مەملەكەت باسشىسى قاسىم-جومارت توقايەۆتىڭ قۇربان ايت مەرەكەسىمەن قۇتتىقتاۋى
قىمباتتى وتانداستار!
سىزدەردى كۇللى مۇسىلمان قاۋىمى ءۇشىن قاسيەتتى قۇربان ايت مەرەكەسىمەن شىن جۇرەكتەن قۇتتىقتايمىن!
بۇل – يماندىلىق پەن ادامگەرشىلىكتىڭ، مەيىرىمدىلىك پەن جاناشىرلىقتىڭ مەيرامى. مۇسىلماندار وسى كۇندەردە مۇقتاج جاندارعا كومەكتەسىپ، قامقورلىق كورسەتەدى. بىر-بىرىنە ىزگى تىلەكتەرىن ايتىپ، جاقسىلىق جاساۋعا ۇمتىلادى.
قۇربان ايت مەيرامى ەلىمىزدە رۋحاني قۇندىلىقتاردى بەرىك ورنىقتىرىپ، قوعامداعى تاتۋلىق پەن تۇراقتىلىقتى ساقتاۋ جولىندا ەرەكشە ءرول اتقارادى.
بۇل مەرەكە قازاقستاندا تۇراتىن ءتۇرلى ەتنوس جانە كونفەسسيا وكىلدەرىنىڭ ءوزارا سىيلاستىعى مەن قۇرمەتىن ارتتىرىپ، دوستىعىن نىعايتا تۇسەدى. حالىقتى بەرەكە-بىرلىككە شاقىرىپ، ىرىس-ىنتىماعىن ەسەلەيدى. بەيبىتشىلىك پەن ىزگىلىكتىڭ باستاۋى بولعان اتا ءدىنىمىزدىڭ باستى ءمانى – وسىندا.
بۇگىنگى ۇلىق مەيرامدا شالعان قۇرباندىقتارىڭىز بەن تىلەگەن دۇعا-تىلەكتەرىڭىز قابىل بولسىن!
بارشاڭىزعا زور دەنساۋلىق، باق-بەرەكە تىلەيمىن!