كونستيتۋسيالىق رەفورما – جالپىۇلتتىق سيپاتتاعى باعدارلى ماسەلە. مەملەكەت باسشىسى قاسىم-جومارت توقايەۆ تۇجىرىمداعانداي، ساياسي جاڭعىرۋ بولماسا، ەلىمىزدى ورنىقتى دامىتۋ، اۋقىمدى الەۋمەتتىك-ەكونوميكالىق وزگەرىس جاساۋ مۇمكىن ەمەس. بۇل – اقيقات.
وتكەن ءۇش جىلعا جۋىق ۋاقىت ىشىندە پرەزيدەنتىمىز حالقىنا بەرگەن ۋادەلەرىن مۇلتىكسىز ورىنداپ، انتقا ادالدىعىن دالەلدەپ كەلەدى. ساياسي ترانسفورماسيا بارلىق سالادا تامىر-تانىستىق پەن مونوپوليانى تۇبىرىمەن جويىپ، ادال ءارى ءادىل «ويىن ەرەجەسىن» قالىپتاستىرۋدى كوزدەيتىنىن قاداپ ايتتى. بىزگە «حالىق ۇنىنە قۇلاق اساتىن مەملەكەت» تۇجىرىمداماسىن اماناتتادى. باسقارۋدىڭ سۋپەرپرەزيدەنتتىك ۇلگىسىنەن مىقتى پارلامەنتى بار پرەزيدەنتتىك رەسپۋبليكاعا ءبىرجولا كوشۋ ءۇشىن «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» قاعيداتىن باسشىلىققا الۋدى تاپسىردى.
ەڭ باستىسى، قوعامدى تولعاندىرعان ءبىرقاتار ماسەلەلەر شەشىمىن تاپتى. پرەزيدەنت العاشقىدا ۇسىنعان ساياسي رەفورمالاردىڭ ءتورت توپتاماسى بويىنشا ناقتى ناتيجەلەر كورىنە باستادى. مۇنى ەلىمىزدە سوڭعى ۋاقىتتا بولىپ جاتقان تاريحي شەشىمدەر مەن ماڭىزدى وقيعالار ايعاقتايدى. قوعامدى ودان ءارى دەموكراتيالاندىرۋعا باعىتتالعان ءبىرقاتار ماڭىزدى باستامالار جۇزەگە استى. ۇلتتىق قوعامدىق سەنىم كەڭەسى قۇرىلدى. ونداعى پىكىرتالاستاعى ءار پىكىر، ءار ۇسىنىس نازاردان تىس قالمادى، مۇقيات زەردەلەندى. ساياسات سالاسىندا عانا وننان استام زاڭ قابىلداندى. وسىعان قاراپ-اق ەلىمىزدەگى وڭ ۇدەرىستەردىڭ اۋقىمىن مەجەلەۋگە بولادى. سولاردىڭ ءبىرى دە بىرەگەيى – بەيبىت جينالىستار تۋرالى جاڭا زاڭنىڭ دەموكراتيالىق باعدارى قوعامنىڭ زور قولداۋىنا يە بولدى.
اتالمىش قۇجات كىم-كىمگە دە ەش كەدەرگىسىز شەرۋ وتكىزۋگە، نيەت-پىكىرىن ەمىن-ەركىن ايتۋعا مۇمكىندىك بەرۋىمەن دە باعالى. وسىلايشا بيلىك پەن حالىق اراسىندا ديالوگ الاڭىنىڭ جاڭا ءۇردىسى، ازاماتتىق جاۋاپكەرشىلىك پەن ساياسي مادەنيەت قالىپتاسىپ كەلەدى. پرەزيدەنتىمىز ايتقانداي، زاڭ بارىنە ورتاق، وعان بيلىكتەگى ازاماتتار دا، قوعام بەلسەندىلەرى دە بىردەي باعىنۋعا ءتيىس. سوندا عانا مەملەكەتىمىزدە جۇرگىزىلىپ جاتقان جۇيەلى ساياسي وزگەرىستەر جۇيەسىن تابادى دەپ سەنەمىز. بۇكىل قۇزىرەت ءبىر قولعا جيناقتالعان باسقارۋ جۇيەسى ءوزىنىڭ تيىمدىلىگىن جوعالتىپ، قۇردىمعا كەتە باستاعان قازىرگى كەزەڭدە بىزگە ۇلتتىق سەرپىلىس قاجەت. ادىلەتتى قازاقستاندى قۇرۋ – ءوز قولىمىزدا. «رەفورما جاساپ جاتىرمىز دەگەن اتاق ءۇشىن عانا رەفورما جاساۋدىڭ ەشكىمگە قاجەتى جوق» دەگەن قاسىم-جومارت توقايەۆ حالىققا كوپىرمە ءسوز ەمەس، بوس ۋادە ەمەس، كوزبەن كورىپ، قولمەن ۇستاۋعا بولاتىن وڭ وزگەرىستەر قاجەتتىگىن ەسكەرتكەنى بەلگىلى. «ءبىز كەز كەلگەن ماسەلەنى اشىق ايتىپ، ونى شەشۋدىڭ وڭتايلى جولدارىن بىرگە ىزدەۋىمىز قاجەت. ەكونوميكاداعى، ساياساتتاعى جاساندى مونوپوليالاردى تۇبىرىمەن جويۋعا ءتيىسپىز. ونىڭ ورنىنا اشىق ءارى ءادىل باسەكە ورناتۋ وتە ماڭىزدى. سەبەبى، ناعىز باسەكە بولعاندا عانا حالىقتىڭ ءال-اۋقاتى ارتىپ، جاعدايى جاقسارادى»، – دەدى پرەزيدەنت.
ولاي بولسا، جاڭارۋ مەن جاڭعىرۋ رەفورمالارىنان، جالپىحالىقتىق رەفەرەندۋمنان ەشكىم شەتتەپ قالماي، اركىم جاڭا قازاقستاننىڭ داۋىرلەۋى ءۇشىن بەلسەنە جۇمىلعانى كەرەك. ەل تاعدىرى مەن ەلدىكتىڭ ابىروي-بەدەلى جولىنداعى اماناتقا ادالدىق – كيەلى پارىز دەسەك، ءاربىر ازامات بۇل ماڭىزدى ماسەلەگە الەۋمەتتىك جاۋاپكەرشىلىكپەن قاراعانى ابزال.