پرەمەر-مينيستر ءاليحان سمايىلوۆ قازاقستاندىقتاردى تاۋەلسىزدىك كۇنىمەن قۇتتىقتادى.
«قۇرمەتتى قازاقستاندىقتار! سىزدەردى قازاقستان رەسپۋبليكاسىنىڭ تاۋەلسىزدىك كۇنىمەن شىن جۇرەكتەن قۇتتىقتايمىن! بۇل – ەگەمەن ەلىمىزدىڭ شىن مانىندەگى باستى مەملەكەتتىك مەرەكەسى. ويتكەنى قاجىرلى كۇرەس پەن جانكەشتى ەڭبەكتىڭ ارقاسىندا قولىمىز جەتكەن تاۋەلسىزدىك – كوزدىڭ قاراشىعىنداي قورعالۋعا ءتيىس قاستەرلى قۇندىلىق.
پرەزيدەنت قاسىم-جومارت توقايەۆ جۇرگىزىپ وتىرعان مەملەكەتتىك ساياسات تاۋەلسىزدىك تۇعىرىن نىعايتۋعا باعىتتالعان. شىنايى جاڭعىرۋ جولىنا قادام باسقان قازاقستان الاشتىڭ ادىلەتتىلىك پەن ازاتتىق جولىنداعى سان عاسىرلىق ارمانىن اقيقاتقا اينالدىردى. سوندىقتان ءبىزدىڭ بولاشاق ۇرپاق الدىنداعى باستى پارىزىمىز – وسىناۋ باعا جەتپەس بايلىعىمىزدى ساقتاپ، ەل ىرىسىن ەسەلەي ءتۇسۋ ءۇشىن قولدان كەلگەننىڭ ءبارىن جاساۋ. مەرەيلى مەرەكەدە بارشاڭىزعا اشىق اسپان، مىقتى دەنساۋلىق، تابىس جانە اماندىق تىلەيمىن! – دەدى پرەمەر-مينيستر.