ءفيلمنىڭ باستى كەيىپكەرلەرى – ارنايى جاساقتىڭ ءۇش جاۋىنگەرى.
1 قاراشادا الماتى قالاسىندا ق ر مادەنيەت جانە اقپارات مينيسترلىگى مەن ءوزارا ىقپالداستىق ورگاندارى وكىلدەرىنىڭ، ءفيلمنىڭ شىعارماشىلىق توبى مەن اكتەرلەرىنىڭ قاتىسۋىمەن «BURKIT – ارنايى جاساق» اتتى كوركەمسۋرەتتى ءفيلمىنىڭ تۇساۋكەسەرى وتەدى، دەپ حابارلايدى Almaty-akshamy.kz
كوركەم تۋىندى بىلتىر مادەنيەت جانە اقپارات مينيسترلىگى ۇلتتىق كينونى قولداۋ مەملەكەتتىك ورتالىعىنىڭ تاپسىرىسى بويىنشا ەلىمىزدىڭ ەڭ تانىمال اكتەرلەرىنىڭ قاتىسۋىمەن ءتۇسىرىلدى جانە وڭدەۋ جۇمىستارىن گولليۆۋدتىڭ وڭدەۋشى رەجيسسەرى اتقارعان.
تۋىندى اۆتورلارىنىڭ باستى ماقساتى – كينوكارتينانىڭ كەيىپكەرلەرى ارقىلى وتانعا دەگەن سۇيىسپەنشىلىكتى، دوستىق پەن ءپاتريوتيزمدى، نامىس پەن ابىرويدى، اسكەري انتقا جانە قىزمەتتىك مىندەتكە دەگەن ادالدىقتى، سونىمەن قاتار، قازاقستاننىڭ ارنايى ماقساتتاعى بولىمشەلەرىنىڭ نەگىزگى مىندەتتەرىن كورەرمەنگە جەتكىزۋ.
كينوتۋىندىدا قورعاۋشى ميسسياسىن ورىنداۋدا، دوستىقتى ساقتاۋعا جانە ءوزىنىڭ ارمانىنا – ارنايى كۇشتەردىڭ سيمۆولىنا اينالعان «كۇرەڭ بەرەتكە» جەتۋ جولىندا ادامنىڭ قانشالىقتى وزگەرۋى مۇمكىن ەكەندىگى تۋرالى باياندالادى. ونىڭ باستى كەيىپكەرلەرى – ارنايى جاساقتىڭ ءۇش جاۋىنگەرى ءارى ەڭ جاقىن ءۇش دوس «كۇرەڭ بەرەت» يەلەنۋدى ارماندايدى. جاۋىنگەرلەردىڭ كۇندەلىكتى مىندەتتەرى ءقاۋىپتى قىلمىستىق توپتارعا قارسى تۇرۋ. سونداي تاپسىرمالاردىڭ بىرىندە ولاردىڭ دوستىعى سىنالادى.
«ءفيلمنىڭ پرەمەراسى الداعى كۇندەرى، 2 قاراشادا باستالادى. ال كينوكارتينانىڭ العاشقى تانىستىرىلىمى ءال-فارابي داڭعىلى، 77/8 ءۇي، «ESENTAI Mall» سوو-دا ورنالاسقان Kinopark زالىندا ساعات 19.00-دە وتەدى»، دەپ حابارلادى ق ر ۇلتتىق ۇلانىنىڭ باسپا ءسوز قىزمەتى.