بۇل تۋرالى ق ر وقۋ-اعارتۋ ۆيسە-مينيسترى ەدىل وسپان ورتالىق كوممۋنيكاسيالار قىزمەتىندە وتكەن بريفينگتە مالىمدەدى. مۇندا ەلىمىزدە بالالار قۇقىقتارىن قورعاۋ جۇيەسىن نىعايتۋ ماسەلەلەرى تالقىلاندى، دەپ حابارلايدى
ق ر وقۋ-اعارتۋ ۆيسە-مينيسترى ەدىل وسپان قازاقستاننىڭ بالالار قۇقىقتارىن قورعاۋ بويىنشا حالىقارالىق ستاندارتتارعا بەيىلدىلىگىن راستايتىنىن اتاپ ءوتتى. 2023 جىلدىڭ جەلتوقسانىندا بالا قۇقىقتارى تۋرالى كونۆەنسيانىڭ حابارلاۋ راسىمىنە قاتىستى فاكۋلتاتيۆتىك حاتتاماسى راتيفيكاسيالاندى. بۇل قۇجات بالالاردىڭ قۇقىقتارى بۇزىلعان جاعدايدا حالىقارالىق دەڭگەيدە شاعىم تۇسىرۋگە مۇمكىندىك بەرەدى.
«بيىلعى جىلدىڭ قاڭتار ايىندا بۇۇ-عا مۇشە مەملەكەتتەر قازاقستاننىڭ ادام قۇقىقتارى مەن بوستاندىقتارىن نىعايتۋعا، سونداي-اق بالالاردىڭ قۇقىقتارىن قورعاۋعا باعىتتالعان رەفورمالارىن ءبىراۋىزدان جوعارى باعالادى. بۇل رەفورمالار قوعامنىڭ ەڭ وسال توپتارىن قورعاۋدى قامتاماسىز ەتەتىن ۇزاق مەرزىمدى ستراتەگيالاردى ىسكە اسىرۋ جولىنداعى ماڭىزدى قادام بولدى. مەملەكەت باسشىسىنىڭ تاپسىرماسى بويىنشا ەلىمىزدە بالالاردىڭ قۇقىقتارىن حالىقارالىق ستاندارتتارعا ساي جان-جاقتى ءارى ءتيىمدى قورعاۋعا باعىتتالعان اۋقىمدى زاڭنامالىق جانە ستراتەگيالىق شارالار ەنگىزىلۋدە»، – دەپ اتاپ ءوتتى ەدىل وسپان.
2024 جىلى قازاقستاندا بالالاردى قورعاۋدى كۇشەيتۋگە باعىتتالعان التى نەگىزگى زاڭ قابىلداندى. جاڭا زاڭدارعا سايكەس، بالالارعا قاتىستى كەز كەلگەن زورلىق-زومبىلىق تۇرلەرىنە جاۋاپكەرشىلىك كۇشەيتىلدى. سونىمەن قاتار، قوعامدىق كولىكتەن بالالاردى ءماجبۇرلى تۇردە تۇسىرۋگە تىيىم سالىنىپ، ول ءۇشىن اكىمشىلىك جاۋاپكەرشىلىك ەنگىزىلدى. قۇرىلىس كومپانيالارىنا تەرەزەلەرگە قاۋىپسىزدىك مەحانيزمدەرىن ورناتۋ تالابى زاڭنامالىق تۇردە بەكىتىلدى. بۇل بالالاردىڭ جازاتايىم وقيعالاردان قورعالۋىنا ىقپال ەتەدى. سونىمەن بىرگە، بالالار ساۋداسىنىڭ الدىن الۋ شارالارى كۇشەيتىلدى. بالالار قۇقىقتارى جونىندەگى ۋاكىل ينستيتۋتىنىڭ مارتەبەسى ارتتىرىلىپ، ولار ەلدىڭ بارلىق وڭىرلەرىندە جۇمىس جاساي باستادى. بۇل بالالاردىڭ قۇقىقتارىن قورعاۋ مەحانيزمدەرىن ايتارلىقتاي نىعايتتى. قامقورشىلىق جانە قورعانشىلىق ورگاندارىنىڭ كادرلىق الەۋەتىن ارتتىرۋ ءۇشىن جاڭا نورماتيۆ ەنگىزىلدى: ەندى ءاربىر 5000 بالاعا كەمىندە ءبىر مامان بەكىتىلۋى قاجەت. بۇل جاڭاشىلدىق ءبىر جىلدىڭ ىشىندە ماماندار سانىن 300-گە ارتتىرۋعا مۇمكىندىك بەردى، ناتيجەسىندە بالالاردىڭ قۇقىقتارىن قورعاۋ دەڭگەيى ايتارلىقتاي جاقساردى.
سونىمەن قاتار، جەتىم بالالاردى قولداۋ ماقساتىندا تالىمگەرلىك ينستيتۋتى ەنگىزىلدى. وسى باستاما اياسىندا 2024 جىلى 330 بالا جەكە تالىمگەرلىك قولداۋعا يە بولىپ، ولاردىڭ قوعامعا الەۋمەتتىك بەيىمدەلۋىنە جانە پسيحولوگيالىق قولداۋ الۋىنا مۇمكىندىك جاسالدى.