بۇكىل ۇلت بولىپ ۇيىسىپ، ەلدىگىمىزدىڭ سىنالار سىنىنان وتتىك. بۇل رەفەرەندۋم بىرلىگى بەكەم، ەلىن سۇيەتىن وتانشىل حالىق ەكەنىمىزدى كورسەتتى. ەندىگى ماقسات – ەڭسەلى ەل بولۋ.
پرەزيدەنت قاسىم-جومارت توقايەۆ رەفەرەندۋم قورىتىندىسى بويىنشا قازاقستان حالقىنا ۇندەۋ جاسادى. ۇندەۋدە رەفورمالاردىڭ نەگىزگى ماقساتىن اتاپ، ەل تاعدىرى ءاربىر ازاماتتىڭ قولىندا تۇرعانىن جەتكىزدى.
حالىق تا «جاڭا قازاقستان» قۇرۋ جولىنداعى ەل دامۋىنىڭ جاڭا كەزەڭگە اياق باسقانىن سەزىنىپ، رەفەرەندۋمعا كەلدى. سايكەسىنشە، حالىقتىڭ جانىن جەگىدەي جەگەن پروبلەمالاردى تەرەڭ زەردەلەي وتىرىپ، مەملەكەتتىڭ دۇرىس جولمەن دامۋىنىڭ العىشارتتارىن كورسەتىپ بەرگەن قاسىم-جومارت توقايەۆ ەلدە ورىن العان ولقىلىقتاردىڭ ءبارىن جەدەل ساۋىقتىرىپ، تۇبەگەيلى رەفورمالار جاساۋعا دايىن ەكەندىگىن دالەلدەي الدى.
ەندى جۇرتتىڭ ساناسىنا سىلكىنىس اكەلگەن «جاڭا قازاقستان» جالاڭ ۇران بولماۋعا ءتيىس!
الدا ەلىمىزدىڭ زاڭناماسىنا وزگەرىستەر ەنىپ، سانالى تۇردە ءار ءىستى ساراپتاي الساق حالىقتى ەشكىم قۇرعاق سوزبەن الداي دا، ارباي دا المايدى.