الماتىداعى بالمۇزداق زاۋىتىندا جۇمىسشىلاردىڭ ۋلانۋ سەبەبى انىقتالدى

مۇزداتقىش ءسيليندرى ارتىنداعى رەزەڭكە توسەمشەنىڭ زاۋىتتىق اقاۋىنا بايلانىستى 500 گ اممياك سىرتقا توگىلگەن.

«شين-لاين» كومپانياسى 7 ماۋسىمدا ءوندىرىس ورنىندا بولعان وقىس وقيعاعا قاتىستى تۇسىنىك بەردى، دەپ حابارلايدى Almaty-akshamy.kz.

كومپانيانىڭ باسپا ءسوز قىزمەتىنەن حابارلاعانداي، الدىن الا قورىتىندى بويىنشا مۇزداتقىش ءسيليندرى ارتىنداعى رەزەڭكە توسەمشەنىڭ زاۋىتتىق اقاۋىنا بايلانىستى 500 گ اممياك سىرتقا توگىلگەن. دەرەۋ وقيعا ورنىنا قاداعالاۋ قىزمەتتەرى مەن ەكولوگيالىق ساراپتاما جۇرگىزۋشى ماماندار شاقىرىلعان.

«قازىرگى ۋاقىتتا انىقتالعان تەحنيكالىق اقاۋ تولىعىمەن جويىلدى. جابدىق 1 ماۋسىمدا عانا تەكسەرىلىپ، كۋالاندىرۋدان وتكەن ەدى. اقاۋدىڭ شىعۋ سەبەبى تۇپكىلىكتى انىقتالعان سوڭ، كومپانيا رەسمي جەتكىزۋشىلەرگە حابارلاسادى. بىزدەگى جابدىقتار مەن ولاردىڭ قوسالقى بولشەكتەرى رەسمي جەتكىزۋشىلەردەن ساتىپ الىنعان جانە قاجەتتى سايكەستىك سەرتيفيكاتتارى بار»، - دەلىنەدى كومپانيانىڭ حابارلاماسىندا.

سونداي-اق كومپانيا كاسىپورىنعا تەكسەرۋ جۇرگىزەتىن قاداعالاۋ ورگاندارىنا جان-جاقتى كومەك كورسەتەتىنىن ءمالىم ەتتى.

«قاداعالاۋ ورگاندارى ءتيىستى قورىتىندى شىعارادى. بارلىق قوسىمشا اقپارات مەملەكەتتىك ورگانداردىڭ رەسمي قورىتىندىسىن العان سوڭ حابارلانادى. ايتا كەتەيىك، وقيعا بولعان كۇنگى اۋىسىمدا وندىرىلگەن ونىمدەر ساتىلىمعا شىققان جوق»،- دەپ حابارلادى كومپانيا.

ەسكە سالايىق، الماتىداعى «شين-لاين» كومپانياسىنىڭ سەحىندا توگىلگەن اممياكتان بەس ادام ۋلانىپ، اۋرۋحاناعا تۇسكەن ەدى.