بىلتىر الماتىدا كولىك اپاتى كوپ بولعان

ەل بويىنشا 19،5 مىڭ ادام زارداپ شەككەن.

2022 جىلدىڭ قاڭتار-قاراشا ايلارىندا ەلىمىزدە 13،4 مىڭ جول-كولىك وقيعاسى تىركەلگەن، دەپ حابارلايدى Almaty-akshamy.kz Ranking.kz-كە سىلتەمە جاساپ.

بۇل 2021 جىلمەن سالىستىرعاندا 9،2%-عا ارتىق. ونىڭ ىشىندە 1،7 مىڭ وقيعا قايعىلى جاعدايمەن اياقتالعان.

كولىك اپاتىنا 11،6 مىڭ جاعدايعا جۇرگىزۋشىلەردىڭ، 378-سىنە جاياۋ جۇرگىنشىلەردىڭ، ۇشەۋىنە كوممۋنالدىق قىزمەتتەردىڭ، ال ءبىر جاعدايعا جول قىزمەتتەرى مەن مەردىگەرلەردىڭ قاتىسى بار.

جول-كولىك وقيعالارىنىڭ ءجيى بولاتىن كۇنى – دۇيسەنبى. بۇدان بولەك جول اپاتتارى سەنبى مەن سەيسەنبىدە دە تىركەلگەن.

ەلدەگى بارلىق جول-كولىك وقيعالارىنىڭ 68%-ى كۇندىز، 19%-ى ىمىرت تۇسكەن كەزدە، 12%-ى تۇندە تىركەلگەن.

جول-كولىك وقيعالارىنىڭ ىشىندە جاياۋ جۇرگىنشىلەردى قاعىپ كەتۋ جاعدايى ءجيى كەزدەستى (5 مىڭ وقيعا). كولىكتەردىڭ سوقتىعىسۋى – 3،2 مىڭ جاعداي، كولىكتەردىڭ اۋدارىلۋى – 1،2 مىڭ جاعداي، كەدەرگىلەرگە سوعىلۋ – 514 جاعداي، جولاۋشىلاردىڭ قۇلاۋى – 339 جاعداي.

ەلىمىز بويىنشا كولىك اپاتىنىڭ باسىم بولىگى الماتىدا تىركەلگەن: 3،5 مىڭ اپات. انتيليدەرلەردىڭ ۇشتىگىنە الماتى (1،9 مىڭ جاعداي) جانە جامبىل (1،4 مىڭ) وبلىستارى كىردى. جول-كولىك وقيعالارىنىڭ ەڭ از سانى ۇلىتاۋ، اباي جانە جەتىسۋ وبلىستارىندا تىركەلدى.

تۇركىستان وبلىسىندا تىركەلگەن جول اپاتتارىنىڭ باسىم بولىگى قايعىلى جاعدايمەن اياقتالدى (وڭىردەگى جكو جالپى سانىنىڭ 37%-ى). ودان كەيىنگى ورىنداردا  قاراعاندى (33،9%)، ۇلىتاۋ (33،3%)، اباي (29،8%) جانە قىزىلوردا (23،4%) وبلىستارى بار.

2022 جىلدىڭ 11 ايىندا ەلدە جول-كولىك وقيعالارى سالدارىنان 19،5 مىڭ ادام زارداپ شەكتى. بۇل 2021 جىلعا قاراعاندا 9%-عا كوپ. ونىڭ ىشىندە 17،3 مىڭ ادام (9،6 مىڭ ەر ادام، 7،7 مىڭ ايەل) جاراقات الىپ، 2،2 مىڭى (1،7 مىڭ ەر ادام، 568 ايەل) قازا تاپتى.

وڭىرلىك بولىنىستە جول اپاتىنان ەڭ كوپ زارداپ شەككەندەر الماتى قالاسى (4،1 مىڭ ادام)، الماتى (3،1 مىڭ ادام) جانە جامبىل وبلىستارىندا (2،3 مىڭ ادام) بايقالدى.

«ۇلتتىق شۇعىل مەديسينانى ۇيلەستىرۋ ورتالىعىنىڭ جەدەل دەرەكتەرىنە سايكەس، 2023 جىلدىڭ العاشقى 3 كۇنىندە جول اپاتىنان 116 ادام زارداپ شەكتى. ونىڭ ىشىندە 26-سى بالا، ۇشەۋى – جۇكتى ايەل. 76 ادام اۋرۋحاناعا جەتكىزىلدى، 9-ى قازا تاپتى»، - دەلىنگەن حابارلامادا.