شانحاي قالاسىنا جاساعان جۇمىس ساپارى اياسىندا الماتى اكىمى دارحان ساتىبالدى AgiBot كومپانياسىنىڭ نەگىزىن قالاۋشى جانە تەحنيكالىق ديرەكتورى پەن چجيحۋەيمەن (Peng Zhihui) كەزدەستى. ول – جاڭا بۋىننىڭ جەتەكشى روبوتوتەحنيكا ينجەنەرلەرىنىڭ ءبىرى.
ساپار بارىسىندا الماتى قالاسى سيفرلاندىرۋ باسقارماسى، Astana Hub جانە AgiBot (شانحاي، قحر) اراسىندا ءوزارا تۇسىنىستىك تۋرالى مەموراندۋمعا قول قويىلدى. قۇجات روبوتوتەحنيكا مەن جاساندى ينتەللەكت باعىتتارىنداعى وزىق شەشىمدەردى دامىتۋعا، سونداي-اق الماتىنى embodied AI جانە سەرۆيستىك روبوتوتەحنيكا بويىنشا ورتالىق ازياداعى نەگىزگى ورتالىقتاردىڭ بىرىنە اينالدىرۋعا باعىتتالعان.
AgiBot – 2023 جىلى قۇرىلعان روبوتوتەحنيكا كومپانياسى. ول “Embodiment + AI” پلاتفورماسىن دامىتا وتىرىپ، Yuanzheng، Lingxi جانە Genie اتتى گۋمانويدتى جانە سەرۆيستىك روبوتتار جەلىلەرىن شىعارادى. كومپانيا الەمدىك نارىقتا قارقىندى دامىپ كەلە جاتقان ويىنشىلاردىڭ قاتارىندا، ينۆەستورلارىنىڭ اراسىندا Sequoia، Baidu Ventures، Tencent، BYD، TCL جانە LG Electronics بار.
تاراپتار الماتىدا Robotech R&D زەرتحاناسىن قۇرۋ، قالالىق ورتادا روبوتتاردى وقىتۋعا ارنالعان «دەرەكتەر فابريكاسىن» ىسكە قوسۋ، لوگيستيكا، ونەركاسىپ، مەديسينا جانە ءبىلىم بەرۋ سالالارىندا پيلوتتىق جوبالاردى جۇزەگە اسىرۋ، سونداي-اق روبوتوتەحنيكا مەن جاساندى ينتەللەكت سالاسىندا كادرلار دايارلاۋ جونىندە كەلىسىم جاساستى.
اتالعان سەرىكتەستىك قازاقستان مەن جۇڭگو اراسىنداعى جوعارى تەحنولوگيا سالاسىنداعى ىنتىماقتاستىقتى دامىتۋدا ماڭىزدى قادام بولماق.