بۇل تۋرالى ق ر ءسىم باسپا ءسوز قىزمەتى ءمالىم ەتتى.
قازاقستاننىڭ بىرىككەن ۇلتتار ۇيىمى (بۇۇ) جانىنداعى تۇراقتى وكىلى اقان راحمەتۋللين بۇۇ قارۋسىزدانۋ كوميسسياسىنىڭ جىل سايىنعى سەسسياسىنىڭ ءتوراعاسى بولىپ سايلاندى، دەپ حابارلايدى Almaty-akshamy.kz ءسىم باسپا ءسوز قىزمەتىنە سىلتەمە جاساپ.
"قازاقستاننىڭ باستاماسىمەن بىرىككەن ۇلتتار ۇيىمىنىڭ قارۋسىزداندىرۋ جونىندەگى كوميسسياسىنىڭ جىل سايىنعى سەسسياسىنىڭ ءتوراعاسى لاۋازىمىنا قازاقستان رەسپۋبليكاسىنىڭ بۇۇ جانىنداعى تۇراقتى وكىلى اقان راحمەتۋلليننىڭ كانديداتۋراسى ۇسىنىلىپ، ءبىراۋىزدان ماقۇلداندى"، - دەلىنگەن حابارلامادا.
"تاۋەلسىز قازاقستان تاريحىندا تۇڭعىش رەت ەلىمىزدىڭ وكىلى سايلانعان ماڭىزدى ورگانعا تابىستى ءتوراعالىق ەتۋ ءۇشىن الدا كوپ جۇمىس كۇتىپ تۇر"، - دەلىنگەن ءسىم حابارلاماسىندا.
بۇۇ-نىڭ قارۋسىزدانۋ جونىندەگى كوميسسياسى باس اسسامبلەياعا باعىناتىن كونسۋلتاتيۆتىك-كەڭەسشى ورگان. ونىڭ قىزمەتى قارۋسىزدانۋ سالاسىنداعى ءتۇرلى پروبلەمالاردى قاراستىرۋ جانە ۇسىنىستار بەرۋ بولىپ تابىلادى. سەسسيا جۇمىسى 21 ساۋىرگە دەيىن جالعاسادى.