قاراشانىڭ 4 مەن 5 كۇندەرى وڭتۇستىك استانادا حالىقارالىق Almaty Food Fest گاسترونوميالىق فەستيۆالى وتەدى.
ءداستۇر بويىنشا، اباي اتىنداعى الاڭ بىرنەشە تاقىرىپتىق اۋماققا ءبولىنىپ، وندا كەز-كەلگەن ادام الەم اسحانالارىنىڭ ءتۇرلى تاعامدارىنان ءدام تاتا الادى. شاراعا 10 مىڭنان استام ادام كەلەدى دەپ جوسپارلانىپ وتىر. ءىس-شارانى ۇيىمداستىرۋشى – الماتى قالاسىنىڭ تۋريزم باسقارماسى.
تۋريستىك باعىتتاردى تاڭداۋ كەزىندە ساياحاتشىلاردىڭ تاعامدارعا قاتىستى تالعامى ماڭىزدى ءرول اتقاراتىنى بەلگىلى. بۇگىنگى تاڭدا تۋريستەردىڭ كوبى جەرگىلىكتى مادەنيەتپەن تەرەڭىرەك تانىسۋدى قالايدى. ۇلتتىق تاعامدار - ءتول مادەنيەتتىڭ ءبىر بولشەگى. سوندىقتان گاسترونوميالىق تۋريزم دامىپ، بۇكىل الەم بويىنشا تانىمال ترەندكە اينالىپ كەلەدى. شەتەلدىك قوناقتارعا بەلگىلى ءبىر ەلدىڭ تاريحىن، ءسالت-داستۇرى مەن مادەنيەتىن جاقسىراق تۇسىنۋگە مۇمكىندىك بەرەتىن گاسترونوميالىق فەستيۆالدەردىڭ اسپازدىق تۋريزم سەكتورىنداعى ماڭىزى زور.
«Almaty Food Fest – الماتىنىڭ تۋريستەر مەن ناعىز تالعامپاز گۋرمانداردى تارتاتىنىنا ايقىن دالەل بولا الادى. بۇل ءىس-شارا ۇلتتىق مادەنيەت پەن اسحانامىزدىڭ بايلىعىن كورسەتىپ، قوناقتارعا جەرگىلىكتى سالت-داستۇرلەر مەن مادەني ەرەكشەلىكتەردى ايشىقتاي تۇسەتىن اتموسفەرانى سەزىنۋ مۇمكىندىگىن ۇسىنادى. سونداي-اق، فەستيۆال شەتەلدىك، ءارى جەرگىلىكتى ساياحاتشىلاردى تارتا وتىرىپ، قالامىزدىڭ گاسترونوميالىق ءتۋريزمنىڭ نەگىزگى باعىتى رەتىندەگى الەۋەتىن ارتتىرۋعا سەپتىگىن تيگىزەدى»، - دەيدى عاليا توقسەيىتوۆا، الماتى قالاسى تۋريزم باسقارماسىنىڭ جەتەكشىسى.
Almaty Food Fest ەكى كۇن قاتارىنان وتەدى. شارا وتەتىن ورىن رەتىندە اباي اتىنداعى الاڭ (رەسپۋبليكا سارايىنىڭ الدىندا) تاڭدالعان، ول بىرنەشە اسپازدىق اۋماققا بولىنەدى. مۇندا الەمنىڭ ءتۇرلى ۇلتتىق اسحانالارى ۇسىنىلادى، ونىڭ ىشىندە ازيالىق، امەريكالىق، گرۋزين، مەكسيكالىق جانە قازاقتىڭ ۇلتتىق تاعامدارى دا بار. جالپى العاندا، الماتىنىڭ 40-تان استام تانىمال تاماقتانۋ ورنى، وعان قوسا، قولونەرشىلەر مەن فەرمەرلەر ءوز ونىمدەرىن ورتاعا سالماق.
«گاسترونوميالىق فەستيۆالدەر مەيرامحانالار مەن جەرگىلىكتى تاعام ونىمدەرىن وندىرۋشىلەرگە باسەكەلەستەرىنەن وزگەشەلەنىپ، كوزگە تۇسۋگە كومەكتەسەدى. تاعامدار – ەلدىڭ وزىنە عانا ءتان بولمىسىن پاش ەتەتىن ەرەكشە اسپەكت. سوندىقتان مۇنداي اۋقىمدى گاسترونوميالىق شارالاردىڭ ءوتۋى جەرگىلىكتى ەكونوميكانى قولداۋعا، تۇراقتى ءتۋريزمدى ناسيحاتتاۋعا، سونىمەن قاتار، مادەني جانە ۇلتتىق مۇرانى تەرەڭىرەك تۇسىنۋگە ەلەۋلى ۇلەس قوسادى»، - دەپ پىكىر ءبىلدىردى الەكساندر پروشەنكوۆ، باس اسپاز.
قوناقتارعا گاسترونوميالىق ويىن-ساۋىق شارالارى دا ۇسىنىلماق، فەستيۆال اياسىندا اسپازدىق شوۋلارى مەن الەمدىك دەڭگەيدەگى باس اسپازداردىڭ شەبەرلىك دارىستەرى، بارمەندەر مەن باريستالار سايىسى، فەرمەرلىك ونىمدەر مەن شەبەرلەردىڭ قولىنان شىققان بۇيىمدار ساتىلاتىن جارمەڭكە ۇيىمداستىرىلادى. Almaty Food Fest 2023 شاراسىنىڭ شەتەلدىك قاتىسۋشىلارى قاتارىندا ۇلىبريتانيا، ءباا، كاتار مەن باسقا دا ەلدەردىڭ فۋد-بلوگەرلەرى بار. ولار فەستيۆال كەزىندە ۇسىنىلعان ۇلتتىق اسپازدىق تۋىندىلارعا بەينە-شولۋ جاسايدى. Almaty Food Fest شاراسىنا كەلەتىن قوناقتاردىڭ سانى 10 مىڭ ادامنان اسادى دەپ كوزدەلىپ وتىر.