق الىم مولشەرلەمەسىن بەكىتۋ - يندۋستريا جانە ينفراقۇرىلىمدىق دامۋ مينيسترلىگىنىڭ قۇزىرەتىنە جاتادى.