الماتىدا سوزىلمالى بۇيرەك جەتكىلىكسىزدىگى بار ناۋقاستاردى ەمدەۋدە جاڭا مۇمكىندىكتەرگە جول اشىلدى
مەديسينا الەمىندە ەمدەۋ ادىستەرى ۇنەمى جەتىلدىرىلىپ وتىرادى. دياليز فيستۋلالارىن رەنتگەنەندوۆاسكۋليارلىق قايتا وزەكتەۋ باعىتى دا ۋاقىت كوشىنەن قالماي كەلەدى. الماتى قالاسىندا وتكەن «شەبەرلىك ساباعى» اياسىندا ەندوۆوسكۋليارلى حيرۋرگ-دارىگەرلەر مەن نەفرولوگتار ءۇشىن 6 بىرەگەي وتا جاسالدى. بۇل وتالار بارىسىندا دۇرىس جۇمىس ىستەمەيتىن دياليز فيستۋلالارى بار ناۋقاستاردى ەمدەۋدىڭ يننوۆاسيالىق ءتاسىلى كورسەتىلدى.
اتالعان ءتاسىل مەگاپوليستەگى ورتالىق قالالىق كلينيكالىق اۋرۋحانادا العاش رەت كورسەتىلدى. بۇل ءادىس سوزىلمالى بۇيرەك جەتكىلىكسىزدىگى بار ناۋقاستاردى ەمدەۋدە جاڭا مۇمكىندىكتەرگە جول اشادى. الماتى قالاسىندا سوزىلمالى دياليزگە تاۋەلدى پاسيەنتتەر سانىنىڭ وتە كوپ بولۋى قازىرگى كەزدە قولدانىلىپ جۇرگەن ارتەريالىق-قان تامىرلىق فيستۋلالاردى پايدالانۋدىڭ ءالى دە وزەكتى ەكەنىنىڭ دالەلى.
دياليز فيستۋلاسى – سوزىلمالى بۇيرەك جەتكىلىكسىزدىگى بار ناۋقاستاردا دياليزدى جۇزەگە اسىرۋ ءۇشىن قاناينالىم جۇيەسىنە قول جەتكىزۋدى قامتاماسىز ەتۋ ماقساتىندا ارتەريا مەن تامىرلىق قان تامىرى اراسىنداعى، ادەتتە بىلەك نە قولدىڭ جوعارعى بولىگىندەگى قوسىلۋدى حيرۋرگيالىق جولمەن جاساۋ.
دياليز فيستۋلاسى اعزادان قان الۋ، ونى توكسيندەر مەن ارتىق زاتتاردان تازارتۋ، سودان كەيىن دەنەگە قايتا ورالۋ مۇمكىندىگىن قامتاماسىز ەتۋ ءۇشىن جاسالادى. بۇل ءادىس بۇيرەك قىزمەتى شەكتەۋلى نەمەسە جەتىسپەيتىن ناۋقاستاردىڭ ومىرلىك بەلسەندىلىگىن ساقتاۋ ءۇشىن قولدانىلادى. دياليز فيستۋلاسىن قۇرۋ دياليز پروسەدۋرالارىن جۇرگىزۋدىڭ سەنىمدى جانە قولجەتىمدى جولىن انىقتاۋعا مۇمكىندىك بەرەدى، بۇل مەديسينالىق كومەكتىڭ وسى تۇرىنە مۇقتاج ناۋقاستاردىڭ ءومىر ءسۇرۋ ساپاسىن ەداۋىر جاقسارتادى.
گەمودياليز ناۋقاستارىنا ارنالعان ارتەريو-ۆەنوزدىق (دياليز) فيستۋلا ەكىنشى جۇرەك بولىپ تابىلادى. ويتكەنى ول ارقىلى عانا ءبىز گەمودياليز الاتىن ناۋقاستارىمىزدىڭ ءومىرىن ساقتاپ قالامىز. كوبىنە فيستۋلالار جابىلىپ قالىپ، ءوز جۇمىسىن توقتادى، سودان كەيىن ناۋقاسقا فيستۋلانى باسقا جەردە جاساۋ كەرەك بولادى. بۇل ونىڭ قولىن تاعى دا باسقا جەردەن كەسۋ، جاڭا حيرۋرگيالىق ارالاسۋدى بىلدىرەدى ءارى جاڭا فيستۋلا ۇزاق ۋاقىت جۇمىس ىستەيتىندىگىنە ەشقانداي كەپىلدىك جوق. كوپتەگەن ناۋقاستىڭ جىلدار بويى گەمودياليز الاتىنىن ەسكەرسەك، دياليز فيستۋلالارىن جابىلعان كەزدە قولدى باسقا جەردەن كەسۋگە تۋرا كەلەتىنى انىق. ناتيجەسىندە ناۋقاستىڭ قولىندا اۆ-فيستۋلالار ءۇشىن ساۋ ورىن قالمايدى جانە تۇراقتى كاتەتەرلەر ورناتىلادى، بۇل ءوز كەزەگىندە ماسەلەنىڭ ۋاقىتشا شەشىمى عانا (كاتەتەر ينفەكسياسى ءقاۋپى بار – سەپسيس، ترومبوز).
– ءبىزدىڭ دارىگەرلەر ءۇشىن بۇل «شەبەرلىك ساباعى» مەديسينالىق قاۋىمداستىق اراسىندا وسى وزىق ەمدەۋ ادىستەرىن ەنگىزۋدىڭ قۋاتتى قۇرالىنا اينالدى. ول جاڭا پەرسپەكتيۆالار اشتى جانە ەندوۆاسكۋليارلىق حيرۋرگيا سالاسىن دامىتۋعا يتەرمەلەدى، ناتيجەسىندە سوزىلمالى بۇيرەك جەتكىلىكسىزدىگىنەن زارداپ شەگەتىن كوپتەگەن ناۋقاستىڭ ءومىر ءسۇرۋ ساپاسى جاقسارادى. وسى «شەبەرلىك ساباعىنىڭ» ارقاسىندا فيستۋلانىڭ وتكىزگىشتىگىن قالپىنا كەلتىرۋدى جانە ونىڭ فۋنكسيونالدىعىن مۇمكىندىگىنشە ۇزاق جىلدارعا ۇزارتۋدى ۇيرەندىك. بىزدە بۇل وتانى قاجەت ەتەتىن التى پاسيەنت بولدى. سول ناۋقاستاردىڭ بارىنە اتالعان وتانى جاسادىق جانە ءبارى ءساتتى ءوتتى. ەندى ءبىز اۋرۋحانادا وسىنداي وتانى ۇنەمى جاسايتىن بولامىز، – دەيدى دارىگەر سۇلتان يلييەۆ.
ەندوۆاسكۋليارلىق قايتا وزەكتەۋ ارتەريوۆەنوزدى فيستۋلالاردىڭ قىزمەت ەتۋ مەرزىمىن ۇزارتۋدىڭ نەگىزگى نۇكتەسىن بىلدىرەدى. بۇل سوزىلمالى بۇيرەك جەتكىلىكسىزدىگىنە تاپ بولعان كوپتەگەن ناۋقاستىڭ ءومىر ءسۇرۋ ساپاسىنا بايلانىستى.
وسى ءادىستىڭ ارقاسىندا ناۋقاستار ارتەريو-ۆەنوزدى فيستۋلانى قولدانۋ مەرزىمىن بارىنشا ۇزارتۋعا مۇمكىندىك الادى. ال بۇل ولاردىڭ كۇندەلىكتى ومىرىنە ۇلكەن اسەر ەتەدى.
«شەبەرلىك ساباعى» ي.ي.مەچنيكوۆ اتىنداعى سانكت-پەتەربۋرگ سولتۇستىك-باتىس مەملەكەتتىك مەديسينا ۋنيۆەرسيتەتى ۋنيۆەرسيتەتتىك كلينيكاسىنىڭ دارىگەرى، ەندوۆاسكۋليارلىق جانە قان-تامىرلارى حيرۋرگى شاميل اسادۋللايەۆتىڭ قاتىسۋىمەن ءوتتى.