دەمالىس ورنىن دامىتۋدىڭ باس جوسپارىن ازىرلەۋ ۇسىنىلدى
شىعىس قازاقستان وبلىسىنداعى بۇقتىرما سۋ قويماسىنىڭ جاعالاۋىندا كاسىپكەرلەر مەن تۇرعىندارعا جەر بەرۋ ۋاقىتشا توقتاتىلادى، دەپ حابارلايدى Almaty-akshamy.kz قازاقپارات-قا سىلتەمە جاساپ.
شقو اكىمدىگىندە وتكەن جينالىس بارىسىندا بۇقتىرما سۋ قويماسىنىڭ جاعالاۋىن كوركەيتىپ، دەمالۋشىلار سانىن ارتتىرۋ جايلى ءسوز قوزعالدى. وبلىستىق كاسىپكەرلىك جانە يندۋستريالدى-يننوۆاسيالىق دامۋ باسقارماسىنىڭ باسشىسى ەرنار مۇستافين دەمالىس ورنىن دامىتۋدىڭ باس جوسپارىن ازىرلەۋدى ۇسىندى.
«بۇگىندە جاعالاۋعا بوس جاتقان جەر تەلىمدەرى بار. كەيبىرەۋلەر سوندا اسىعىس-ۇسىگىس ۇيلەر سالىپ جاتىر. ولاردى توقتاتىپ، دەمالۋشىلارعا قولايلى جاعداي جاساۋ ءۇشىن جاعالاۋدى دامىتۋدىڭ باس جوسپارىن ازىرلەۋ كەرەك. الاكولدىڭ ۇلگىسى بويىنشا ينفراقۇرىلىمدى جاقسارتۋ ءۇشىن قانشا قاراجات قاجەت ەكەندىگىن انىقتاۋ قاجەت»، - دەدى ول.
ايماق باسشىسى دانيال احمەتوۆ بۇل ۇسىنىستى ماقۇلداپ، اپىل-عۇپىل قۇرىلىس جۇمىستارىن بولدىرماۋ كەرەكتىگىن ايتتى. ءوز سوزىندە ول ناقتى باس جوسپار ازىرلەنگەنگە دەيىن جاڭا جەر تەلىمدەرىن بەرۋدى جانە وندا قۇرىلىس جۇمىستارىن جۇرگىزۋگە رۇقسات بەرۋدى توقتاتا تۇرۋ قاجەتتىگىن جەتكىزدى.