2025 جىلعى 1 قىركۇيەكتەن باستاپ قازاقستاننىڭ بارلىق مەكتەپتەرى مەن كوللەدجدەرىندە بالالاردىڭ ەموسيونالدىق ءال-اۋقاتىن قامتاماسىز ەتۋگە باعىتتالعان «دوسبولLiKe» انتيبۋللينگتىك باعدارلاماسى ەنگىزىلەدى.
بۇل تۋرالى بۇگىن ورتالىق كوممۋنيكاسيالار قىزمەتىندە وتكەن بريفينگتە سالا وكىلدەرى مالىمدەدى، دەپ حابارلايدى aqshamnews.kz.
قازىرگى ۋاقىتتا باعدارلاما ەلىمىزدىڭ 9 وڭىرىندە پيلوتتىق رەجيمدە سىنالۋدا. وعان 70 مىڭعا جۋىق وقۋشى مەن 5 مىڭنان استام پەداگوگ قاتىسۋدا.
«بۇل باستاما وقۋشىلاردىڭ داۋ-جانجالدارعا كونسترۋكتيۆتى تۇردە جاۋاپ بەرۋ داعدىلارىن قالىپتاستىرۋعا، الەۋمەتتىك-ەموسيونالدىق قابىلەتتەرىن دامىتۋعا، تۇلعاارالىق جانە توپارالىق قارىم-قاتىناستاردى وڭتايلاندىرۋعا، سونداي-اق بالالاردىڭ جالپى پسيحولوگيالىق ءال-اۋقاتىن ارتتىرۋعا باعىتتالعان. ءاربىر بالانىڭ ءوزىن ءقاۋىپسىز سەزىنەتىن جانە تولىققاندى داميتىن ورتادا ءبىلىم الۋىنا جاعداي جاساۋ – اسا ماڭىزدى قادام»، – دەپ اتاپ ءوتتى ق ر وقۋ-اعارتۋ ۆيسە-مينيسترى ەدىل وسپان.
باعدارلاما پيلوتتىق جوبا رەتىندە جۇزەگە اسىرىلىپ جاتقان وڭىرلەردە بارلىق قاتىسۋشىلارعا ارنالعان وقىتۋ كۋرستارى مەن پراكتيكالىق شارالار ۇيىمداستىرىلۋدا. ولار بۋللينگتىڭ الدىن الۋ، قاقتىعىس جاعدايلارىنىڭ سەبەپتەرى مەن فاكتورلارىن انىقتاۋ، سونداي-اق ولاردى شەشۋ جولدارىن تۇسىندىرۋگە باعىتتالعان.
سونىمەن قاتار وقۋشىلار مەن ولاردىڭ اتا-انالارىنا ارنالعان ءىس-شارالار وتكىزۋ كوزدەلگەن، وندا «دوسبولLiKe» باعدارلاماسىنىڭ ماقساتى مەن ىسكە اسىرۋ ادىستەرى تۇسىندىرىلەدى.