جۇڭگو حالىق رەسپۋبليكاسىنا جۇمىس ساپارى بارىسىندا الماتى اكىمى دارحان ساتىبالدى قىتايدىڭ ءىرى قۇرىلىس كورپوراسيالارىنىڭ ءبىرى – الەمنىڭ كوپتەگەن ەلدەرىندە اۋقىمدى ينفراقۇرىلىمدىق جانە ديەۆەلوپەرلىك جوبالاردى جۇزەگە اسىرىپ كەلە جاتقان «Shanghai Construction Group» (SCG) باسشىلارىمەن كەزدەستى. جۇڭگو تاراپىنان دەلەگاسيانى كومپانيانىڭ پرەزيدەنت مىندەتىن اتقارۋشى سيۋە يۋنشەن جەتەكشىلىك ەتتى.
كەلىسسوز بارىسىندا تاراپتار قالالىق ورتانى كەشەندى دامىتۋ، زاماناۋي ساۋلەتتىك جانە مادەني نىساندار سالۋ، سونداي-اق الماتىدا يننوۆاسيالىق جانە تۋريستىك كلاستەرلەر قالىپتاستىرۋ باعىتىنداعى ىقپالداستىق مۇمكىندىگىن تالقىلادى.
دارحان ساتىبالدى الماتىدا ينفراقۇرىلىمدى جاڭعىرتۋ جانە قولايلى، ەكولوگيالىق ءارى زاماناۋي قالالىق كەڭىستىك قۇرۋ بويىنشا جۇيەلى جۇمىس جۇرگىزىلىپ جاتقانىن اتاپ ءوتتى. اكىم Shanghai Construction Group كومپانياسىنىڭ الەمدىك دەڭگەيدەگى جوبالاردى تابىستى جۇزەگە اسىرۋ تاجىريبەسىنە جوعارى باعا بەرىپ، بىرلەسكەن جۇمىستىڭ ايتارلىقتاي الەۋەتى بار ەكەنىنە سەنىم ءبىلدىردى.
كەزدەسۋ بارىسىندا كومپانيانىڭ قالا ءۇشىن باسىم باعىتتارداعى جوبالارعا قاتىسۋ مۇمكىندىگىنە ەرەكشە نازار اۋدارىلدى. اتاپ ايتقاندا، قوعامدىق كەڭىستىكتەردى، مادەني-ويىن-ساۋىق جانە تەحنولوگيالىق ورتالىقتاردى دامىتۋ، جاڭا قالالىق اۋماقتاردى يگەرۋ جانە كولىك ينفراقۇرىلىمىن جەتىلدىرۋ باعىتتارى قارالدى.
ءوز كەزەگىندە Shanghai Construction Group باسشىلىعى ىنتىماقتاستىقتى كەڭەيتۋگە قىزىعۋشىلىق تانىتىپ، سەرىكتەستىكتىڭ ناقتى باعىتتارىن قاراستىرۋعا دايىن ەكەنىن ءبىلدىردى. كەلىسسوز ناتيجەسى بويىنشا تاراپتار الماتى قالاسىنىڭ قالالىق جانە تۋريستىك ينفراقۇرىلىمىن دامىتۋ سالاسىنداعى ءبىرقاتار ماڭىزدى جوبالاردى جۇزەگە اسىرۋعا نەگىز بولاتىن ىنتىماقتاستىق تۋرالى مەموراندۋم جوباسىن دايىنداۋ جونىندە ۋاعدالاستى.
انىقتاما ءۇشىن: Shanghai Construction Group (SCG) – 1994 جىلى قۇرىلعان جانە شانحاي قالاسىنىڭ مۋنيسيپالدىق باسقارۋ جۇيەسىنە كىرەتىن قىتايدىڭ جەتەكشى مەملەكەتتىك قۇرىلىس كورپوراسياسى. كومپانيا 30-دان استام ەلدە ينفراقۇرىلىم، تۇرعىن ءۇي جانە كوممەرسيالىق نىساندار، كوپىرلەر، مەتروپوليتەن جەلىلەرى جانە مادەني كەشەندەر سالۋ جوبالارىن جۇزەگە اسىرادى. SCGء-دىڭ الەمگە تانىلعان جوبالارىنىڭ قاتارىندا شانحاي مۇناراسى، «شىعىس ءىنجۋ» تەلەمۇناراسى، لۋپۋ كوپىرى جانە Xujiahui Center كەشەنى بار.