جەنيەۆادا ورتالىق ازيا ەلدەرى دەلەگاسيالارىنىڭ كەزدەسۋى ءوتتى.
باسقوسۋدا بۇۇ ەۋروپالىق ەكونوميكالىق كوميسسياسى ترانسكاسپيي حالىقارالىق كولىك ءدالىزىن جۇزەگە اسىرۋ يدەياسىن قولدادى. ۇيىمنىڭ ايماق ەكونوميكاسىنا ارنالعان ارنايى باعدارلاماسىن ءتيىمدى دامىتۋ جونىندە بىرلەسكەن مالىمدەمە قابىلداندى، دەپ حابارلايدى Almaty-akshamy.kz 24.kz-كە سىلتەمە جاساپ.
قازاقستان بۇۇ-نىڭ ارنايى باعدارلاماسىن ورتالىق ازيا ەكونوميكاسىن دامىتۋ ءۇشىن قولدانۋدى جالعاستىرادى. ەلىمىز جوبانى ودان ءارى دامىتۋدى قولدايدى.
«ءبىز بۇل باعدارلامانى ۇلتتىق باستامالار مەن بۇۇ-نىڭ ايماقتاعى ەكونوميكالىق ىنتىماقتاستىقتى نىعايتۋعا باعىتتالعان بىرەگەي الاڭ دەپ قاراستىرامىز. كولىك باعىتتارىن ءارتاراپتاندىرۋ، ساۋدانى ىنتالاندىرۋ، ينفراقۇرىلىمدى دامىتۋ، سيفرلاندىرۋ قازاقستان ەكونوميكاسىنىڭ باستى باعىتتارىنىڭ ءبىرى بولىپ سانالادى»، - دەيدى ق ر ۇلتتىق ەكونوميكا ءمينيسترى الىبەك قۋانتىروۆ.
«2022 جىل بۇۇ ەۋروپالىق ەكونوميكالىق كوميسسياسى ءۇشىن وزگەرىستەرگە تولى، كۇردەلى جىل بولدى. ءبىز قازاقستاننىڭ حالىقارالىق ۇيىم الاڭىندا جۇزەگە اسىرعان شارالارىن جوعارى باعالايمىز. قازاقستان تاراپى الماتىدا ەكونوميكالىق فورۋم مەن باسقارۋشى كەڭەستىڭ وتىرىسىن وتە جاقسى ۇيىمداستىردى. كەزدەسۋلەردە ماڭىزدى شەشىمدەر قابىلداندى»، - دەيدى بۇۇ ەۋروپالىق ەكونوميكالىق كەڭەسى اتقارۋشى حاتشىسىنىڭ ورىنباسارى دميتريي مارياسين.
مينيستر ءازىربايجاننىڭ بۇۇ-نىڭ ارنايى باعدارلاماسىنا ءتوراعالىق جاساۋىنا قولداۋىن ءبىلدىردى. وسى ەلدىڭ پرەزيدەنتى يلحام الييەۆتىڭ قازاقستانعا ساپارىنا توقتالدى. باۋىرلاس مەملەكەتتەر حالىقارالىق ۇيىم مەن ورتالىق ازياداعى باستامالارىن ۇيلەستىرىپ وتىرۋعا ۋاعدالاسقانىن اتاپ ءوتتى.
«قازاقستاننىڭ كوشباسشىلىعىمەن ايماقتا كولىك، ەنەرگەتيكا، ساۋدا، ورمان جانە تۇرعىن ءۇي سالۋ سالالارىندا جاڭا ىنتىماقتاستىق تۇرلەرى دامىپ كەلەدى. وڭىردە ەنەرگەتيكالىق سەرىكتەستىككە دە كوپ دەن قويىلىپ وتىر. ءبىز قازاقستان جانە شەكارالاس ەلدەرمەن سۋدى پايدالانۋ، جاسىل ەنەرگەتيكاعا كوشۋ، كومىرقىشقىل گازىن شىعارۋدى ازايتۋ جانە كولىك سالاسىندا بىرلەسىپ ارەكەت ەتۋگە كۇش سالىپ جاتىرمىز»، - دەيدى بۇۇ ەۋروپالىق ەكونوميكالىق كەڭەسى اتقارۋشى حاتشىسىنىڭ ورىنباسارى دميتريي مارياسين.
ورتالىق ازيا ەلدەرىنىڭ وكىلدەرى باسقوسۋدا ساۋدا، ينفراقۇرىلىمدى دامىتۋ، سيفرلاندىرۋ جانە جاسىل تەحنولوگيا ماسەلەلەرىن تالقىلادى. ساۋدا-ەكونوميكالىق ىنتىماقتاستىق پەن ۇيىمنىڭ تۇراقتى دامۋ ماقساتتارىن قاراستىردى. كەزدەسۋ سوڭىندا بىرلەسكەن قارار قابىلداندى.