ول لوكوموتيۆ زاۋىتىنا جۇمىسقا تۇراتىن بولدى
ەلوردا اكىمى التاي كولگىنوۆ 8-قاباتتىڭ تەرەزەسىنەن ءۇش جاسار ءبۇلدىرشىندى قۇتقارىپ قالعان ءسابيت شونتاقبايەۆپەن كەزدەستى، دەپ حابارلايدى Almaty-akshamy.kz.
«بۇگىن ءوز ءومىرىن قاتەرگە تىگە وتىرىپ، 8-قاباتتىڭ تەرەزەسىنەن ءۇش جاسار ءبۇلدىرشىندى قۇتقارىپ قالعان ءسابيت شونتاقبايەۆتىڭ ەرلىككە پارا-پار قادامىنا كۋا بولدىق. ول ەلورداعا وسى جىلدىڭ مامىر ايىنىڭ باسىندا قىزىلوردادان كەلگەن. سابيتكە وسىنداي ساتتە كورسەتكەن ەرلىگى مەن باتىلدىعى ءۇشىن العىس ايتتىم! ءوز تاراپىمىزدان ءسابيتتىڭ وتباسىنا ءتيىستى كومەك كورسەتەمىز. ءبىلىمى مەن تاجىريبەسىن ەسكەرە وتىرىپ، لوكوموتيۆ زاۋىتىنىڭ («لوكوموتيۆ قۇراستىرۋ زاۋىتى» اق) ديرەكتورىمەن ءسابيتتى جۇمىسقا ورنالاستىرۋ تۋرالى كەلىستىم. بۇرىن ول وسى سالا بويىنشا قتج-دا جۇمىس ىستەگەن، ماماندىعى – ۆاگون شارۋاشىلىعى. بۇل سالادا تاجىريبەسى بار» دەپ جازدى استانا اكىمى التاي كولگىنوۆ Instagram-داعى پاراقشاسىندا.
قالا باسشىسى باتىل ازامات سابيتكە ەلورداعا ءبىرجولا قونىستانۋ تۋرالى ۇسىنىس ايتقانىن مالىمدەدى.
«سول سياقتى بۇكىل وتباسىن ەلوردامىزعا كوشىرىپ اكەلۋ تۋرالى ۇسىنىس جاسادىم. ءسابيت زايىبىمەن بىرگە 4 بالا (3 ۇل، ءبىر قىز) ءوسىرىپ وتىر. جۇبايىن جۇمىسقا تۇرۋىنا، ال بالالارىن مەكتەپكە جانە بالاباقشاعا ورنالاستىرۋعا كومەكتەسەمىز. وسىلايشا رەسمي تۇردە جۇمىس ىستەي وتىرىپ، قىزمەتتىك تۇرعىن ۇيگە ۇمىتكەر بولا الادى، سونداي-اق وزگە دە تۇرعىن ءۇي باعدارلامالارىنا قاتىسا الادى. دەمەۋشىلەر ەسەبىنەن وتباسىنىڭ نەسيەسىن وتەۋىنە كومەكتەسەمىز، ال جازعى ۋاقىتتا بالالارىنا بۋرابايعا جولداما بەرەمىز» دەلىنگەن جازبادا.
سونداي-اق، التاي كولگىنوۆ ءسوز سوڭىندا قالا تۇرعىندارىن ساقتىق شارالارىن تولىقتاي ساقتاۋعا، بالالارىن قاراۋسىز جانە ءۇي تەرەزەسىن اشىق قالدىرماۋعا شاقىردى. ايات كەتەيىك، بۇگىن تاڭەرتەڭ ەلوردادا قىزىلوردالىق ازامات 8 قاباتتا تەرەزەدەن سالبىراپ تۇرعان ءبۇلدىرشىندى قۇتقارىپ قالدى. بۇل وقيعانىڭ ۆيدەوسى جەلىدە كەڭ تارالىپ، ءسابيت شونتاقبايەۆتىڭ باتىل ارەكەتىنە كوپشىلىك ءتانتى بولدى. ودان كەيىن تج ءبىرىنشى ۆيسە-مينيسترى گەنەرال-لەيتەنانت كۇلشىمبايەۆ يبراگيم ءسابيت شونتاقبايەۆتى «توتەنشە جاعدايداعى ەرلىگى ءۇشىن» توسبەلگىسىمەن ماراپاتتادى.