«بۇعىلار ۇيىرگە ەرتە تۇسسە، قىس اياعى سوزىلمايدى، كەش تۇسسە قىس سوزىلىڭقى بولادى» دەگەن بولجام بار
«بۇعىنىڭ مويىن جۋارى» بۇگىننەن باستالىپ، قازان ايىنىڭ 25-ىنە دەيىن سوزىلادى. وسى مەزگىلدە بۇعىنىڭ تۇگى ءتۇسىپ، موينى جۋانداپ سەمىرەدى، ادامنىڭ كوزىن تارتاتىنداي سۇلۋ كۇيگە ەنەدى. بۇعىنىڭ وسى وزگەرىستەرىنە نەگىزدەلىپ بۇل مەزگىلدى بابالارىمىز "بۇعىنىڭ مويىن جۋارى" دەپ اتاسا كەرەك. كەي دەرەكتەردە «بۇعىنىڭ مويىن جۋارى بۇعىنىڭ تاۋ باسىنداعى قارعا مويىنىن سۇيكەپ جۋعانىن مەڭزەيدى» دەيدى. سونىمەن قاتار، وسى مەزگىلدىڭ «بۇعىنىڭ مويىن جۋانداۋى» دەگەن دە اتاۋى دا بار ەكەنىن ۇمىتپاعان ماقۇل.
وسى كەزدە بۇعىلار ۇيىرگە تۇسۋگە جاراي باستايدى. امال ءجۇرىپ جاتقان كەزدە تاۋ توعايلارىندا، وزەن، كول جاعالاۋلارىنداعى اشىق الاڭقايلاردا بۇعىلاردىڭ ۇيىرگە تۇسەر الدىنداعى مايدانى وتەدى. ەڭ مىقتىسى عانا ۇيىرگە تۇسەدى. ءوزارا شايقاسۋىنان نەمەسە تاستارعا سوعىلۋىنان مۇيىزدەرى سىنادى، اڭشىلار مەن مالشىلار ورمان-توعايعا بارىپ بۇعى مۇيىزدەرىن تەرەتىن بولعان.
قازەكەڭ بۇعىنىڭ ۇيىرگە تۇسۋىنە ەرەكشە كوڭىل بولگەن. سوعان قاراپ اۋا رايىنا بولجامدار جاساعان: ەگەر بۇعىلار ۇيىرگە ەرتە تۇسسە، قىس اياعى سوزىلمايدى، ۇيىرگە كەش تۇسسە، قىس اياعى سوزىلادى دەپ پايىم جاساعان. قاسقىردىڭ ۇيىعۋى، ءيتتىڭ تۇلەۋى سياقتى كورىنىستەرگە دە كوڭىل بولگەن. يت بالاعىنان تۇلەسە ويدىڭ قىسى بولادى، جونىنان تۇلەسە تاۋدىڭ قىسى بولادى دەپ پايىمداعان. ارينە، بولجامدارى اينا- قاتەسىز كەلىپ وتىرعان.
وتكەن پايىمىمىزدا الماتىلىقتارعا جىلى كيىنۋگە ءالى ەرتە دەپ جازعانبىز. بۇلاي دەپ باتىل ايتۋىمىزعا ايدىڭ الشىسىنان تۋۋى سەبەپ بولعان ەدى. سول ايتقانىمىز شەتىنەن كەلىپ جاتىر. بىر-ەكى كۇنگى سالقىندىق بولماسا، كۇن ءالى سۋىتا قويعان جوق. شىبىن-شىركەيلەر، وزگە دە دالا جاندىكتەرى جازداعىداي تىرشىلىكتەرىن جاساپ جاتىر. كۇزدىڭ شۋاقتى بولاتىنىن، ۇزاققا سوزىلاتىنىن وسى كورىنىستەن-اق اڭعارۋعا بولاتىن سياقتى.
بۇگىن قولدانىستاعى كۇنتىزبە بويىنشا، قازاننىڭ – 20-سى، اي جۇيەسىنە سۇيەنەر بولساق، – 24ء-ى، قازاقشا ايدىڭ – 10-ى.
جوعارىدا ايتقانىمىزداي، «بۇعىنىڭ مويىن جۋارى» امالى ءجۇرىپ جاتقاندىقتان، الماتىدا الداعى اپتادا جىلى كۇندەر اراكىدىك جالعاسىن تابا بەرەدى، ءبىراق قاتارى سيرەكسيدى. جاڭبىر مەن قار كورىنىس بەرەدى. بۇعان قاراپ كۇز ءبىتتى دەۋگە كەلمەيدى، اسپان اشىق، كۇن جايدارى، شۋاقتى ساتتەر ءالى بار الدا...