بۇگىن مۇسىلمان قاۋىم قۇربان ايتتى مەرەكەلەۋدى باستادى

بۇگىن مۇسىلمان قاۋىم قۇربان ايتتى مەرەكەلەۋدى باستادى، دەپ حابارلايدى Almaty-akshamy.kz Inform.kz-كە سىلتەمە جاساپ.

بۇگىن باستالعان قۇربان ايت مەيرامى ءۇش كۇنگە سوزىلادى.

قازاقستان مۇسىلماندارى ءدىني باسقارماسىنىڭ مالىمەتىنە قاراعاندا ھيجري جىل ساناۋى بويىنشا 1443 جىلدىڭ زۇلحيججا ايىنىڭ باستالۋى 30 ماۋسىم بولىپ بەكىتىلگەن.

اراپا كۇنى 8 شىلدەگە سايكەس كەلەدى. ال 9 شىلدە – قۇربان ايت مەرەكەسىنىڭ العاشقى كۇنى. بۇل كۇندەرى قۇرباندىققا مال شالىپ، ازىعى جوق، مۇقتاج جاندارعا تاراتىپ بەرەدى.

يسلام تۇسىنىگى بويىنشا جوق-جىتىك جاندارعا كومەكتەسۋ ساۋاپتى ءىس. سونداي-اق، مۇسىلماندار قۇلشىلىق ەتىپ، كوبىرەك جاقسى امالدار جاساۋعا تىرىسقانى ءجون. سونداي-اق، مەرەكە كەزىندە قۇربان ايت نامازى وقىلادى.

ايتا كەتەيىك، ءار وڭىردە ناماز وقۋدىڭ بەكىتىلگەن ۋاقىتى بار. قازاقستان مۇسىلماندارى ءدىني باسقارماسى تاراتقان اقپاراتقا سايكەس وڭىرلەردەگى باس يمامدار قۇربان ايت مەيرامىنا وراي بريفينگ وتكىزىپ، ب ا ق ارقىلى حالىققا اتالعان مەرەكەنىڭ ءمان-جايىن كەڭىنەن ءتۇسىندىردى.

اتالعان مەرەكەگە ءتان مىندەت – قۇربان شالۋ.

ەسكە سالا كەتەيىك، قۇرباندىققا شالاتىن مالعا جانە سويۋعا قاتىستى قويىلاتىن ارنايى تالاپتار بار. وسى ورايدا قازاقستاندىقتار Qurban2022.kz سايتى ارقىلى ءوتىنىم بەرە وتىرىپ، ونلاين رەجيمدە دە قۇرباندىق شالا الادى.

ودان بولەك، ەلىمىزدىڭ سانيتاريالىق-ەپيدەميولوگيالىق باقىلاۋ كوميتەتى ساقتىق شاراسى ماقساتىندا قۇرباندىققا ۆەتەرينارلىق انىقتاماسى بار مالدى عانا سويۋدى ۇسىنىپ وتىر.