قالادا مەديسينالىق-سانيتارلىق العاشقى كومەك (مساك) ۇيىمدارىنا حالىقتى تىركەيتىن جىل سايىنعى ناۋقاننىڭ قورىتىندىسى شىقتى. قالالىق بولىمشە ديرەكتورىنىڭ ورىنباسارى، ق ر دسم «ساليدات قايىربەكوۆا اتىنداعى ۇلتتىق دەنساۋلىق ساقتاۋدى دامىتۋ عىلىمي ورتالىعىنىڭ» وكىلى بيبىگۇل ايتباقينا وڭىرلىك كوممۋنيكاسيالار قىزمەتىندە وسىلاي دەدى.
جىل سايىنعى تىركەۋ ناۋقانى 1 قىركۇيەكتەن 1 قاراشاعا دەيىنگى ارالىقتا ءوتتى. بيىل اكسياعا 80 مەديسينالىق ۇيىم قاتىسقان، ولاردىڭ ىشىندە ەكى جاڭا كلينيكا – Tengri Medical Clinic پەن NaraMed تە بار.
ناۋقان قورىتىندىسى بويىنشا 14 303 ادام جاڭا مساك ۇيىمدارىنا تىركەلىپ، 14 822 تۇرعىن ەمحاناسىن اۋىستىرعان. 2 394 841 ادام تىركەلگەنىمەن، بۇل ناۋقان باستالعانعا دەيىنگى كورسەتكىشتەن 519 ادامعا از.
«تىركەلگەندەردىڭ كوبى ادەتتەگىدەي ستۋدەنتتەر، زەينەتكەرلەر مەن الماتىدا ۋاقىتشا تۇرىپ جاتقان ازاماتتار بولىپ وتىر. ناۋقاندى جوسپارلى تۇردە، ەمحانالارعا سالماق تۇسىرمەي وتكىزدىك»، – دەيدى بيبىگۇل ايتباقينا.
15 قىركۇيەكتەن باستاپ قاعاز جۇزىندە ءوتىنىش بەرەتىندەر ءۇشىن Face ID جۇيەسى ارقىلى جاڭارتىلعان سايكەستەندىرۋ جۇيەسىنە كوشۋ جۇزەگە اسىرىلدى. ەندى 18 جاسقا دەيىنگى بالالاردى، مۇگەدەكتىگى بار ادامدار مەن سوتتالعانداردى قوسپاعاندا، ازاماتتاردى تىركەۋ Face ID ارقىلى نەمەسە Kaspi قوسىمشاسىنداعى جەكە كودتى كورسەتۋ ارقىلى جۇرگىزىلەدى. بۇل جەكە دەرەكتىڭ قورعالۋىن كۇشەيتىپ، ءوتىنىشتىڭ قايتالانۋىنا دا جول بەرمەيدى.
«تىركەلگەن حالىقتىڭ ءتىزىمى» اقپاراتتىق جۇيەسى ارقىلى تىركەلگەن ازاماتتىڭ دەرەگىنىڭ دۇرىستىعىنا باقىلاۋ جاسالادى. وندا جسن، تۇرعىلىقتى جەرى، ازاماتتىعى مەن تىركەۋدىڭ وزەكتىلىگى اۆتوماتتى تۇردە تەكسەرىلەدى. دەرەكتەردى الەۋمەتتىك مەديسينالىق ساقتاندىرۋ قورى مەن جەكە تۇلعالاردىڭ مەملەكەتتىك دەرەكتەر بازاسىمەن سالىستىرىپ، توقسان سايىن باقىلايدى.
«سيفرلاندىرۋدىڭ ارقاسىندا جۇمىس بارىنشا ىڭعايلى، اشىق ءوتتى وسى جولى. ەمحاناعا بارماي-اق، ءبارى ونلاين تىركەلە الادى ەندى. زەينەتكەرلەر مەن مۇگەدەكتىگى بار جاندار سياقتى كەيبىر ساناتتاعى ادامدار قۇجاتتارىمەن وفلاين تىركەلە بەرەتىن بولدى»، – دەپ تولىقتىردى سپيكەر.
ەستەرىڭىزگە سالساق، ەمحانالارعا تىركەلۋ ق ر دەنساۋلىق ساقتاۋ ءمينيسترىنىڭ بۇيرىعى بويىنشا جۇزەگە اسىپ، ازاماتتار تۇرعىلىقتى جەرى مەن جۇمىس ورنى بويىنشا مەديسينالىق ۇيىمدى ءوزى تاڭداپ الا الاتىنداي ەتىپ ىستەلدى.