انتيكور ميللياردتاعان اقشا جىمقىرعان ەسەپشىنىڭ ءىسىن قولعا الدى

سىبايلاس جەمقورلىققا قارسى قىزمەت جەتىسۋ وبلىسىنىڭ پروكۋراتۋراسىنىڭ ۇيلەستىرۋىمەن تالدىقورعان قالاسىنىڭ ءبىلىم ءبولىمىنىڭ قىزمەتكەرلەرىن ۇستادى.

اتالعان ازاماتتار ءبىلىم بەرۋ سالاسىندا ءىس جۇزىندە جۇمىس ىستەمەيتىن ۇلەستەس تۇلعالاردىڭ پايداسىنا جالاقى تۇرىندەگى وتەۋسىز اۋدارۋ جولىمەن اسا ءىرى مولشەردە بيۋدجەت قاراجاتىن جۇيەلى نەگىزدە ۇرلادى دەپ كۇدىكتەنەدى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

الدىن الا كەلتىرىلگەن زالال سوماسى شامامەن 2 ملرد تەڭگەنى قۇرادى.

«قازىرگى تاڭدا ءىستىڭ ءمان-جايلارىنا تيەسىلى 29 جىلجىمايتىن مۇلىك وبەكتىسىنە، قىمبات اۆتوكولىكتەرگە تىيىم سالىندى. كۇدىكتى ادامدار ۇستالىپ، سوتتىڭ سانكسياسىمەن قاماۋعا الىندى. سوتقا دەيىنگى تەرگەۋ جالعاسۋدا»، - دەپ جازدى انتيكوردان.

قپك-نىڭ 201-بابىنا سايكەس، تەرگەۋ مۇددەسى ءۇشىن وزگە اقپارات جاريا ەتۋگە جاتپايدى.

سونىمەن بىرگە، كونستيتۋسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروسەستىك كودەكسىنىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءارقايسىسى كىناسىز دەپ ەسەپتەلەدى.

بۇعان دەيىن پروكۋراتۋرا تالدىقورعاندىق ەسەپشىلەردىڭ ۇستالعانىن راستاعان.