الماتى اكىمى دارحان ساتىبالدىنىڭ جۇڭگو حالىق رەسپۋبليكاسىنىڭ شانحاي قالاسىنا جاساعان جۇمىس ساپارى اياسىندا جاھاندىق UBTECH Robotics كومپانياسى جانە قازاقستاندىق NERO Group تەحنولوگيالىق كومپانياسىمەن جاساندى ينتەللەكت نەگىزىندەگى ءبىلىم بەرۋ جانە سەرۆيستىك روبوتتاردى ءوندىرۋ جانە ەنگىزۋ بويىنشا الماتىدا بىرلەسكەن كاسىپورىن قۇرۋ تۋرالى نيەت حاتقا الدىن الا قول قويىلدى، دەپ حابارلايدى aqshamnews.kz
كەلىسىمگە سايكەس، الماتى اكىمدىگى بىرلەسكەن كاسىپورىن قۇرۋعا جانە ونىڭ ونىمدەرىن ىلگەرىلەتۋگە جان-جاقتى قولداۋ كورسەتۋگە دايىن. اتاپ ايتقاندا، قازاقستان رەسپۋبليكاسىنىڭ ءبىلىم بەرۋ، جاساندى ينتەللەكت جانە سيفرلىق دامۋ سالالارىنا جاۋاپتى مەملەكەتتىك ورگاندارىمەن ىسكەرلىك بايلانىستاردى جولعا قويۋعا جاردەمدەسۋ كوزدەلگەن.
ءوز تاراپىنان UBTECH Robotics بىرلەسكەن كاسىپورىنعا وقۋ-ادىستەمەلىك ماتەريالدار، باعدارلامالىق قامتاماسىز ەتۋ، تەحنولوگيالار مەن ينجەنەرلىك شەشىمدەردى، سونداي-اق جاساندى ينتەللەكتكە نەگىزدەلگەن ءبىلىم بەرۋ جانە سەرۆيستىك روبوتتاردى ءوندىرۋ تەحنولوگياسىن ۇسىنۋعا ءازىر. سونىمەن قاتار، UBTECH سەرىكتەسپەن بىرلەسىپ گۋمانويد روبوتتاردى قولدانۋدىڭ كوممەرسيالىق سەنارييلەرىن ازىرلەۋگە باعىتتالعان عىلىمي-زەرتتەۋ جانە تاجىريبەلىك-كونسترۋكتورلىق جۇمىستار (عزتكج) جۇرگىزەتىن بولادى.
UBTECHء-تىڭ جەرگىلىكتى سەرىكتەسى رەتىندە NERO Group الماتىدا وندىرىستىك قۋاتتاردى جانە دايىندالعان تەحنيكالىق كادرلاردى ۇسىنا الادى، سونداي-اق بىرلەسكەن كاسىپورىندى باسقارۋدىڭ وپەراسيالىق قىزمەتىنە قاتىسۋعا دايىن.
2026 جىلدىڭ سوڭىنا دەيىن تاراپتار بىرلەسكەن ماركەتينگتىك زەرتتەۋدى اياقتاپ، الماتىدا UBTECH سەرۆيستىك روبوتتارىن شىعارۋ جانە ولاردى قازاقستان مەن ورتالىق ازيا نارىعىنا جەتكىزۋ بويىنشا ەكونوميكالىق ورىندىلىق جونىندە شەشىم قابىلداۋدى جوسپارلاپ وتىر. سونىمەن قاتار، جەرگىلىكتى جوعارى وقۋ ورىندارىمەن بىرلەسە وتىرىپ، گۋمانويد روبوتتاردى قىزمەت كورسەتۋ، ءوندىرىس جانە لوگيستيكا سالالارىندا قولدانۋ سەنارييلەرى ازىرلەنەتىن بولادى.