220 اۋىلدا كەشەندى بلوك-مودۋل ورناتۋ جوسپارلانعان.
قازاقستان ۇكىمەتى ۇستىمىزدەگى جىلى مەملەكەت ازاماتتارىن تازا اۋىز سۋمەن قامتۋ ماقساتىندا 215 ملرد تەڭگە جۇمساۋدى كوزدەپ وتىر. بۇل تۋرالى قازاقستاننىڭ يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ ايتتى، دەپ حابارلايدى Almaty-akshamy.kz.
ييدم باسشىسىنىڭ اقپاراتى بويىنشا، اۋىلدىق جەرلەردە سۋمەن جابدىقتاۋ كورسەتكىشتەرى بويىنشا الماتى (99،1%)، اتىراۋ (99%)، قىزىلوردا (97،8%) جانە ماڭعىستاۋ وبلىستارى (96،2%) اكىمدىكتەرى كوش باسىندا. اۋىلدىق ەلدى مەكەندەردە اۋىز سۋمەن قامتۋدىڭ ەڭ تومەنگى دەڭگەيى قوستاناي (74،9%) جانە سولتۇستىك قازاقستان وبلىستارىندا (83،5%) بايقالادى.
«ايتا كەتەرلىگى، كورسەتكىشتەرى تومەن وڭىرلەرگە سۋمەن قامتاماسىز ەتۋ دەڭگەيىن ارتتىرۋ ءۇشىن باسىم نەگىزدە قاراجات بولىنەدى. ماسەلەن، 2022 جىلى وسى ماقساتتا رەسپۋبليكالىق بيۋدجەتتەن 215 ملرد تەڭگە كوزدەلگەن. سونداي-اق، تاعى 120 اۋىلدى ورتالىقتاندىرىلعان سۋ جۇيەسىمەن قامتاماسىز ەتىپ، حالىق سانى از 220 اۋىلعا كەشەندى بلوك-مودۋلدەر ورناتۋ جوسپارلانۋدا»، - دەلىنگەن مينيسترلىكتىڭ باسپا ءسوز قىزمەتىنىڭ حابارلاماسىندا.
مامانداردىڭ ايتۋىنشا، اۋىلداردى سۋمەن قامتاماسىز ەتۋ بارىسىنا مونيتورينگ جاساۋ ءۇشىن ينتەراكتيۆتى كارتا ازىرلەگەن بولاتىن. اتالعان كارتا عالامتوردا قولجەتىمدى.
«كارتادا سۋمەن جابدىقتاۋ قىزمەتتەرىمەن قامتاماسىز ەتۋ، قارجىلاندىرۋ كولەمى، حالىق سانى، توزۋ دەڭگەيى جانە باسقا دا وزەكتى اقپارات كورسەتىلگەن. حالىقتى ساپالى اۋىز سۋمەن قامتاماسىز ەتۋ ماسەلەسى ءبىزدىڭ تۇراقتى باقىلاۋىمىزدا ەكەنىن ەسكەرە وتىرىپ، جەرگىلىكتى اتقارۋشى ورگاندار ينتەراكتيۆتى كارتانى ساپالى جانە ۋاقتىلى تولتىرۋى قاجەت»، – دەپ اتاپ ءوتتى قايىربەك وسكەنبايەۆ.
حالىقپەن كەرى بايلانىس ورناتۋ ماقساتىندا ازاماتتاردىڭ بارلىق ءوتىنىشىن قابىلداۋ مەن وڭدەۋگە ارنالعان ءبىرىڭعاي پلاتفورما ارقىلى كارتاعا قوسىمشا فۋنكسيالاردى قوسۋ بويىنشا شارالار قابىلدانعان.
سونداي-اق، ۆەدومستۆو باسشىسى سالىنعان سۋ قۇبىرى جەلىلەرى ءىس جۇزىندە اكىمدىكتەردىڭ تەڭگەرىمىندە قالىپ نە بولماسا بىلىكتى ماماندارى مەن ارنايى مامانداندىرىلعان تەحنيكاسى جوق كاسىپورىندار مەن ۇيىمدارعا بەرىلىپ جاتاتىنىنا باسا نازار اۋداردى.
«سۋمەن جابدىقتاۋ جەلىلەرىنە اكىمدىكتەرمەن قاتار بۇل جۇمىسقا بەيىندەلمەگەن كاسىپورىندار قىزمەت كورسەتەدى. بۇل ءوز كەزەگىندە جەلىلەردىڭ تەز ارادا توزۋىنا اكەپ سوعادى جانە قايتا قالپىنا كەلتىرۋ ءۇشىن قوسىمشا شىعىندى تالاپ ەتەدى. وسىعان بايلانىستى «ءبىر اۋدان – ءبىر كاسىپورىن» قاعيداتى بويىنشا سۋ ارنالارىن ىرىلەندىرۋ ۇسىنىلادى. بۇل شارا كورسەتىلەتىن قىزمەت ساپاسىن جانە جۇمىس تيىمدىلىگىن ارتتىرۋعا مۇمكىندىك بەرەدى»، – دەدى مينيستر.